ក្រសួងធនធានទឹក និងឧតុនិយម ឱ្យដឹងថា ក្នុងអំឡុងរដូវរំហើយខាងមុខ ចាប់ពីខែធ្នូ ឆ្នាំ២០២១ ដល់ខែកុម្ភៈ ឆ្នាំ២០២២ ស្ថានភាពអាកាសធាតុនៅកម្ពុជានឹងចុះត្រជាក់ក្នុងរង្វង់ពី១៥ទៅ២១អង្សាសេទៅតាមតំបន់។
សេចក្ដីប្រកាសព័ត៌មានរបស់ក្រសួងធនធានទឹក និងឧតុនិយម ចុះថ្ងៃទី២២ ខែវិច្ឆិកា ឆ្នាំ២០២១ បានលើកឡើងថា ចាប់ពីខែធ្នូ ដល់ខែកុម្ភៈ បាតុភូតឡានីណា (La Nina ត្រជាក់) មានប្រមាណ ៩០% និងថយចុះបន្តិចម្ដងៗមកនៅត្រឹម ៦០% នៅខែកុម្ភៈ ហើយស្ថានភាពនេះនឹងធ្វើឱ្យធាតុអាកាសត្រជាក់នៅតំបន់ស៊ីបេរី រុញច្រានទ្រនុងសម្ពាធខ្ពស់ពីប្រទេសចិនចុះមកក្រោម និងគ្របដណ្ដប់មកលើប្រទេសកម្ពុជា។
ក្រសួងបន្តថា ស្ថានភាពនេះបង្កឱ្យធាតុអាកាសនៅកម្ពុជាចុះត្រជាក់២ដង ក្នុងនោះ លើកទី១ នឹងចុះត្រជាក់ចាប់ពីសប្ដាហ៍ទី១ ខែធ្នូ ដល់សប្ដាហ៍ទី៣ ខែធ្នូ ក្នុងរង្វង់១៧ដល់១៩អង្សាសេ នៅបណ្ដាខេត្តក្នុងភូមិសាស្ត្រជួរភ្នំដងរែក និងខ្ពង់រាបភាគឦសាន ខណៈបណ្ដារាជធានី-ខេត្តដទៃទៀតនឹងមានសីតុណ្ហភាពចន្លោះពី១៩ដល់២១អង្សាសេ។
ចំណែកការចុះត្រជាក់លើកទី២ ក្រសួងថា នឹងចាប់ផ្ដើមចាប់ពីសប្ដាហ៍ទី៤ ខែធ្នូ ដល់ខែកុម្ភៈ ដែលក្នុងថ្ងៃខ្លះ សីតុណ្ហភាពអប្បបរមាធ្លាក់ចុះក្នុងរង្វង់១៥អង្សាទៅ១៧អង្សាសេ នៅតំបន់ភ្នំ និងខ្ពង់រាបភាគឦសាន និងបណ្ដារាជធានី-ខេត្តដទៃទៀត ក្នុងរង្វង់១៨ទៅ២០អង្សារសេ៕
