ចៅក្រមសាលាឧទ្ធរណ៍ នៅថ្ងៃនេះ បានសម្រេចព្យួរទោសប្រធានគណបក្សខ្មែរឈ្នះ លោក សួង សុភ័ណ្ឌ ដោយកាត់បន្ថយទោសជាប់ពន្ធនាគារពី២០ខែ មកនៅត្រឹម១៤ខែនិង២៧ថ្ងៃវិញ ហើយទោសដែលនៅសល់ត្រូវបានព្យួរ ខណៈសំណុំរឿងស្ថាបនិកក្រុមចលនាមាតាធម្មជាតិ ត្រូវសាលាឧទ្ធរណ៍តម្កល់សេចក្ដីសម្រេចរបស់សាលាដំបូងឱ្យនៅដដែល។
ប្រធានគណបក្សខ្មែរឈ្នះ លោក សួង សុភ័ណ្ឌ ត្រូវបានសាលាដំបូងរាជធានីភ្នំពេញកាត់ទោសកាលពីថ្ងៃទី១០ ខែកុម្ភៈ ឆ្នាំ២០២១ ឱ្យជាប់ពន្ធនាគារ២០ខែ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
នៅថ្ងៃនេះដែរ ចៅក្រមសាលាឧទ្ធរណ៍បានសម្រេចតម្កល់ទោសស្ថាបនិកក្រុមចលនាមាតាធម្មជាតិ លោក អាឡិចហ្សង់ដ្រូ ហ្គន់ហ្សាឡេស-ដាវិតសុន (Alejandro Gonzalez-Davidson) របស់សាលាដំបូងរាជធានីភ្នំពេញ ទុកជាបានការដដែល។
ស្ថាបនិកក្រុមចលនាមាតាធម្មជាតិ លោក អាឡិចហ្សង់ដ្រូ ហ្គន់ហ្សាឡេស-ដាវិតសុន ត្រូវបានសាលាដំបូងរាជធានីភ្នំពេញ កាត់ទោសកំបាំងមុខ កាលពីថ្ងៃទី៥ ខែឧសភា ឆ្នាំ២០២១ ឱ្យជាប់ពន្ធនាគាររយៈពេល២០ខែ និងពិន័យជាប្រាក់ចំនួន៤លានរៀល ពីបទ «ញុះញង់» តែត្រូវប្តូរទៅជាបទ «សមគំនិត» វិញ។
សាលាឧទ្ធរណ៍ បានបើកសវនាការលើបណ្ដឹងសាទុក្ខរបស់មេធាវីការពារក្ដីលោក អាឡិច កាលពីថ្ងែទី៣ ខែវិច្ឆិកា ឆ្នាំ២០២១។ ក្នុងអំឡុងពេលសវនាការកំបាំងមុខនៃសាលាឧទ្ធរណ៍ មេធាវីការពារក្ដីឱ្យ លោក អាឡិច បានស្នើសុំឱ្យតុលាការពិចារណាពិនិត្យលើអង្គហេតុនិងភស្ដុតាងដែលប្រឆាំងនឹងកូនក្ដីរបស់លោកឡើងវិញ ដោយសង្កត់ធ្ងន់ថា មិនមានភស្ដុតាងគ្រប់គ្រាន់ដើម្បីផ្ដន្ទាទោសលោក អាឡិច នោះឡើយ៕
