ក្មេងប្រុស កាក់ សុវណ្ណច្ឆ័យ ដែលជាកូនអតីតសកម្មជនបក្សសង្គ្រោះជាតិ ត្រូវបានតុលាការសម្រេចដោះលែងចេញពីពន្ធនាគារនៅព្រឹកថ្ងៃពុធនេះ ក្រោយអនុវត្តទោសជាង៤ខែ ខណៈម្តាយកុមារារូបនោះស្នើតុលាការទម្លាក់ចោលបទចោទទាំងអស់ ដោយសារកូនគាត់មានជំងឺអូទីហ្សឹម។
អ្នកស្រី ព្រំ ចាន់ថា ដែលជាម្ដាយបង្កើតរបស់ក្មេងប្រុស កាក់ សុវណ្ណច្ឆ័យ ថ្លែងប្រាប់អ្នកសារព័ត៌មាន ក្រោយពីកូនចេញពីពន្ធនាគារព្រៃស នាព្រឹកថ្ងៃពុធនេះថា ដំបូងគាត់មានអារម្មណ៍រំភើបនិងរីករាយនៅពេលឃើញកូនដើរចេញពីខ្លោងទ្វារច្រកចេញនៃមណ្ឌលអប់រំកែប្រែទី២ ហៅថា «ព្រៃស»។
ប៉ុន្តែក្រោយពេលដែលឃើញកូនរបស់គាត់កើតកន្ទួលរមាស់និងដំបៅពេញជើង រួមទាំងមានអារម្មណ៍ភ្លឹកៗនោះ ធ្វើឱ្យគាត់មានអារម្មណ៍ក្ដុកក្ដួលរហូតស្រក់ទឹកភ្នែក ដោយសារអាណិតកូន។ ករណីនេះ អ្នកស្រីស្នើទៅតុលាការទម្លាក់ចោលការចោទប្រកាន់លើកូនគាត់ កុំឱ្យគាត់រស់នៅក្នុងស្ថានភាពភ័យខ្លាចបន្តទៀត។
អ្នកស្រីស្នើដូច្នេះថា៖ «សូមឱ្យតុលាការទម្លាក់ចោលការចោទចំពោះកូនខ្ញុំទៅ កុំធ្វើទុក្ខបុកម្នេញលើកូនខ្ញុំតទៅមុខទៀត ជាពិសេសកុំគំរាមកំហែងក្រុមគ្រួសារខ្ញុំដល់ណាទៀត នេះរស់នៅក្នុងការភ័យខ្លាចមែនទែន»។
អ្នកស្រីបន្ថែមថា៖ «សរុបទាំងអស់ សុំឱ្យតុលាការទម្លាក់ចោទទាំងអស់ គ្មានការតាមដាន គ្មានការឃ្លាំមើល គឺអត់មានត្រូវជាប់ទោស។ បើសិនក្មេង គេមិនដែលជាប់ទោស៤ខែឬ៥ខែអ៊ីចឹងទេ អត់ត្រូវទេ! នេះកាត់ទោសកូនខ្ញុំដល់៨ខែ អយុត្តិធម៌ខ្លាំងណាស់។ ជាទូទៅ ភ្នែកជាតិនិងអន្តរជាតិ គាត់ដឹងច្បាស់ណាស់អំពើអយុត្តិធម៌សម្រាប់ក្រុមគ្រួសារអ្នកមនសិការទាំងអស់ ជាពិសេសក្រុមគ្រួសារខ្ញុំ»។
ចំណែកក្មេងប្រុស កាក់ សុវណ្ណច្ឆ័យ ថ្លែងប្រាក់អ្នកសារព័ត៌មាននៅខ្លោងទ្វារពន្ធនាគារ នាព្រឹកថ្ងៃនេះថា គាត់រស់នៅក្នុងពន្ធនាគារមានការលំបាក និងមានដំបៅរមាស់លើជើង ជាដើម។
អ្វីដែលគួរឱ្យកត់សម្គាល់ ក្មេងប្រុស កាក់ សុវណ្ណច្ឆ័យ ឆ្លើយនឹងទៅកាន់សំណួរអ្នកសារព័ត៌មាន ដោយអារម្មណ៍ភ្លឹកៗ មិននឹងនរ ឆ្លើយទៅមុខទៅក្រោយ ជាដើម។ ករណីនេះ សុវណ្ណច្ឆ័យ សង្ឃឹមថា តុលាការនឹងទម្លាក់ការចោទប្រកាន់លើរូបគាត់ ដើម្បីឱ្យគាត់មានសេរីភាពដូចដើមវិញ។
