ម្ដាយរបស់ក្មេងប្រុស កាក់ សុវណ្ណច្ឆ័យ បង្ហាញការខកចិត្តចំពោះមន្ត្រីពន្ធនាគារដែលមិនទាន់ដោះលែងកូនរបស់គាត់ឱ្យមានសេរីភាពវិញ នៅថ្ងៃទី៨ ខែវិច្ឆិកានេះ តាមសេចក្ដីសម្រេចរបស់តុលាការ។
លោកស្រី ព្រំ ចាន់ថា ម្ដាយរបស់ក្មេងប្រុស កាក់ សុវណ្ណច្ឆ័យ ថ្លែងប្រាប់អ្នកសារព័ត៌មាននៅមុខពន្ធនាគារ នៅព្រឹកថ្ងៃចន្ទនេះថា កាលពីថ្ងៃទី៥ ខែវិច្ឆិកា សាលាដំបូងរាជធានីភ្នំពេញ បានចេញសេចក្ដីប្រកាសព័ត៌មានប្រកាសដោះលែងកូនរបស់គាត់នៅថ្ងៃទី៨ ខែវិច្ឆិកានេះ បន្ទាប់ពីបានជាប់ឃុំក្នុងពន្ធនាគាររយៈពេល៤ខែ១៥ថ្ងៃ ក្នុងចំណោមទោស៨ខែ ប៉ុន្តែត្រូវស្ថិតក្រោមការព្យួរទោសសាកល្បងរយៈពេល២ឆ្នាំ។
លោកស្រីបន្តថា នៅថ្ងៃនេះ ដល់ថ្ងៃកំណត់ដែលត្រូវដោះលែងកូនរបស់គាត់ឱ្យមានសេរីភាពវិញហើយ ប៉ុន្តែខាងមន្ត្រីពន្ធនាគារមិនព្រមដោះលែងកូនគាត់ទេ ដោយពន្យារពេលដល់ថ្ងៃទី១០ ខែវិច្ឆិកាវិញ។
លោកស្រីថ្លែងថា៖ «អ៊ីចឹងតុលាការមិនគ្រប់ទឹកឬយ៉ាងម៉េច? បានជាចាប់ក្មេងមិនគ្រប់ទឹកដាក់ពន្ធនាគារហើយ ឥលូវវាទៅជាមិនព្រមលែងកូនខ្ញុំទៀត? ហើយប្រហែលជាគាត់ខ្លាចអ្នកគាំទ្រដែលលគេស្រឡាញ់កូនខ្ញុំមិនគ្រប់ទឹកហើយ ដែលគេមកគាំទ្រគាត់ច្រើន។ រឿងអីបានគាត់មកធ្វើបែបហ្នឹង ខ្ញុំខកចិត្តណាស់! កូនខ្ញុំ ឃុំគាត់ដល់ណាទៀត»។
លោក សំ សុគង់ មេធាវីការពារក្ដីឱ្យក្មេងប្រុស កាក់ សុវណ្ណច្ឆ័យ បានថ្លែងប្រាប់អ្នកសារព័ត៌មាននៅមុខពន្ធនាគារនាព្រឹកថ្ងៃនេះថា គាត់មកដល់ពន្ធនាគារ ដើម្បីមកទទួលកូនក្ដីតាមសេចក្ដីប្រកាសព័ត៌មានរបស់តុលាការ ប៉ុន្តែបែរជាមន្ត្រីពន្ធនាគារនិងមន្ត្រីតុលាការអះអាងដូចគ្នាថា នៅថ្ងៃទី១០ ខែវិច្ឆិកា ទើបដល់ថ្ងៃកំណត់ដោះលែងកូនក្ដីរបស់គាត់ទៅវិញ។ លោក សំ សុគង់ ចាត់ទុកការប្រកាសព័ត៌មានរបស់តុលាការធ្វើឡើងខុសបច្ចេកទេស។
លោកមានប្រសាសន៍ថា៖ «យើងមកទីនេះ [ពន្ធនាគារ] ដោយសារតែការប្រកាសព័ត៌មានរបស់សាលាដំបូងបញ្ជាក់ច្បាស់ហើយ យើងក៏មានការភ័ន្តច្រឡំទាំងអស់គ្នា ហើយវាធ្វើឱ្យការធ្វើការរបស់តុលាការហាក់ដូចជាមិនមានអ្វីច្បាស់លាស់ទេ ប្រកាសផ្សេង ពេលអនុវត្តផ្សេង»។
វីអូឌី មិនអាចសុំការបំភ្លឺពីព្រះរាជអាជ្ញារងអមសាលាដំបូងរាជធានីភ្នំពេញ លោក សឿ ឡង់ឌី បានទេ នៅថ្ងៃនេះ។
