លោកនាយករដ្ឋមន្ត្រី ហ៊ុន សែន បញ្ជាទៅរដ្ឋមន្ត្រីក្រសួងព័ត៌មាន ពង្រឹងវិជ្ជាជីវៈអ្នកសារព័ត៌មានអនឡាញ ក្រោយពីមានការរិះគន់ឥរិយាបថលោក សុវណ្ណ រិទ្ធី ចាងហ្វាងសារព័ត៌មាន TVFB ដែលបានស្ដីបន្ទោសអ្នកជួយលើកម៉ូតូជនរងគ្រោះក្នុងគ្រោះថ្នាក់ចរាចរណ៍មួយនៅលើស្ពានជ្រោយចង្វារ កាលពីពេលថ្មីៗនេះ។
នៅដើមសប្ដាហ៍នេះ មានគ្រោះថ្នាក់ចរាចរណ៍មួយបានកើតឡើងនៅលើស្ពានជ្រោយចង្វារ ដោយម៉ូតូមួយគ្រឿងជិះគ្នាពីរនាក់ ទៅបុកម៉ូតូកង់៣ ដែលធ្វើដំណើរស្របទិសគ្នា។
គ្រោះថ្នាក់នេះបណ្ដាលឱ្យអ្នកបើកបរម៉ូតូម្នាក់សន្លប់ ដោយឡែកបុរសម្នាក់ដែលឃើញហេតុការណ៍បានឈប់ម៉ូតូ ទម្លាក់កូននិងប្រពន្ធចុះ ហើយស្ទុះទៅលើកម៉ូតូជនរងគ្រោះចេញពីគន្លងផ្លូវដែលកំពុងមានចរាចរណ៍ឆ្លងកាត់។
ប៉ុន្តែក្នុងហេតុការណ៍នោះ ក្រុមលោក សុវណ្ណ រិទ្ធី ដែលចុះផ្សាយផ្ទាល់ បានស្តីបន្ទោសបុរសនោះថា ការលើកម៉ូតូជនរងគ្រោះចេញពីកន្លែងកើតហេតុ ខណៈមន្ត្រីជំនាញមិនទាន់វាស់វែងជាទង្វើខុសច្បាប់ ព្រោះធ្វើឱ្យបាត់ដាននៅកន្លែងកើតហេតុ បង្កជាផលលំបាកដល់មន្ត្រីជំនាញក្នុងការវាស់វែង សម្រាប់ធ្វើកំណត់ហេតុ ដើម្បីផ្តល់យុត្តិធម៌ដល់ភាគីពាក់ព័ន្ធ។
ជាការកត់សម្គាល់ បើទោះបីបុរសលើកម៉ូតូជនរងគ្រោះនោះបានលើកដៃសំពះសុំទោសជាច្រើនដងក៏ដោយ តែក្រុមលោក សុវណ្ណ រិទ្ធី នៅតែបន្តស្តីបន្ទោស និងបានចោទសួរថាតើការសុំទោសនោះចេញពីចិត្តពិតប្រាកដឬក៏អត់។
សំឡេងជជែកគ្នា៖ «បងឯងទៅលើកម៉ូតូគាត់ វាខុសច្បាប់! បងឯងយល់ខ្ញុំនិយាយអត់? ប៉ុន្តែបើខ្ញុំខុសច្បាប់ ខ្ញុំសុំទោសបងឯងហើយតើ! […] ខ្ញុំអត់ខ្មាសគេទេ ព្រោះខ្ញុំជួយមនុស្ស»។
ក្នុងពិធីចែកសញ្ញាបត្រនៅសាកលវិទ្យាល័យមួយក្នុងរាជធានីភ្នំពេញ នាព្រឹកថ្ងៃព្រហស្បតិ៍នេះ លោកនាយករដ្ឋមន្ត្រីហាក់បង្ហាញការហួសចិត្តចំពោះឥរិយាបថរបស់ក្រុមអ្នកសារព័ត៌មានដែលបានចុះផ្សាយផ្ទាល់នៅកន្លែងកើតហេតុនេះ ដោយថា អ្នកកាសែតគ្មានសិទ្ធិអីទៅគំរាមកំហែងដូចសកម្មភាពដែលបានកើតឡើងនោះទេ។
លោកគូសបញ្ជាក់ថា អ្នកសារព័ត៌មានមិនមែនជានគរបាលយុត្តិធម៌ទេ ហើយមួយវិញទៀត លោកថា នៅលើស្ពាន រឿងខុសត្រូវទុកនៅពេលក្រោយ តែថារឿងសង្គ្រោះមនុស្ស និងបញ្ចៀសការកកស្ទះលើស្ពាន ជារឿងចាំបាច់មុនគេ ដើម្បីបញ្ចៀសបញ្ហាធ្ងន់ធរនៅលើស្ពាន ដែលបញ្ហានេះ លោកបញ្ជាទៅរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ពង្រឹងវិជ្ជាជីវៈពួកគេឡើងវិញ។
លោកថា៖ «ឥលូវ [រដ្ឋមន្ត្រីក្រសួងព័ត៌មាន លោក ខៀវ] កាញារីទ្ធ ហៅអ្នកអនឡាញទាំងប៉ុន្មានទៅចូលអប់រំ ខុសម្នាក់ឱ្យទៅទទួលបទពិសោធទាំងអស់គ្នា លោកឯងជាមេ […] ត្រូវមើល! តែខ្ញុំសូមស្នើថ្ងៃក្រោយ កុំឱ្យមានរឿងរបៀបហ្នឹងកើតឡើងទៀត»។
