សកម្មជនសង្គមនិងសកម្មជននយោបាយចំនួន២នាក់ទៀត គឺលោក ហ៊ុន វណ្ណៈ និងលោក ប៉ែន ច័ន្ទសង្គ្រាម ត្រូវបានមន្ត្រីពន្ធនាគារ (ម២) ដោះលែងចេញពីពន្ធនាគារ នៅវេលាម៉ោង១១និង៣០នាទីព្រឹក ថ្ងៃទី១២ ខែវិច្ឆិកានេះ។
យុវជនខ្មែរថាវរៈ លោក ហ៊ុន វណ្ណៈ ត្រូវបានដោះលែងបន្ទាប់ពីអនុវត្តទោសជាប់ពន្ធនាគាររយៈពេល១៥ខែ ក្នុងចំណោមទោស២០ខែ ខណៈលោក ប៉ែន ច័ន្ទសង្គ្រាម សកម្មជនអតីតគណបក្សសង្គ្រោះជាតិ ត្រូវបានដោះលែងបន្ទាប់ពីអនុវត្តទោសជាប់ពន្ធនាគាររយៈពេល១០ខែ និង២០ថ្ងៃ។
ចំណែកយុវជនខ្មែរថាវរៈម្នាក់ទៀត កញ្ញា ឈឿន ដារ៉ាវី ដែលនឹងត្រូវដោះលែងនៅថ្ងៃជាមួយគ្នានេះ នៅមិនទាន់ដោះលែងចេញពីពន្ធនាគាររាជធានីភ្នំពេញ (PJ) នៅឡើយទេ គិតត្រឹមម៉ោង១២ថ្ងៃត្រង់នេះ។
លោកស្រី ថាច់ ធីតា ម្ដាយរបស់កញ្ញា ឈឿន ដារ៉ាវី បានប្រាប់ វីអូឌី ថាលោកស្រីកំពុងទន្ទឹងរង់ចាំការដោះលែងកូនស្រីយ៉ាងអន្ទះសារនៅមុខពន្ធនាគារ (PJ) នៅថ្ងៃនេះ។
តុលាការក្រុងភ្នំពេញ កាលពីថ្ងៃទី២៦ ខែតុលា ឆ្នាំ២០២១ បានសម្រេចផ្ដន្ទាទោសយុវជនខ្មែរថាវរៈ កញ្ញា ឈឿន ដារ៉ាវី និងលោក ហ៊ុន វណ្ណៈ ឱ្យជាប់ពន្ធនាគារចំនួន២០ខែ និងពិន័យជាប្រាក់ម្នាក់ៗចំនួន២លានរៀល (២ ០០០ ០០០រៀល) ពីបទ «ញុះញង់» តាមបញ្ញត្តិមាត្រា ៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា។ ប៉ុន្តែតុលាការបានបង្គាប់ឱ្យអនុវត្តទោសចំនួន១៥ខែ ខណៈទោសដែលនៅសល់ត្រូវបានព្យួរសាកល្បងរយៈពេល២ឆ្នាំ។
ចំណែកលោក ប៉ែន ច័ន្ទសង្គ្រាម ត្រូវបានចៅក្រមសាលាដំបូងរាជធានីភ្នំពេញកាត់ទោសកាលពីថ្ងៃទី២៨ ខែកក្កដា ឆ្នាំ២០២១ ឱ្យជាប់ពន្ធនាគារ១ឆ្នាំ៦ខែ ក្រោមបទចោទប្រកាន់ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» បន្ទាប់ពីលោកចូលរួមតវ៉ាទាមទារឱ្យដោះលែងលោក រ៉ុង ឈុន និងការផ្ដល់បទសម្ភាសជាមួយអ្នកសារព័ត៌មានអំពីបញ្ហាព្រំដែននិងបញ្ហាសង្គមមួយចំនួនទៀត។
ប៉ុន្តែនៅថ្ងៃទី១០ ខែវិច្ឆិកា កន្លងទៅ ចៅក្រមសាលាឧទ្ធរណ៍បានកាត់ទោសតម្រឹមទោសឱ្យលោកអនុវត្តទោសជាប់ពន្ធនាគាររយៈពេល១០ខែ ២០ថ្ងៃ ខណៈទោសដែលនៅសល់ត្រូវបានព្យួរសាកល្បងរយៈពេល៣ឆ្នាំ។
នៅថ្ងៃនេះ ក៏មានដំណឹងពីក្រុមមេធាវីថា តុលាការនឹងដោះលែងលោក រ៉ុង ឈុន, កញ្ញា ស កណិកា និងលោក តុន និមល ផងដែរ បន្ទាប់ពីសាលាឧទ្ធរណ៍បានកាត់តម្រឹមទោសឱ្យជាប់ពន្ធនាគារម្នាក់ៗជាង១ឆ្នាំរួចមក៕
