មនុស្ស៧នាក់បានស្លាប់ និងជាង១០នាក់ទៀតកំពុងជួយសង្គ្រោះនៅតាមមន្ទីរពេទ្យ ក្រោយពួកគេយកអាល់កុលលាយជាមួយទឹកភេសជ្ជៈផឹក នៅក្នុងមណ្ឌលធ្វើចត្តាឡីស័កមួយកន្លែង ស្ថិតក្នុងក្រុងប៉ោយប៉ែត ខេត្តបន្ទាយមានជ័យ។
អភិបាលក្រុងប៉ោយប៉ែត លោក គាត ហ៊ុល ប្រាប់ វីអូឌី នៅថ្ងៃសុក្រនេះថា អ្នកដែលស្លាប់និងជនរងគ្រោះ ជាពលករខ្មែរដែលបានជាប់ធ្វើចត្តាឡីស័កនៅមណ្ឌលចត្តាឡីស័កកូបធំ ស្ថិតនៅក្រុងប៉ោយប៉ែត។ លោកបន្តថា កាលពីថ្ងៃទី១១ ខែវិច្ឆិកានេះ ពលករខ្មែរដែលចូលមកធ្វើចត្តាឡីស័ក បានយកទឹកអាល់កុលលាយជាមួយទឹកភេជ្ជៈផឹក ដោយបណ្ដាលឱ្យពុលចំនួន២៣នាក់ ក្នុងនោះ ស្លាប់៧នាក់ (៣នាក់ស្លាប់នៅនឹងកន្លែង) គិតត្រឹមម៉ោង១១ព្រឹកថ្ងៃសុក្រនេះ។
លោក គាត ហ៊ុល បន្តថា ក្រោយកើតហេតុ អ្នកដែលពុលត្រូវបានបញ្ជូនទៅសង្គ្រោះនៅមន្ទីរពេទ្យបង្អែកក្រុងប៉ោយប៉ែត មន្ទីរពេទ្យបង្អែកស្រុកមង្គលបុរី និងមួយចំនួនទៀតបញ្ជូនទៅសង្គ្រោះនៅមន្ទីរពេទ្យខេត្តសៀមរាប។
លោកបន្ថែមថា៖ «អ្នកដែលពុលទាំងអស់មាន២៣នាក់ និងអ្នកស្លាប់៧នាក់ហើយ រហូតមកដល់ម៉ោងនេះ។ នេះជាព័ត៌មានបឋមដែលយើងទើបទទួលបាន បើមានថ្មី យើងនឹងផ្ដល់បន្ថែមទៀតពេលក្រោយទៀត»។
កាលពីខែឧសភា និងខែមិថុនា ឆ្នាំ២០២១ ពលរដ្ឋនៅស្រុកក្រគរ ខេត្តពោធិ៍សាត់ ចំនួន៧នាក់បានស្លាប់ និងមួយចំនួនទៀតបញ្ជូនទៅសង្គ្រោះ ដោយសារពុលស្រាស ខណៈពលរដ្ឋ២៣នាក់រស់នៅស្រុកល្វាឯម ខេត្តកណ្ដាល និងស្រុកកំពង់ត្រាច ខេត្តកំពត ក៏បានស្លាប់ផងដែរ ដោយសារពុលស្រាសដែលមានលាយជាតិមេតាណុលខ្ពស់៕