លោក ហ៊ុន សែន បន្ថែមថា ករណីនេះក៏មានការរិះគន់ច្រើនពីមន្ត្រី ដែលខ្លះទាមទារឱ្យដកអាជ្ញាបណ្ណអ្នកសារព័ត៌មានអនឡាញរូបនោះ និងខ្លះឱ្យចាត់វិធានការច្បាប់ ប៉ុន្តែលោកថា បញ្ហាត្រូវបិទបញ្ចប់ត្រឹមការអប់រំ។
លោកថា៖ «អ្នកណាដែលធ្វើសកម្មភាពបែបនេះ គួរតែត្រូវពង្រឹង [វិជ្ជាជីវៈ] កុំបណ្ដោយពេក។ កន្លងទៅ យើង[ក្រសួង]បណ្ដោយជ្រុល។ យើងមិនបិទសិទ្ធិទេ ប៉ុន្តែអ្នកត្រូវគោរពសិទ្ធិគេផងបានទេ? […] គ្នាលើកដៃសុំទោស ហើយថាសុំទោសអស់ពីចិត្តអត់! ន៎ែ! វាទៅអញ្ចេះវិញ! ន៎ែ! វាឆ្ងាញ់អាហ្នឹងៗ វាពេកទេដឹង»។
អ្នកនាំពាក្យក្រសួងព័ត៌មាន លោក ផុស សុវណ្ណ អះអាងថា ក្រសួងបានធ្វើកិច្ចការនេះជាបន្តបន្ទាប់ ទាំងការងារអប់រំ និងវគ្គបណ្តុះបណ្តាល ហើយថានឹងបន្តធ្វើទៀតនៅខែក្រោយ បន្ទាប់ពីទទួលបានអនុសាសន៍ពីប្រមុខរដ្ឋាភិបាល។
លោកថា៖ «យើងនឹងគ្រោងធ្វើទៀតនៅឆ្នាំ២០២៣នេះ ថាអាចនឹងជាវគ្គបណ្តុះបណ្តាលមួយទំហំតូចៗដែលអាចម្តងពី ៥០នាក់ ទៅ ១០០នាក់ នឹងចាប់ផ្តើមពីខែកុម្ភៈ ឆ្នាំ២០២៣នេះ»។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា (CamboJa) លោក ណុប វី យល់ថា ការហៅអ្នកសារព័ត៌មានដោយស្ថាប័នរដ្ឋាភិបាល ទោះក្នុងន័យអប់រំ ឬណែនាំ ជាការព្រួយបារម្ភរបស់អ្នកសារព័ត៌មាន បើទោះបីជាអ្នកសារព័ត៌មាននោះ បានប្រព្រឹត្តឥរិយាបថឆ្គាំឆ្គងក្ដី។ លោកថា ការហៅអ្នកសារព័ត៌មានទៅអប់រំ ឬណែនាំដោយសមត្ថកិច្ចរបស់រដ្ឋាភិបាល នឹងធ្វើឱ្យប៉ះពាល់ដល់សេរីភាពអ្នកសារព័ត៌មាន។
លោកថា៖ «ការពង្រឹងក្រមសីលធម៌ យើងគួរតែបន្តធ្វើតាមរយៈការរៀបចំឱ្យមានយន្តការឯករាជ្យមួយដែលបង្កើតឡើងដោយអ្នកសារព័ត៌មាន ហើយអ្នកសារព័ត៌មានខ្លួនឯងហ្នឹង គឺជាអ្នកត្រួតពិនិត្យតាមដានចំពោះការអនុវត្តក្រមសីលធម៌នេះ»។
ជុំវិញបញ្ហានេះ លោក ខៀវ កាញារីទ្ធ ធ្លាប់លើកឡើងក្នុងពិធីបើកសិក្ខាសាលាស្ដីពី «ការអនុវត្តវិជ្ជាជីវៈនិងសេរីភាពសារព័ត៌មាន ក្នុងក្របខណ្ឌច្បាប់នៃព្រះរាជាណាចក្រកម្ពុជា» កាលពីថ្ងៃទី១៦ ខែវិច្ឆិកា ឆ្នាំ២០២១ ថា អ្នកសារព័ត៌មាននៅកម្ពុជាប្រមាណជា ៨០ភាគរយ មិនបានរៀនវិជ្ជាជីវៈអ្នកសារព័ត៌មាន និងឈ្វេងយល់ទៅលើច្បាប់ស្ដីពីរបបសារព័ត៌មាន និងច្បាប់ព្រហ្មទណ្ឌទេ ដោយពួកគេចាប់ផ្ដើមប្រកបអាជីពនេះតែម្តង។
លោក សុវណ្ណ រិទ្ធី អ្នករាយការណ៍ព័ត៌មានអនឡាញ ធ្លាប់ជាប់ពន្ធនាគារកាលពីឆ្នាំ២០២០ ដោយតុលាការចោទពីបទ ញុះញង់ ក្រោយពីលោកបានដកស្រង់សម្តីលោកនាយករដ្ឋមន្ត្រី ហ៊ុន សែន ដែលថ្លែងអំឡុងកម្ពុជាជួបវិបត្តិកូវីដ-១៩ ថា «បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ»។
បទចោទនេះធ្វើឱ្យលោក រិទ្ធី ជាប់ពន្ធនាគារប្រមាណជា៦ខែ ក្នុងចំណោមទោស១៨ខែ ក្រោយពីតុលាការផ្តន្ទាទោសដោយកាត់តម្រឹម ក្រោយពីលោកត្រូវបានចាប់ខ្លួននៅថ្ងៃទី៧ ខែមេសា ឆ្នាំ២០២០៕