ក្មេងប្រុសរូបនេះនិយាយថា៖ «និយាយទៅ ខ្ញុំសង្ឃឹមថា នឹងមានអ្វី ឱ្យមានសេរីភាពឡើងវិញ ហើយក៏សង្ឃឹមថានឹងឈានទៅមុខបន្តទៅទៀត»។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មានប្រសាសន៍យ៉ាងខ្លីនៅរសៀលថ្ងៃពុធនេះថា សាលាដំបូងបានសម្រេចសេចក្ដី និងប្រកាសសាលក្រមរួចហើយ។ លោកបន្តថា ករណីម្តាយ កាក់ សុវណ្ណច្ឆ័យ គាត់មិនសុខចិត្តនឹងសាលក្រមនោះ គាត់មានសិទ្ធិប្ដឹងជំទាស់តាមនីតិវិធីច្បាប់ទៅសាលាឧទ្ធរណ៍បន្តទៀតបាន។
យ៉ាងណា មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា យល់ថា តុលាការគួរតែទទួលយកសំណើរបស់ម្ដាយបង្កើត កាក់ សុវណ្ណច្ឆ័យ ដែលស្នើសុំឱ្យតុលាការទម្លាក់បទចោទលើកូនគាត់ទាំងស្រុង ដើម្បីស្ដារនូវប្រព័ន្ធយុត្តិធម៌ឡើងវិញ ខណៈមជ្ឈដ្ឋានជាតិនិងអន្តរជាតិតែងតែរិះគន់ប្រព័ន្ធយុត្តិធម៌នៅកម្ពុជា ដែលថា ការកាត់សេចក្ដីទំនោរទៅនិន្នាការនយោបាយបក្សកាន់អំណាចទៅវិញ។
លោកមានប្រសាសន៍ថា៖ «បើសិនជាមានការសម្រេចតាមការស្នើសុំឱ្យ [ទម្លាក់ចោលបទចោទទាំងអស់] វាអាចជម្រះនូវមន្ទិលសង្ស័យមួយចំនួនដែលគេតែងតែមានមន្ទិលសង្ស័យកន្លងមក ទៅលើប្រព័ន្ធតុលាការកម្ពុជាជាតុលាការដែលមាននិន្នាការនយោបាយ ដោយប្រើប្រាស់ប្រព័ន្ធតុលាការ ដែលធ្វើទុក្ខបុកម្នេញកន្លងមកហ្នឹងឯង។ វាការសម្រេចបន្ធូរបន្ថយនូវការរិះគន់ និងបង្កើននូវជំនឿចិត្តពីប្រជាពលរដ្ឋឡើងវិញផងដែរ»។
សាលាដំបូងរាជធានីភ្នំពេញ កាលពីថ្ងៃទី១ ខែវិច្ឆិកា ឆ្នាំ២០២១ បានកាត់ទោសក្មេងប្រុស កាក់ សុវណ្ណច្ឆ័យ វ័យ១៦ឆ្នាំ ដាក់ពន្ធនាគាររយៈពេល៨ខែ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ»។ ប៉ុន្តែតុលាការបានបង្គាប់ឱ្យអនុវត្តទោសក្នុងពន្ធនាគាររយៈពេល៤ខែនិង១៥ថ្ងៃ ចំណែកទោសដែលនៅសល់ត្រូវព្យួរសាកល្បងរយៈពេល២ឆ្នាំ។
អ្នកជំនាញសិទ្ធិមនុស្សអង្គការសហប្រជាជាតិ ៣រូប បានថ្កោលទោសចំពោះការកាត់ទោសអនីតិជនវ័យ១៦ឆ្នាំរូបនេះ ដោយបានចាត់ទុកថា ការផ្តន្ទាទោសលើអនីតិជនដែលមានបញ្ហាស្មារតីមិនប្រក្រតីដោយជំងឺអូទីហ្សឹមនេះ គឺជារូបភាពដ៏អាក្រក់នៃយុទ្ធនាការជាបន្តបន្ទាប់របស់អាជ្ញាធរ ក្នុងការបំភិតបំភ័យនិងការប្រើប្រាស់ហិង្សាប្រឆាំងនឹងសង្គមស៊ីវិល និងសកម្មជនបក្សជំទាស់ ព្រមទាំងសមាជិករបស់ក្រុមទាំងនេះ។
អ្នកជំនាញផ្នែកសិទ្ធិមនុស្ស បានអំពាវនាវឱ្យរដ្ឋាភិបាលកម្ពុជាបញ្ឈប់ជាបន្ទាន់នូវការប្រើប្រាស់ប្រព័ន្ធតុលាការកាត់ទោសលើអ្នកហ៊ានក្រោកឈរ ដើម្បីសិទ្ធិមនុស្ស និងសេរីភាពបញ្ចេញមតិនៅកម្ពុជា៕