ប្រធានក្រុមប្រឹក្សាជំនុំជម្រះសាលាឧទ្ធរណ៍ បានសម្រេចកាត់សេចក្ដីឱ្យអតីតសកម្មជនបក្សប្រឆាំងមួយរូបអនុវត្តទោសនៅពន្ធនាគារចំនួន១០ខែ២០ថ្ងៃ និងព្យួរទោសសាកល្បងចំនួន៣ឆ្នាំ ដោយភ្ជាប់ជាមួយលក្ខខណ្ឌមួយចំនួន។
កាលពីថ្ងៃទី២៨ ខែកក្កដា ឆ្នាំ២០២១ ចៅក្រមសាលាដំបូងរាជធានីភ្នំពេញ បានផ្ដន្ទាទោសអតីតសកម្មជនគណបក្សសង្រ្គោះជាតិ លោក ប៉ែន ច័ន្ទសង្គ្រាម ឱ្យជាប់ពន្ធនាគារ១ឆ្នាំ៦ខែ ក្រោមបទចោទប្រកាន់ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» បន្ទាប់ពីលោកចូលរួមតវ៉ាទាមទារឱ្យដោះលែងលោក រ៉ុង ឈុន និងការផ្ដល់បទសម្ភាសន៍ជាមួយអ្នកសារព័ត៌មានអំពីបញ្ហាព្រំដែន និងបញ្ហាសង្គមមួយចំនួនទៀត។
ដោយមិនសុខចិត្តនឹងការសម្រេចរបស់ចៅក្រមសាលាដំបូងរាជធានីភ្នំពេញ មេធាវីការពារក្ដីឱ្យលោក ប៉ែន ច័ន្ទសង្គ្រាម បានប្ដឹងសាទុក្ខទៅសាលាឧទ្ធរណ៍ កាលពីថ្ងៃទី១១ ខែសីហា ឆ្នាំ២០២១។
ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ លោក សេង ស៊ីវុត្ថា នៅថ្ងៃពុធនេះ បានប្រកាសសាលដីកា ដោយសម្រេចឱ្យអតីតសកម្មជនបក្សសង្រ្គោះជាតិ លោក ប៉ែន ច័ន្ទសង្គ្រាម អនុវត្តទោសក្នុងពន្ធនាគារចំនួន១០ខែ២០ថ្ងៃ ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ប៉ុន្តែត្រូវព្យួរទោសសាកល្បង៣ឆ្នាំ ដោយភ្ជាប់ជាមួយលក្ខខណ្ឌមួយចំនួន ដូចជាពេលផ្លាស់ប្ដូរលំនៅ និងចេញទៅក្រៅប្រទេស ជាដើម ត្រូវជូនដំណឹងទៅតុលាការ។
ប្រាប់អ្នកសារព័ត៌មាន បន្ទាប់ពីស្ដាប់ចៅក្រមប្រកាសសាលដីការួច លោក ប៉ែន ច័ន្ទសង្គ្រាម បានចាត់ទុកការសម្រេចរបស់សាលាឧទ្ធរណ៍នាថ្ងៃនេះថា មិនទាន់ផ្ដល់យុត្តិធម៌ដល់រូបលោកនៅឡើយ ដោយសារលោកមិនបានប្រព្រឹត្តបទល្មើសដូចការចោទប្រកាន់របស់តុលាការឡើយ។
លោកថា៖ «ខ្ញុំគ្រាន់តែជាមនុស្សសាមញ្ញធម្មតា គ្មានឥទ្ធិពលណាទៅញុះញង់គេទេ! គាត់នឹងពិភាក្សាជាមួយមេធាវីទៀត នឹងបណ្ដឹងសាទុក្ខ។ ចាត់ទុកការសម្រេចរបស់សាលាឧទ្ធរណ៍នេះនៅមិនទាន់ផ្ដល់យុត្តិធម៌ទេ»។
មេធាវីការពារក្ដីឱ្យសកម្មជនបក្សប្រឆាំង លោក ប៉ែន ច័ន្ទសង្គ្រាម គឺលោក សំ សុគង់ មានប្រសាសន៍ថា គិតចាប់តាំងពីថ្ងៃដែលសមត្ថកិច្ចចាប់ឃុំខ្លួន មកដល់ថ្ងៃទី១០ ខែវិច្ឆិកានេះ កូនក្ដីរបស់លោកបានជាប់ពន្ធនាគារ១០ខែ១៦ថ្ងៃហើយ ដោយនៅសល់តែ៤ថ្ងៃទៀតកូនក្ដីរបស់លោកនឹងត្រូវដោះលែង។