នាយករងទទួលបន្ទុកកម្មវិធីឃ្លាំមើលនៃអង្គការលីកាដូ លោក អំ សំអាត មានប្រសាសន៍ថា ការសម្រេចដោះលែងអ្នកទោសផ្សេងៗ ជាពិសេសក្មេងប្រុស កាក់ សុវណ្ណច្ឆ័យ គួរតែដោះលែងមុនថ្ងៃបុណ្យជាតិ១ថ្ងៃ ឬបើចំថ្ងៃសៅរ៍ ឬថ្ងៃអាទិត្យ ត្រូវដោះលែងមុន១ថ្ងៃដែរ ពោលអាចដោះលែងថ្ងៃសុក្រជាដើម ។
យ៉ាងណា មន្ត្រីសង្គមស៊ីវិលរូបនោះលើកទឹកចិត្តដល់សាច់ញាតិឬមេធាវីការពារក្ដីឱ្យក្មេងប្រុស កាក់ សុវណ្ណច្ឆ័យ ត្រូវប្ដឹងទៅសាលាឧទ្ធរណ៍ ដើម្បីទាមទារឱ្យតុលាការទម្លាក់ចោលការចោទប្រកាន់ទាំងស្រុងលើក្មេងប្រុសរូបនោះ ព្រោះសំណុំរឿងនេះពាក់ព័ន្ធនឹងរឿងនយោបាយ និងប៉ះពាល់ដល់សេរីភាពអនីតិជន ជាដើម។
លោកមានប្រសាសន៍ថា៖ «កុមារ កាក់ សុវណ្ណច្ឆ័យ និងមេធាវីគាត់ មានសិទ្ធិប្ដឹងទៅសាលាឧទ្ធរណ៍ ក្នុងការទាមទារឱ្យមានការទម្លាក់ចោលពីបទចោទប្រកាន់ទាំងអស់។ អ៊ីចឹងសាលាឧទ្ធរណ៍គាត់អាចមានសិទ្ធិក្នុងការពិចារណា បើសិនជាទៅលើករណីនេះ បើសិនជាមានបណ្ដឹងឧទ្ធរណ៍ គឺសាលាឧទ្ធរណ៍គួរតែទម្លាក់បទចោទប្រកាន់សម្រាប់គាត់ កុំឱ្យមានការប៉ះពាល់ទៅដល់អនាគតរបស់កុមារ ព្រោះឥលូវគាត់ត្រូវបានដោះលែង តែស្ថិតនៅក្រោមការត្រួតពិនិត្យរបស់តុលាការ បានន័យថា ផ្លាស់ទីលំនៅ ត្រូវជូនដំណឹង ត្រូវសហការជាមួយតុលាការ ហើយបើចង់ចេញក្រៅប្រទេស សុំការអនុញ្ញាត វាជារៀងរឹតត្បិតសេរីភាពហើយ»។
កាលពីថ្ងៃទី១ ខែវិច្ឆិកា តុលាការបានកាត់ទោសក្មេងប្រុស កាក់ សុវណ្ណច្ឆ័យ ដែលជាកូនរបស់អតីតសកម្មជនគណបក្សសង្គ្រោះជាតិ ដាក់ពន្ធនាគារ៨ខែ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ» កាលពីថ្ងៃទី២៥ ខែមិថុនា ឆ្នាំ២០២១។
អ្នកជំនាញសិទ្ធិមនុស្សអង្គការសហប្រជាជាតិ៣រូប បានចេញសេចក្ដីថ្លែងការណ៍ដោយចាត់ទុកថា ការផ្តន្ទាទោសលើអនីតិជនដែលមានបញ្ហាស្មារតីមិនប្រក្រតីដោយជំងឺអូទីហ្សឹមនេះ ថាជារូបភាពដ៏អាក្រក់នៃយុទ្ធនាការជាបន្តបន្ទាប់របស់អាជ្ញាធរ ក្នុងការបំភិតបំភ័យនិងការប្រើប្រាស់ហិង្សាប្រឆាំងនឹងសង្គមស៊ីវិល និងសកម្មជនអតីតបក្សជំទាស់ ព្រមទាំងសមាជិករបស់ក្រុមទាំងនេះ។
អ្នកជំនាញផ្នែកសិទ្ធិមនុស្សបានអំពាវនាវឱ្យរដ្ឋាភិបាលកម្ពុជាបញ្ឈប់ជាបន្ទាន់នូវការប្រើប្រាស់ប្រព័ន្ធតុលាការកាត់ទោសលើអ្នកហ៊ានក្រោកឈរ ដើម្បីសិទ្ធិមនុស្ស និងសេរីភាពបញ្ចេញមតិនៅកម្ពុជា។ តែយ៉ាងណា មន្ត្រីរដ្ឋាភិបាលកម្ពុជាច្រានចោលការលើកឡើងនេះ៕
