ចៅក្រមសាលាឧទ្ធរណ៍ នៅព្រឹកមិញនេះ បានកាត់តម្រឹមទោសលោក រ៉ុង ឈុន និងសកម្មជនសង្គម២នាក់ទៀត ឱ្យអនុវត្តទោសក្នុងពន្ធនាគារម្នាក់ៗជាង១ឆ្នាំ ខណៈទោសដែលនៅសល់ត្រូវបានព្យួរសាកល្បងក្នុងរយៈពេល៣ឆ្នាំ។
ចៅក្រមសាលាឧទ្ធរណ៍ លោក យន់ ណារ៉ុង បានប្រកាសសាលក្រមនៅថ្ងៃទី១២ ខែវិច្ឆិកានេះ បង្គាប់ឱ្យលោក រ៉ុង ឈុន អ្នកឃ្លាំមើលព្រំដែននិងជាប្រធានសហជីព ឱ្យអនុវត្តទោសជាប់ពន្ធនាគារចំនួន ១ឆ្នាំ ៣ខែ និង១១ថ្ងៃ ខណៈសកម្មជនសង្គម កញ្ញា ស កណិកា ឱ្យអនុវត្តទោសក្នុងពន្ធនាគារ ១ឆ្នាំ ៣ខែ និង៥ថ្ងៃ ខណៈលោក តុន និមល អនុវត្តទោសក្នុងពន្ធនាគារចំនួន ១ឆ្នាំ ២ខែ និង២៤ថ្ងៃ។ ចំណែកទោសដែលនៅសល់ ត្រូវបានព្យួរសាកល្បងក្នុងរយៈពេល៣ឆ្នាំ។
ចំណែកប្រាក់ពិន័យម្នាក់ៗចំនួន២លានរៀល និងប្រាក់សំណងរួមគ្នាដល់ដើមបណ្ដឹងរដ្ឋប្បវេណី ចំនួន៤០០លានរៀល ឬប្រហែល១០ម៉ឺនដុល្លារអាមេរិក តុលាការនៅរក្សាទុកដដែល។
តុលាការក្រុងភ្នំពេញ កាលពីថ្ងៃទី១៨ ខែសីហា ឆ្នាំ២០២១ បានកាត់ទោសលោក រ៉ុង ឈុន ឱ្យជាប់ពន្ធនាគារ២ឆ្នាំ ពីបទ «ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» បន្ទាប់ពីលោកបានចុះទៅពិនិត្យព្រំដែនកម្ពុជា-វៀតណាម នៅខេត្តត្បូងឃ្មុំ តាមបណ្ដឹងរបស់ប្រជាពលរដ្ឋ។
ចំណែកសកម្មជន២នាក់ទៀត កញ្ញា ស កណិកា និងលោក តុន និមល ត្រូវបានតុលាការកាត់ទោសឱ្យជាប់ពន្ធនាគារម្នាក់ៗចំនួន២០ខែ ពីបទ «ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដូចគ្នា បន្ទាប់ពីពួកគេបានចូលរួមតវ៉ាទាមទារឱ្យដោះលែងលោក រ៉ុង ឈុន។ ជាមួយគ្នានេះ តុលាការបានពិន័យប្រាក់អ្នកទាំង៣ ក្នុងម្នាក់ៗចំនួន២លានរៀល និងបង្គាប់ឱ្យបង់សំណងរួមគ្នាដល់ដើមបណ្ដឹងរដ្ឋប្បវេណី គឺគណៈកម្មាធិការចម្រុះកិច្ចការព្រំដែន ជាទឹកប្រាក់ចំនួន៤០០លានរៀល ឬប្រហែល១០ម៉ឺនដុល្លារអាមេរិក។
បើគិតពីថ្ងៃចាប់ខ្លួន សកម្មជនព្រំដែន និងសង្គមទាំង៣នាក់ អាចនឹងត្រូវតុលាការដោះលែងឆាប់ៗនេះ៕
