អាជីវករឱ្យដឹងថា ពួកគេប្រមាណ១ ០០០នាក់ដែលលក់ដូរនៅផ្សារធំតាកែវ បានផ្ទុះការតវ៉ាទ្រង់ទ្រាយធំជាថ្មីទៀត ដោយនាំគ្នាដើរហែក្បួនទៅប្រមូលផ្ដុំនៅមុខសាលាខេត្តតាកែវ នៅថ្ងៃចន្ទនេះ ទាមទារឱ្យអាជ្ញាធរលុបចោលគម្រោងសាងសង់ផ្សារថ្មី។
អាជីវករម្នាក់ អ្នកស្រី ផូ ស៊ីណាត ប្រាប់ វីអូឌី ថាអាជីវករប្រមាណ១ ០០០នាក់បាននាំគ្នាកាន់បដារូបថតលោកនាយករដ្ឋមន្ត្រី ហ៊ុន សែន និងភរិយា ដើរហែក្បួនចេញពីផ្សារធំតាកែវ ឆ្ពោះទៅសាលាខេត្ត ដើម្បីស្នើដល់អភិបាលខេត្ត លោក អ៊ូច ភា ជួយដោះស្រាយដោយលុបចោលគម្រោងសាងសង់ថ្មី។
អាជីវកររូបនេះឱ្យដឹងថា ពេលកន្លងមក មានឈ្មួញកណ្ដាលស្នើសុំរុះរើផ្សារធំតាកែវ ដើម្បីសាងសង់ថ្មីសម្រាប់លក់ជូនពួកគាត់ និងអាជីវករផ្សេងទៀត ប៉ុន្តែត្រូវបានជំទាស់ដោយក្រុមអាជីវករលក់ដូរនៅទីនោះ។ អ្នកស្រីប្រាប់ពីមូលហេតុថា ការដែលអាជីវករស្នើឱ្យលុបចោលគម្រោងនោះ ដោយសារផ្សារនេះនៅថ្មី ហើយអាជីវករភាគច្រើនពុំមានលទ្ធភាពទិញតូបមកវិញ ក្រោយផ្សារសាងសង់ថ្មីរួច។
អ្នកស្រីបន្ថែមថា៖ «គេចង់រុះរើផ្សារហ្នឹង ហើយធ្វើថ្មីលក់ឱ្យពួកខ្ញុំវិញ និងអាជីវករផ្សេងទៀត។ ពួកខ្ញុំយល់ ទាំងអស់គ្នាយល់ថា ការធ្វើបែបនេះមិនល្អសម្រាប់ពួកខ្ញុំទេ ពីព្រោះពួកខ្ញុំលក់ដូរនៅទីនេះ៩៩ភាគរយ គឺជំពាក់លុយធនាគារម្នាក់ៗច្រើនណាស់។ បើគាត់ធ្វើអ៊ីចឹង ដូចសម្លាប់ពួកខ្ញុំទាំងរស់តែម្ដង»។
អាជីវកររូបនេះបន្ថែមថា ក្នុងឆ្នាំ២០២១នេះ ក្រុមអាជីវករដែលលក់ដូរនៅក្នុងផ្សារធំខេត្តតាកែវ បានផ្ទុះការតវ៉ាជាបន្តបន្ទាប់ ក្រោយពីទទួលបានព័ត៌មានថា ផ្សារមួយនេះនឹងត្រូវអភិវឌ្ឍថ្មី ប៉ុន្តែការតវ៉ានោះរហូតមកដល់ពេលនេះពុំមានដំណោះស្រាយឡើយ។
អាជីវករលក់ដូនៅផ្សារធំតាកែវម្នាក់ទៀត អ្នកស្រី ម៉ៅ សុផល និយាយថា ប្រសិនបើផ្សារមួយនេះធ្វើការអភិវឌ្ឍថ្មី នោះអ្នកស្រីនិងអាជីវករមួយចំនួនបារម្ភពីការធ្លាក់ចុះនូវចំណូល ការខ្វះខាតលុយសម្រាប់ទិញតូបលក់ថ្មី និងប្រឈមការជំពាក់បំណុលទ្វេដង ខណៈពេលនេះពួកគាត់ជាប់បំណុលនៅធនាគារក្នុងចំនួនច្រើនរួចទៅហើយ។
