សាលាដំបូងរាជធានីភ្នំពេញ បានចេញដីកាសម្រចលក់ស្នាក់ការកណ្ដាលរបស់អតីតគណបក្សសង្គ្រោះជាតិ ដែលជាផ្ទះរបស់លោក សម រង្ស៊ី ប្រធានអតីតគណបក្សនេះ នៅសង្កាត់ចាក់អង្រែលើ ក្នុងរាជធានីភ្នំពេញ។
តាមដីកាសម្រេចចាប់ផ្ដើមការលក់ដោយបង្ខំរបស់ចៅក្រមអនុវត្តសាលាដំបូងរាជធានីភ្នំពេញ លោក អ៊ឹម វណ្ណៈ ដែលត្រូវសមត្ថកិច្ចយកទៅបិទនៅមុខស្នាក់ការកណ្ដាលអតីតគណបក្សសង្គ្រោះជាតិ ដែលមានម្ចាស់បំណុលចំនួន៤ផ្សេងៗគ្នា បានលើកឡើងថា ការប្រកាសនេះយោងទៅលើនីតិវិធីមួយចំនួន រួមទាំងបានឃើញសំណុំរឿងអនុត្តវត្តដោយបង្ខំរបស់សាលាដំបូងរាធានីភ្នំពេញ រវាងម្ចាស់បំណុលនៃការអនុវត្តរបស់ប្រធានរដ្ឋសភា លោក ហេង សំរិន, ម្ចាស់បំណុលនៃការអនុវត្តរបស់ លោកនាយករដ្ឋមន្ត្រី ហ៊ុន សែន, ម្ចាស់បំណុលនៃការអនុវត្តរបស់រាជរដ្ឋាភិបាល, ម្ចាស់បំណុលនៃការអនុវត្តរបស់រដ្ឋមន្ត្រីក្រសួងមហាផ្ទៃ លោក ស ខេង និងកូនបំណុលនៃការអនុវត្ត ឈ្មោះ សម រង្ស៊ី និងសហកូនបំណុល លោកស្រី ជូឡុង សូមូរ៉ា។
បើតាមកម្មវត្ថុក្នុងដីកាដដែល សុំឱ្យអនុវត្តតាមវិធានបង្ខំដោយផ្ទាល់ លក់ដោយបង្ខំនូវអចលនវត្ថុមានបណ្ណសំគាល់សិទ្ធិកាន់កាប់អចលនវត្ថុ ចេញដោយមន្ទីររៀបចំដែនដី នគរូបនីយកម្ម និងសំណង់ មានទីតាំងស្ថិតនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ជាកម្មសិទ្ធិរបស់កូនបំណុលនៃការអនុវត្តឈ្មោះ សម រង្ស៊ី ដើម្បីទទួលបានការសង តាមអំណាចសាលដីកាស្ថាពររបស់តុលាការកំពូល។
ក្នុងដីកានីមួយៗបានបញ្ជាក់នូវទឹកប្រាក់ដែលម្ចាស់បំណុលនីមួយៗទាមទារពីកូនបំណុល ក្នុងនោះ លោក ហេង សំរិន បានទាមទារនូវទឹកប្រាក់ចំនួន២៥០លានរៀល ឬស្មើប្រមាណ៦២ ៥០០ដុល្លារអាមេរិក, លោកនាយករដ្ឋមន្ត្រី ហ៊ុន សែន ចំនួន៤ ០០០លានរៀល ឬស្មើប្រមាណ១លានដុល្លារ, រដ្ឋាភិបាលចំនួន១ ៨០០លានរៀល ឬស្មើប្រមាណ៤៥ម៉ឺនដុល្លារ និងលោក ស ខេង ចំនួន២ ០០០លានរៀល ឬស្មើប្រមាណ៥០ម៉ឺនដុល្លារ។
អតីតមេដឹកនាំបក្សប្រឆាំង លោក សម រង្ស៊ី ដែលឡោមព័ទ្ធដោយបណ្ដឹងនោះ កំពុងនិរទេសខ្លួននៅក្រៅប្រទេស។
សាលាដំបូងរាជធានីភ្នំពេញ នៅថ្ងៃទី០១ ខែមីនា ឆ្នាំ២០២១នេះ បានប្រកាសសាលក្រមកំបាំងមុខដាក់ទោសលោក សម រង្ស៊ី ឱ្យជាប់ពន្ធនាគាររយៈពេល២៥ឆ្នាំ ហាមមិនឱ្យបោះឆ្នោតនិងឈរឈ្មោះ ក្រោមបទ «ប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាលកម្ពុជា»។
ក្រៅពីលោក សម រង្ស៊ី សាលក្រមនៅពេលនោះក៏បានសម្រេចដាក់ទោសលោកស្រី មូរ សុខហួរ និងលោក អេង ឆៃអ៊ាង ឱ្យជាប់ពន្ធនាគារម្នាក់ៗចំនួន២២ឆ្នាំ និងកាត់ទោសលោកស្រី ជូឡុង សូមូរ៉ា, លោក ម៉ែន សុថាវរិន្ទ្រ, លោក អ៊ូ ច័ន្ទឫទ្ធិ, លោក ហូរ វ៉ាន់, លោក ឡុង រី និងលោក នុត រំដួល ឱ្យជាប់ពន្ធនាគារក្នុងម្នាក់ៗចំនួន២០ឆ្នាំ។
តែយ៉ាងណា ការប្រកាសសាលក្រមនៅពេលនេះជំរុញឱ្យមានប្រតិកម្មពីស្ថានទូតលោកសេរីប្រចាំនៅកម្ពុជា ក្នុងនោះមានទាំងសហរដ្ឋអាមេរិក សហភាពអឺរ៉ុប និងអាល្លឺម៉ង់ផងដែរ ដោយពួកគេចាត់ទុកវិធានការនោះថា ជាការព្រួយបារម្ភអំពីការកាត់ទោសក្រុមមេដឹកនាំអតីតគណបក្សប្រឆាំងនៅកម្ពុជា ដែល «ធ្វើឡើងក្រោមដំណើរការនីតិវិធីខ្វះភាពត្រឹមត្រូវ» និងជំរុញឱ្យបើកចំហនយោបាយឡើងវិញ៕