លោកបន្តថា ទោះបីជាសាលាឧទ្ធរណ៍សម្រេចឱ្យកូនក្ដីអនុវត្តទោសតែ១០ខែ២០ថ្ងៃ ហើយនឹងត្រូវបានដោះលែងឆាប់ៗក៏ពិតមែន ប៉ុន្តែលោកថា ការសម្រេចនេះមិនបានផ្ដល់យុត្តិធម៌ឱ្យកូនក្ដីគាត់នៅឡើយ។
លោកថា៖ «ប៉ុន្តែអ្វីដែលយើងឃើញថា មេធាវីខកចិត្តចំពោះការសម្រេចដាក់លក្ខខណ្ឌទាក់ទងនឹងការផ្ដន្ទាទោស ហើយនិងមានការព្យួរទោសនេះ ដោយសារនៅពេលសវនាការ មេធាវី និងកូនក្ដី បានស្នើសុំឱ្យរួចផុតពីបទចោទប្រកាន់ ដោយសារកូនក្ដីបង្ហាញថា គាត់មិនបានប្រព្រឹត្តបទល្មើសដូចការចោទប្រកាន់»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង ករុណា មានប្រសាសន៍ថា ការចាប់ខ្លួននិងចោទប្រកាន់សកម្មជននយោបាយ អ្នកការពារសិទ្ធិមនុស្ស និងយុវជននាពេលកន្លងមក វាជារឿងនយោបាយច្រើនជាងការអនុវត្តច្បាប់។
លោកចាត់ទុកការកាត់តម្រឹមទោសអ្នកជាប់ឃុំនាពេលថ្មីៗនេះថា គ្រាន់តែជាការបន្ធូរទោសដើម្បីឱ្យពួកគាត់បាននៅក្រៅឃុំតែប៉ុណ្ណោះ ប៉ុន្តែការសម្រេចបែបនេះ លោកថា នៅមិនទាន់ផ្ដល់យុត្តិធម៌សម្រាប់ពួកគាត់ដែលមិនបានធ្វើខុសនោះទេ។
លោកថា៖ «អ្វីដែលយើងឃ្លាំមើល ទាំងសហគមន៍អន្តរជាតិ យើងទទូចឱ្យមានការដោះលែងនិងទម្លាក់ចោលបទចោទប្រកាន់អ្នកទាំងអស់ហ្នឹង ដើម្បីផ្ដល់សិទ្ធិសេរីភាពដល់ពួកគាត់ ឱ្យចូលរួមក្នុងសកម្មភាពផ្នែកនយោបាយរបស់ពួកគាត់ជាដើមតទៅអីអ៊ីចឹងទៅ។ អ៊ីចឹងចំណុចនេះ យើងឃើញថា នៅក្នុងបញ្ហាពាក់ព័ន្ធទៅនឹងសំណុំរឿងនយោបាយ យើងឃើញថា ដល់ពេលមានស្ថានភាពនយោបាយធូរស្រាល យើងតែងតែឃើញមានការលើកលើងទោស មានការទម្លាក់ចោលបទចោទប្រកាន់ និងដោះលែងជាបន្តបន្ទាប់អ៊ីចឹងទៅ។ អ៊ីចឹងវាជារឿងមួយវប្បធម៌ទៅហើយសម្រាប់កម្ពុជា»។
លោក ប៉ែន ច័ន្ទសង្គ្រាម ត្រូវបានតុលាការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» បន្ទាប់ពីលោកចូលរួមតវ៉ាទាមទារឱ្យដោះលែងមេដឹកនាំសហជីព លោក រ៉ុង ឈុន និងបានសម្ភាសជាមួយអ្នកសារព័ត៌មានអំពីបញ្ហាព្រំដែនកម្ពុជា-វៀតណាម និងបញ្ហាសង្គមមួយចំនួនទៀត កាលពីអំឡុងខែសីហា ឆ្នាំ២០២០ នៅខាងមុខផ្សារស៊ីធីម៉ល (City Mall) ដែលស្ថិតនៅជិតសាលាដំបូងរាជធានីភ្នំពេញ៕