អាជ្ញាធរកម្ពុជាបានដោះលែងលោក រ៉ុង ឈុន អ្នកឃ្លាំមើលព្រំដែនកម្ពុជា និងលោក សួង សុភ័ណ្ឌ ប្រធានគណបក្សខ្មែរឈ្នះ រួមជាមួយសកម្មជនសង្គម កញ្ញា ស កណិកា និងលោក តុន និមល ចេញពីពន្ធនាគារព្រៃសហើយ នៅល្ងាចថ្ងៃទី១២ ខែវិច្ឆិកា ឆ្នាំ២០២១នេះ។
លោក រ៉ុង ឈុន និងសកម្មជនសង្គម២នាក់ទៀត គឺកញ្ញា ស កណិកា និងលោក តុន និមល ត្រូវបានចៅក្រមសាលាឧទ្ធរណ៍ លោក យន់ ណារ៉ុង កាត់តម្រឹមទោសឱ្យអនុវត្តទោសក្នុងពន្ធនាគារម្នាក់ៗជាង១ឆ្នាំ ខណៈទោសដែលនៅសល់ត្រូវបានព្យួរសាកល្បងក្នុងរយៈពេល៣ឆ្នាំ។
តាមសេចក្ដីប្រកាសរបស់ចៅក្រមសាលាឧទ្ធរណ៍ លោក យន់ ណារ៉ុង បានបង្គាប់ឱ្យលោក រ៉ុង ឈុន អ្នកឃ្លាំមើលព្រំដែននិងជាប្រធានសហជីព ឱ្យអនុវត្តទោសជាប់ពន្ធនាគារចំនួន១ឆ្នាំ៣ខែនិង១១ថ្ងៃ ក្នុងចំណោមទោស២៤ខែ ខណៈសកម្មជនសង្គម កញ្ញា ស កណិកា ឱ្យអនុវត្តទោសក្នុងពន្ធនាគារ១ឆ្នាំ៣ខែនិង៥ថ្ងៃ ក្នុងចំណោមទោស២០ខែ ខណៈលោក តុន និមល ឱ្យអនុវត្តទោសក្នុងពន្ធនាគារចំនួន១ឆ្នាំ២ខែនិង២៤ថ្ងៃ ក្នុងចំណោមទោស២០ខែ។ ចំណែកទោសដែលនៅសល់ ត្រូវបានព្យួរសាកល្បងក្នុងរយៈពេល៣ឆ្នាំ។ ពួកគេត្រូវបានដោះលែងចេញពីពន្ធនាគារជាបន្តបន្ទាប់នៅថ្ងៃនេះ។
ក្រៅពីលោក រ៉ុង ឈុន អាជ្ញាធរកម្ពុជាក៏បានដោះលែងប្រធានគណបក្សខ្មែរឈ្នះ លោក សួង សុភ័ណ្ឌ កញ្ញា ស កណិកា និងលោក តុន និមល ផងដែរ។ លោក សួង សុភណ្ឌ ត្រូវបានចៅក្រមសាលាឧទ្ធរណ៍សម្រេចព្យួរទោសនៅថ្ងៃនេះ ដោយកាត់បន្ថយទោសជាប់ពន្ធនាគារពី២០ខែ មកនៅត្រឹម១៤ខែនិង២៧ថ្ងៃវិញ ហើយទោសដែលនៅសល់ត្រូវបានព្យួរ។
នៅមុននេះ មន្ត្រីពន្ធនាគារក៏បានដោះលែងយុវជនខ្មែរថាវរៈ កញ្ញា ឈឿន ដារ៉ាវី និងលោក ហ៊ុន វណ្ណៈ រួមទាំងសកម្មជនអតីតគណបក្សសង្គ្រោះជាតិ លោក ប៉ែន ច័ន្ទសង្គ្រាម ផងដែរ៕
