អ្នកសារព័ត៌មានពលរដ្ឋ បង្ហាញការតាំងចិត្តថា នៅតែបន្តធ្វើសេចក្ដីរាយការណ៍ពីបញ្ហាប្រឈមរបស់សហគមន៍ ដើម្បីជំរុញឱ្យមានដំណោះស្រាយប្រកបដោយតម្លាភាព បើទោះបីរងការគំរាមកំហែងពីអាជ្ញាធរក៏ដោយ។
ការអះអាងនេះធ្វើឡើងក្នុងវេទិកាប្រចាំឆ្នាំ ស្ដីពី «ការពង្រឹងកិច្ចសហការកាន់តែជិតស្និទ្ធរវាងពលរដ្ឋអ្នកសារព័ត៌មាន និងអ្នកសារព័ត៌មានអាជីព» ដែលធ្វើឡើងនៅរាជធានីភ្នំពេញ នាថ្ងៃទី១១ ខែវិច្ឆិកានេះ តាមប្រព័ន្ធបណ្ដាញសង្គម ZOOM និងខ្លះទៀតចូលរួមផ្ទាល់ ដែលរៀបចំដោយមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM)។
អ្នកសារព័ត៌មានប្រជាពលរដ្ឋ ជាជនជាតិដើមភាគតិចនៅខេត្តរតនគិរី កញ្ញា រម៉ាម លៀប ឱ្យ វីអូឌី ដឹងតាម ZOOM ថាពួកគេកំពុងជួបការលំបាកក្នុងការរាយការណ៍ព័ត៌មានឱ្យបានគ្រប់ជ្រុងជ្រោយ ពីបញ្ហាប្រឈមរបស់សហគមន៍ ដោយសារអាជ្ញាធរមិនសហការ និងថា សំណួរនោះជារឿងរសើប ខណៈពេលខ្លះ អាជ្ញាធរចោទពួកគេថា ផ្សព្វផ្សាយព័ត៌មានបំផ្លើសពីការពិតជាដើម។
កញ្ញាថា៖ «ខ្ញុំយល់យើញថា ដោយសារយើងជាពលរដ្ឋ ហើយពលរដ្ឋមានបញ្ហា យើងគួរជួយរកដំណោះស្រាយ តាមរយៈការលើកកម្ពស់នូវការបញ្ចេញមតិរបស់ពួកគាត់»។
អ្នកសារព័ត៌មានប្រជាពលរដ្ឋមួយរូបទៀត នៅស្រុកកណ្ដាលស្ទឹង ខេត្តកណ្ដាល លោក ឃាង សុខមាន មានប្រសាសន៍ថា ពេលខ្លះគាត់រងការគំរាមកំហែងពីអាជ្ញាធរ ពេលចុះយកព័ត៌មាននិងផ្តិតយករូបភាពតវ៉ាក្នុងរឿងជម្លោះដីធ្លី។
លោកថា៖ «កាលណាខ្ញុំបោះបង់រឿងហ្នឹង វាធ្វើឱ្យព័ត៌មាននៅក្នុងសហគមន៍ឬក៏បញ្ហានៅក្នុងតំបន់របស់ខ្ញុំ អត់ដឹងទៅដល់ថ្នាក់ដឹកនាំឬក៏អាជ្ញាធរដែលពាក់ព័ន្ធ អ៊ីចឹងមានន័យថា ដំណោះស្រាយវាកាន់តែយឺត។ ជារឿងសំខាន់! ខ្ញុំសុំឱ្យគាត់ [អាជ្ញាធរ] បញ្ឈប់ការគំរាមកំហែង ទាំងពលរដ្ឋសារព័ត៌មាន ទាំងអ្នកសារព័ត៌មាន ព្រោះកាលណាពួកគាត់មានការភ័យខ្លាចអ៊ីចឹង បើព័ត៌មានដែលត្រូវឱ្យសាធារណជននិងថ្នាក់ដឹកនាំដឹង វាត្រូវអត់ដឹង! ដល់អ៊ីចឹងវាខាតប្រយោជន៍ពីណា? វាមិនខាតប្រយោជន៍ជាតិយើង!»
