រដ្ឋាភិបាលបានសម្រេចកាត់ផ្ទៃដីបឹងតាមោកជាង១៥០ហិកតា ប្រគល់ឱ្យក្រសួងសុខាភិបាល និងសាលារាជធានីភ្នំពេញ ដើម្បីធ្វើជាកម្មសិទ្ធិបន្ថែមទៀត ប៉ុន្តែមិនបានបញ្ជាក់ច្បាស់លាស់ថានឹងត្រូវយកទៅសាងសង់អ្វីប្រាកដនោះឡើយ។
ក្នុងអនុក្រឹត្យចុះថ្ងៃទី២៧ ខែកញ្ញា ឆ្នាំ២០២១ ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន បានសម្រេចកាត់ផ្ទៃដីបឹងតាមោកចំនួន៥៥ហិកតា ស្ថិតនៅសង្កាត់គោករកា ខណ្ឌព្រែកព្នៅ ប្រគល់ទៅឱ្យរដ្ឋបាលរាជធានីភ្នំពេញ ដើម្បីធ្វើជាកម្មសិទ្ធិចាប់ពីថ្ងៃចុះហត្ថលេខាតទៅ។
ចំណែកអនុក្រឹត្យមួយទៀត លោកនាយករដ្ឋមន្ត្រី ហ៊ុន សែន បានសម្រេចកាត់ផ្ទៃដីបឹងតាមោកចំនួន១០០ហិកតា ស្ថិតនៅសង្កាត់គោករកា ខណ្ឌព្រែកព្នៅ ប្រគល់ទៅឱ្យក្រសួងសុខាភិបាល ដើម្បីធ្វើជាកម្មសិទ្ធិ ចាប់ពីថ្ងៃទី២៧ ខែកញ្ញា ឆ្នាំ២០២១តទៅ។
ទាក់ទងរឿងនេះ វីអូឌី មិនអាចសុំការឆ្លើយតបពីអភិបាលសាលារាជធានីភ្នំពេញ លោក ឃួង ស្រេង និងអ្នកនាំពាក្យក្រសួងសុខាភិបាល លោក លី សុវណ្ណ និងលោកស្រី ឱ វណ្ណឌីន បានទេ នៅថ្ងៃទី១១ ខែវិច្ឆិកានេះ។
យ៉ាងណា ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន មានប្រសាសន៍ថា ការកាត់ផ្ទៃបឹងតាមោកប្រគល់ទៅឱ្យក្រសួងសុខាភិបាល ដើម្បីឱ្យស្ថាប័នមួយនេះយកទៅបម្រើផលប្រយោជន៍របស់ក្រសួង។
លោកថា៖ «អាហ្នឹងយកទៅធ្វើផលប្រយោជន៍របស់ក្រសួង បែរជាយកទៅសង់អគារ ដើម្បីផលប្រយោជន៍ក្រសួង អាហ្នឹងអ៊ីចឹង»។
បឹងតាមោក មានផ្ទៃដីសរុប៣ ២៣៩ហិកតា ជាអាងស្តុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងនេះត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់បឹងធម្មជាតិមួយនេះជាសម្បតិ្តសាធារណៈរបស់រដ្ឋ។
ប៉ុន្តែយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ខែចុងខែកញ្ញា ឆ្នាំ២០២១ ផ្ទៃបឹងតាមោកជាង១ ០០០ហិកតាហើយត្រូវបានរដ្ឋាភិបាលកាត់និងដោះដូរទៅឱ្យស្ថាប័នរដ្ឋ និងក្រុមហ៊ុនឯកជន ទៅឱ្យបុគ្គលឯកជន ដែលគេដឹងថាជាអ្នកមានប្រាក់និងមានអំណាច សម្រាប់សាងសង់អគារនិងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួនផងដែរ។
ប្រធានមជ្ឈមណ្ឌលប្រជាពលរដ្ឋ ដើម្បីការអភិវឌ្ឍ និងសន្តិភាព លោក យង់ គិមអេង បង្ហាញការសោកស្ដាយដែលផ្ទៃបឹងតាមោកត្រូវកាត់ជាបន្តបន្ទាប់។ លោកបន្តថា ការកាត់ផ្ទៃបឹងតាមោកដែលជាបឹងធម្មជាតិ អាចនឹងធ្វើឱ្យរាជធានីភ្នំពេញប្រឈមនឹងការជន់លិចដោយសារជំនន់ទឹកភ្លៀងនាពេលខាងមុខ ខណៈបឹងធម្មជាតិធំៗនៅជុំវិញត្រូវបានលុបអស់ ដើម្បីសាងសង់អគារនិងស្ថាប័នរដ្ឋជាដើម។
លោកថា៖ «ចង់ឃើញមានដំណោះស្រាយនិងការពន្យល់អំពីមូលហេតុផ្សេងៗសម្រាប់ប្រជាពលរដ្ឋ ឱ្យបានយល់ដឹងអំពីដំណោះស្រាយផ្សេងទៀតដែលអាចមាន ឬជម្រើសផ្សេងទៀតដែលរដ្ឋាភិបាលអាចមាន។ បឹងតាមោក មិនសំខាន់យ៉ាងម៉េច? មានអីសំខាន់ជាងហ្នឹង? ដែលអាចបញ្ចៀសការលិចលង់ដល់រាជធានីភ្នំពេញ និងជួយទប់ទឹកជាហូរហែអ៊ីចឹង។ អ៊ីចឹងទាំងអស់ហ្នឹងដែលយើងចង់ដឹងនិងចង់ឮ»។
កាលពីថ្ងៃទី៨ ខែវិច្ឆិកា ឆ្នាំ២០២១ លោកនាយករដ្ឋមន្ត្រី ហ៊ុន សែន បានថ្លែងថា បញ្ហាទឹកជំនន់ ដែលបង្កឱ្យលិចរាជធានីភ្នំពេញ មិនមែនបណ្ដាលមកពីការលុបបឹងធម្មជាតិនោះទេ ដោយថា កន្លងមក ទោះបីជាមិនលុបបឹង រាជធានីភ្នំពេញក៏មានទឹកជំនន់ដែរ ដែលករណីនេះ លោកថា គួរតែឈប់រិះគន់ពីបញ្ហានេះ។
ប៉ុន្តែកាលពីខែឧសភា ឆ្នាំ២០២០ រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ បានចេញលិខិតមួយដោយព្រមានអំពីគ្រោះមហន្តរាយដោយសារទឹកជំនន់ ក្រោយពីក្រសួងមើលឃើញថាមានការចាក់ដីលុបនិងការសាងសង់សំណង់ផ្សេងៗបិទផ្លូវទឹកនានាជាបន្តបន្ទាប់។
ទោះបីជាមានលិខិតព្រមានរបស់ក្រសួងយ៉ាងនេះក៏ដោយ ប៉ុន្តែសេចក្ដីព្រមាននោះត្រូវបានគេមើលឃើញថាមិនមានប្រសិទ្ធភាពឡើយ ត្បិតការចាក់ដីលុបបិទផ្លូវទឹក ការរំលោភច្រាំងទន្លេ អូរ ប្រឡាយ និងបឹងធម្មជាតិនានា នៅតែបន្តកើតមានឡើងឥតស្រាកស្រាន្ត៕