អ្នកស្រីបន្ថែមថា៖ «ពួកយើងជួបបញ្ហាប្រឈមច្រើនណាស់ ពីព្រោះអាជីវករក្នុងផ្សារនេះជាង៩០ភាគរយសុទ្ធតែជំពាក់បំណុលគេទាំងអស់ ហើយភាគច្រើនមុខរបរតែមួយមុខទេ។ ហើយមួយទៀត បើកាលណាធ្វើតូបបន្ថែមថ្មី នឹងធ្វើឱ្យយើងពិបាករកស៊ីទៀត ព្រោះអ្នកលក់កាន់តែច្រើន តែគ្មានអ្នកទិញ។ ជំពាក់បំណុលគេច្រើន ហើយចំណូលធ្លាក់ចុះ ដឹងតែវេទនាហើយ ដឹងតែទឹកភ្នែកហើយ»។
ខណៈដែលអាជីវករកំពុងប្រមូលផ្ដុំតវ៉ានោះ អភិបាលខេត្តតាកែវ លោក អ៊ូច ភា បានចេញមកជួបក្រុមអ្នកតវ៉ា ដោយសន្យាថានឹងពាំនាំយកសំណើរបស់អាជីវករទៅកាន់ក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យនិងសម្រេច។
លោកបន្ថែមថា៖ «ខ្ញុំនឹងគោរពទៅតាមសំណូមពរបងប្អូន និងយកសំណូមពរបងប្អូនរាយការណ៍ទៅក្រសួង ប្រាប់ថាបងប្អូនមិនអនុញ្ញាតឱ្យអភិវឌ្ឍផ្សារនេះតទៅមុខទៀតទេ។ ប៉ុន្តែចំពោះមុខនេះ យើងដោះស្រាយការតវ៉ានេះ ដោយមិនឱ្យមានសកម្មភាពសាងសង់អ្វីទេ»។
នាយករដ្ឋបាលសាលាខេត្ត លោក មាស អ៊ុយ ប្រាប់ វីអូឌី កាលពីខែតុលា ឆ្នាំ២០២១នេះថា អាជ្ញាធរខេត្តចង់អភិវឌ្ឍផ្សារធំតាកែវនេះ ដោយសារតែផ្សារនេះចាស់ ធ្លុះធ្លាយ និងលិចទឹកជាដើម ដែលអាជ្ញាធរត្រូវធ្វើការអភិវឌ្ឍថ្មី។
ប៉ុន្តែយ៉ាងណា ក្រោយពីក្រុមអាជីវករផ្ទុះការតវ៉ានៅមុខសាលាខេត្តតាកែវ ខាងរដ្ឋបាលខេត្តបានចេញលិខិតមួយនៅថ្ងៃទី១៥ ខែវិច្ឆិកា ឆ្នាំ២០២១នេះ ដោយប្រាប់ទៅក្រុមអាជីវករថា រដ្ឋបាលខេត្តនឹងធ្វើសំណើទៅក្រសួងសេដ្ឋកិច្ច និងហិរញ្ញវត្ថុ ដើម្បីសុំលុបចោលគម្រោងសាងសង់ និងជួសជុលផ្សារធំតាកែវ ទៅតាមការស្នើសុំរបស់ក្រុមអាជីវករ។
ក្រុមអាជីវករព្រមានថា ប្រសិនបើពុំមានដំណោះស្រាយទេ ពួកគេនឹងប្រមូលផ្ដុំតវ៉ានៅមុខសាលាខេត្តជាថ្មីម្ដងទៀត និងទៅរកអន្តរាគមន៍ពីលោកនាយករដ្ឋមន្ត្រី ហ៊ុន សែន ឱ្យជួយដោះស្រាយបន្តទៀត៕
