សកម្មជនសង្គមម្នាក់ទៀត កញ្ញា ឈឿន ដារ៉ាវី ត្រូវបានដោះលែងចេញពីពន្ធនាគាររាជធានីភ្នំពេញ (PJ) កាលពីវេលាម៉ោងជាង៣រសៀល ថ្ងៃទី១២ ខែវិច្ឆិកា ឆ្នាំ២០២១នេះ។
កញ្ញា ឈឿន ដារ៉ាវី យុវជនខ្មែរថាវរៈ ត្រូវបានតុលាការក្រុងភ្នំពេញកាត់ទោសកាលពីថ្ងៃទី២៦ ខែតុលា ឆ្នាំ២០២១ ឱ្យជាប់ពន្ធនាគារចំនួន២០ខែ និងពិន័យជាប្រាក់ចំនួន២លានរៀល (២ ០០០ ០០០រៀល) ពីបទ «ញុះញង់» តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា។ ប៉ុន្តែតុលាការបានបង្គាប់ឱ្យអនុវត្តទោសចំនួន១៥ខែ ខណៈទោសដែលនៅសល់ត្រូវបានព្យួរសាកល្បងរយៈពេល២ឆ្នាំ។
ម្ដាយរបស់កញ្ញា ឈឿន ដារ៉ាវី គឺអ្នកស្រី ថាច់ ធីតា បានប្រាប់ វីអូឌី ថាអ្នកស្រីសប្បាយចិត្តជាខ្លាំងនៅពេលបានជួបមុខកូនស្រីឡើងវិញ និងបន្ទាប់ពីទន្ទឹងរង់ចាំការដោះលែងកូនស្រីអស់រយៈពេល១៥ខែមកនេះ។
អ្នកស្រីបន្តថា បន្ទាប់ពីរង់ចាំការដោះលែងកូនស្រីពីពន្ធនាគាររាជធានីភ្នំពេញរួចហើយ អ្នកស្រី រួមជាមួយកូនស្រី នឹងធ្វើដំណើរទៅកាន់ពន្ធនាគារព្រៃស ដើម្បីរង់ចាំស្វាគមន៍ការដោះលែងលោក រ៉ុង ឈុន និងសកម្មជនសង្គម និងសកម្មជននយោបាយមួយចំនួនទៀត បន្ទាប់ពីអ្នកស្រីបានទទួលដំណឹងថា ពួកគេនឹងត្រូវដោះលែងនៅល្ងាចនេះ។
គួរជម្រាបជូនថា នៅព្រឹកមិញនេះ មន្ត្រីពន្ធនាគារក៏បានដោះលែងយុវជនខ្មែរថាវរៈម្នាក់ គឺលោក ហ៊ុន វណ្ណៈ និងសកម្មជនអតីតគណបក្សសង្គ្រោះជាតិ លោក ប៉ែន ច័ន្ទសង្គ្រាម ពីពន្ធនាគារព្រៃសផងដែរ៕