សមត្ថកិច្ចចាប់បានអ្នកទោស២នាក់ចុងក្រោយ ក្នុងចំណោមអ្នកទោស៧នាក់ដែលរត់ចេញពីពន្ធនាគារខេត្តស្ទឹងត្រែង កាលពីដើមសប្ដាហ៍មុន។
កាលពីវេលាម៉ោងជាង៣ទៀបភ្លឺ នៅថ្ងៃទី៨ ខែវិច្ឆិកា ឆ្នាំ២០២១ អ្នកទោសចំនួន៧នាក់ដែលភាគច្រើនជាអ្នកទោសគ្រឿងញៀន បានវាយទម្លុះជញ្ជាំងពន្ធនាគារខេត្តស្ទឹងត្រែង ហើយនាំគ្នាលួចរត់គេចខ្លួនបាត់។ តែក្រោយមក សមត្ថកិច្ចបានឡោមព័ទ្ធព្រៃមួយកន្លែងក្នុងខេត្តនេះ ហើយចាប់បានអ្នកទោសទាំងនោះបានវិញ៥នាក់ជាបន្តបន្ទាប់។
តែយ៉ាងណា ស្នងការនគរបាលខេត្តស្ទឹងត្រែង លោក អូត ស៊ីវុត្ថា ប្រាប់ វីអូឌី ថាសមត្ថកិច្ចចាប់បានអ្នកទោស៧នាក់នោះមកវិញហើយ ដោយចុងក្រោយចាប់បានអ្នកទោស២នាក់ នៅថ្ងៃទី១៧ ខែវិច្ឆិកានេះ។
ស្នងការរូបនេះបញ្ជាក់ថា អ្នកទោស២នាក់ដែលចាប់បានមកវិញក្រោយគេនេះ មានឈ្មោះ ឡា វ៉ាន់កាវង់ផេង ត្រូវជាប់ពន្ធនាគារ២៨ឆ្នាំ ពីបទ «ជួញដូរគ្រឿងញៀន» និងឈ្មោះ សៀន ខន ត្រូវជាប់ពន្ធនាគារ៣០ឆ្នាំ ពីបទ «ជួញដូរគ្រឿងញៀន» ដូចគ្នា។
ចំណែកអ្នកទោស៥នាក់ដែលសមត្ថកិច្ចចាប់បានជាបន្តបន្ទាប់នាពេលកន្លងមក រួមមាន ឈ្មោះ ភិត ងិន ត្រូវជាប់ពន្ធនាគារ៤ឆ្នាំ ពីបទ «ជួញដូរខុសច្បាប់នូវសារធាតុញៀន» ឈ្មោះ វ៉ាន់ ភូ ត្រូវជាប់ពន្ធនាគារ២០ឆ្នាំ ពីបទ «ជួញដូរដោយខុសច្បាប់នូវសារធាតុញៀន» ឈ្មោះ ទូច វ៉ាត ត្រូវជាប់ពន្ធនាគារ៣០ឆ្នាំ ពីបទ «ជួញដូរគ្រឿងញៀន» ឈ្មោះ ចាក់លី ចឺតាលី ត្រូវជាប់ទោសមួយជីវិត រឿង «បទល្មើសជួញដូរគ្រឿងញៀន» និងឈ្មោះ ហន វិមាន ត្រូវជាប់ទោស២៧ឆ្នាំ រឿង «លួចមានស្ថានទម្ងន់ទោស ដោយសារការប្រើទារុណកម្ម និងអំពើឃោរឃៅ»។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានឱ្យដឹងថា ចំពោះអ្នកទោសទាំង៧នាក់ដែលបានរត់ចេញនេះ ប្រឈមនឹងការជាប់ទោសបន្ថែមទៀត។ លោកថា ក្រោយចាប់បានមកវិញនេះ ព្រះរាជអាជ្ញានឹងពិនិត្យលើអង្គហេតុ ហើយដាក់ពាក្យបណ្ដឹង ដើម្បីមានវិធានការតាមនីតិវិធីបន្តទៀត។
កាលពីថ្ងៃទី១២ ខែវិច្ឆិកានេះ រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាឱ្យធ្វើអធិការកិច្ចប្រកបដោយការទទួលខុសត្រូវ ចំពោះបញ្ហាជនជាប់ឃុំដែលបាននាំគ្នាហែកគុករត់ចេញពីពន្ធនាគារនៅខេត្តស្ទឹងត្រែងនេះ៕