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅ ខេមបូចា លោក ណុប វី ដែលជាវាគ្មិនក្នុងកម្មវិធីនេះ មានប្រសាសន៍ថា ប្រជាពលរដ្ឋអ្នកសារព័ត៌មាន ពេលនេះបានដើរតួនាទីកាន់តែសំខាន់ក្នុងការចូលរួមជំរុញតម្លាភាពសង្គម ខណៈអ្នកសារព័ត៌មានអាជីពមួយចំនួនត្រូវបានគេជួយឱ្យបម្រើការងារនៅស្ថានីយទូរទស្សន៍ឬវិទ្យុដែលមានទំនាក់ទងស្និទ្ធនឹងរដ្ឋាភិបាល។
មួយវិញទៀត លោកមើលឃើញថា សេរីភាពសារព័ត៌មានបានធ្លាក់ចុះមួយកម្រិតទៀតចាប់ពីឆ្នាំ២០១៧មក ដែលការនេះ លោកថា ស្ថាប័នពាក់ព័ន្ធត្រូវចូលរួមលើកកម្ពស់សេរីភាពនេះឡើងវិញ។
លោកថា៖ «អ៊ីចឹងចំណុចនេះ យើងមើលឃើញពីភាពខុសគ្នាអំពីនិន្នាការនៃភាពប្រសើរឡើង ហើយនិងតួនាទីកាន់តែសំខាន់របស់ប្រជាពលរដ្ឋអ្នកសារព័ត៌មាន។ ហើយយើងមើលឃើញថា […] ជាការថយជាងមុននៃអ្នកសារព័ត៌មានដែលមានវិជ្ជាជីវៈ»។
អ្នកសម្របសម្រួលគម្រោងនៃមជ្ឈមណ្ឌលសិទ្ធិមនុស្សកម្ពុជា លោក ហួន ផន ដែលចូលរួមជាវាគ្មិនដែរ យល់ថា ការគំរាមកំហែងសេរីភាពអ្នកសារព័ត៌មាននឹងប៉ះពាល់ដល់ការទទួលបានព័ត៌មានគ្រប់ជ្រុងជ្រោយ និងប៉ះពាល់ដល់ការសម្រេចចិត្តរបស់ពលរដ្ឋ ដែលការនេះ លោកថា គួររួមគ្នាដោះស្រាយ។
យ៉ាងណា អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន លោក អ៊ុក គឹមសេង ដែលចូលរួមក្នុងកម្មវិធីនោះដែរ បានច្រានចោលការលើកឡើងនេះ ដោយថា រដ្ឋាភិបាលបានបង្កើតឱ្យមានអ្នកនាំពាក្យទាំងនៅថ្នាក់ជាតិនិងថ្នាក់ក្រោមជាតិ រួមទាំងមន្ត្រីព័ត៌មានសម្រាប់ធ្វើការជាមួយអ្នកសារព័ត៌មាន។
មួយវិញទៀត បើបញ្ហានេះកើតមានដូចការលើកឡើងពិតមែន លោកថា ទំនងជាសហគមន៍អន្តរជាតិ មិននៅស្ងៀមដូចបច្ចុប្បន្នទេ។
លោកថា៖ «អ៊ីចឹងវាបង្ហាញថា ប្រទេសកម្ពុជាយើងនៅតែអនុវត្ត ដែលគេហៅថា គោលការណ៍ប្រជាធិបតេយ្យសេរីពហុបក្ស បានន័យថា យើងគោរពសិទ្ធិដែលមានចែងក្នុងរដ្ឋធម្មនុញ្ញ»។
ក្រៅពីនេះ លោកថា អ្នកសារព័ត៌មានប្រជាពលរដ្ឋមិនមានស្ថាប័នជាក់លាក់ដូចអ្នកសារព័ត៌មានអាជីពទេ ខណៈបច្ចុប្បន្នជាសម័យបច្ចេកវិទ្យានេះ ដូច្នេះអាចមានបុគ្គលខ្លះក្លែងបន្លំធ្វើជាអ្នកសារព័ត៌មានពលរដ្ឋ ដោយពួកគេគ្រាន់តែបង្ហាញក្រដាសថតចម្លងមួយនោះ។ ករណីនេះ លោកបានជំរុញឱ្យអ្នកសារព័ត៌មានគួរទំនាក់ទំនងជាមួយមន្ទីរព័ត៌មានខេត្ត ដើម្បីបញ្ជាក់ថា ពួកគេពិតជាសមាជិកអ្នកសារព័ត៌មាននៅស្ថាប័នណាមួយនោះ។
យ៉ាងណា លោកមេធាវី សេក សោភ័ណ្ឌ ពន្យល់ថា អ្នកសារព័ត៌មានប្រជាពលរដ្ឋក៏ត្រូវបានការពារដោយច្បាប់ដែរ បើពួកគេជាសមាជិកសហគមន៍ឬជាសមាជិកនៃអង្គការសារព័ត៌មានដែលបានចុះបញ្ជីស្របច្បាប់។ លោកបន្តថា អ្នកសារព័ត៌មានប្រជាពលរដ្ឋ មានភាពដូចគ្នាទៅនឹងអ្នកសារព័ត៌មានអាជីពដែរ ប្រសិនបើពួកគេរាយការណ៍ខុស អាចឱ្យពួកគេផ្សាយកែតម្រូវ ដោយមិនគួរមានការបកស្រាយណាមួយផ្សេងពីនេះ ហើយមិនសហការផ្ដល់ព័ត៌មានដល់ពួកគាត់នោះទេ។
បើតាមអ្នកសម្របសម្រួលគម្រោង មកដល់ពេលនេះ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) មានសមាជិកអ្នកសារព័ត៌មានប្រជាពលរដ្ឋចំនួន៤០០នាក់ នៅក្នុង២៤រាជធានី-ខេត្ត៕