កងរាជអាវុធហត្ថលើផ្ទៃប្រទេស បានចាប់ខ្លួនមន្ត្រីយោធានិងគូកនសរុប៦នាក់ នៅខេត្តបាត់ដំបង និងកំពុងតាមចាប់ខ្លួនមនុស្ស៤នាក់ទៀត ដើម្បីចាត់វិធានការច្បាប់ពាក់ព័ន្ធនឹងការជួញដូរអាវុធខុសច្បាប់។
អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ប្រាប់ វីអូឌី នៅថ្ងៃចន្ទនេះថា ចាប់ពីថ្ងៃទី១៩ ដល់ថ្ងៃទី២២ ខែវិច្ឆិកា ឆ្នាំ២០២១នេះ កងរាជអាវុធហត្ថបានសហការជាមួយអាជ្ញាធរពាក់ព័ន្ធនៅខេត្តបាត់ដំបង សៀមរាប និងខេត្តកំពង់ឆ្នាំង ចុះស្រាវជ្រាវចាប់មន្ត្រីយោធា៣នាក់ រួមមាន ឈ្មោះ អូន ពិសិដ្ឋ ពាក់ផ្កាយ១ បម្រើការងារនៅអគ្គនាយកដ្ឋានសម្ភារបច្ចេកទេស ក្រសួងការពារជាតិ, មន្ត្រីយោធា២នាក់ និងគូកន៣នាក់ទៀត បញ្ជូនទៅសាលាដំបូងរាជធានីភ្នំពេញ ដើម្បីចាត់វិធានការច្បាប់បន្ត។
លោក សៅ សុខា បញ្ជាក់ថា មូលហេតុដែលសមត្ថកិច្ចមិនបញ្ជូនជនល្មើសទៅសាលាដំបូងខេត្តបាត់ដំបង សៀមរាប និងតុលាការខេត្តកំពង់ឆ្នាំង ចាត់វិធានការ ដោយសារសំណុំរឿងនេះត្រូវបានផ្ទេរសមត្ថកិច្ចឱ្យទៅសាលាដំបូងរាជធានីភ្នំពេញចាត់វិធានការជំនួសវិញ។
អគ្គមេបញ្ជាការកងរាអាវុធហត្ថលើផ្ទៃប្រទេសរូបនោះ អំពាវនាវទៅគូកនចំនួន៤នាក់ទៀតដែលកំពុងរត់គេចខ្លួន ត្រូវចូលមកតុលាការសារភាពទោសកំហុស ដើម្បីទទួលបានការសម្រាលទោសផងដែរ។
លោកគូសបញ្ជាក់ថា៖ «ក្នុងដីកាតុលាការប្រគល់មកឱ្យខ្ញុំ មាន១០នាក់! ឥលូវខ្ញុំឃាត់ខ្លួនបាន៦នាក់ ខ្វះ៤នាក់។ អ៊ីចឹងក៏សូមអំពាវនាវចំពោះ៤នាក់ទៀតនោះ មិនបាច់រត់ទៅណាទេសម័យកូវីដផង រត់ទៅណាក៏មិនរួចដែរ យល់ល្អចេញខ្លួនមកប្រាប់សមត្ថកិច្ចតែម្តងទៅ ថាខ្លួនបានធ្វើខុសទៅហើយ សុំមកទទួលទោស បង្ហាញខ្លួននៅសមត្ថកិច្ចផងទៅ បញ្ចប់រឿងតែម្ដងទៅ ដើម្បីកុំឱ្យមានរឿងអ៊ីចឹងកើតឡើងថែមទៀត»។
លោក សៅ សុខា បន្ថែមថា វត្ថុតាងដែលរឹបអូសបាន រួមមាន អាវុធចំនួន៣៣ដើម ក្នុងចម្ការមៀនមួយកន្លែងនៅស្រុកភ្នំព្រឹក ខេត្តបាត់ដំបង ដែលអាវុធទាំងនោះជាប្រភេទ AK ចំនួន៣០ដើម បង់៤០បង់ និងអាវុធ M79 ចំនួន០៣ដើម។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសាន៍គាំទ្រនឹងវិធានការរបស់កងរាជអាវុធហត្ថដែលបង្ក្រាបជនល្មើសជួញដូរអាវុធខុសច្បាប់ ដើម្បីទប់ស្កាត់កុំឱ្យមានអសន្តិសុខក្នុងសង្គម។ ប៉ុន្តែលោកជំរុញទៅអាជ្ញាធរពាក់ព័ន្ធ និងតុលាការ អនុវត្តច្បាប់ឱ្យបានតឹងរ៉ឹងលើជនល្មើសទាំងនោះ ដើម្បីជាគំរូល្អ កុំឱ្យមានរឿបបែបនេះកើតឡើងបន្តទៀត ។
លោកជំរុញដូច្នេះថា៖ «ត្រូវរឹតបន្តឹងការគ្រប់គ្រងអាវុធឱ្យមានប្រសិទ្ធភាព។ ទី២ ត្រូវចាត់វិធានការតាមផ្លូវច្បាប់ឱ្យបានតឹងរ៉ឹង គ្មានការលើកលែងចំពោះអ្នកដែលជួញដូរអាវុធ ដែលអាចបង្កហានិភ័យដល់សហគមន៍ដែលប្រជាពលរដ្ឋរស់នៅ នាថ្ងៃអនាគត។ ហើយក៏ត្រូវដាក់ទោសទណ្ឌគាត់តាមច្បាប់ កុំឱ្យមានការលើកលែង បើមិនអ៊ីចឹងទេ វាមិនធ្វើឱ្យអ្នកផ្សេងរាងចាលឡើយ»។
មាត្រា២០ នៃច្បាប់ស្ដីពីការគ្រប់គ្រងអាវុធ គ្រឿងផ្ទុះ និងគ្រាប់រំសេវ ឆ្នាំ២០០៥ បានបញ្ញត្តិថា ជនណាដែលបំពាក់ដាក់តាមខ្លួន កាន់កាប់ ប្រើប្រាស់ លក់ ទិញ ឱ្យខ្ចី ផ្ទេរ ចែកចាយ ជួល កែច្នៃ ដំឡើង ជួសជុលនូវអាវុធគ្រឿងផ្ទុះ និងគ្រាប់រំសេវគ្រប់ប្រភេទ ដោយគ្មានការអនុញ្ញាត ត្រូវផ្ដន្ទាទោសដាក់ពន្ធនាគារពី៦ខែទៅ២ឆ្នាំ និងពិន័យជាប្រាក់ពី៥០០ ០០០ (ហាសិបម៉ឺន) រៀល ដល់២ ០០០ ០០០ (ពីរលាន) រៀល ដោយពុំទាន់គិតពីបទល្មើសព្រហ្មទណ្ឌផ្សេងទៀត។
ចំណែកឯមាត្រា៤៩០ នៃក្រមព្រហ្មទណ្ឌ ឆ្នាំ២០០៩ បានបញ្ញត្តិថា គ្រប់បុគ្គលដែលនៅក្រៅលំនៅដ្ឋានរបស់ខ្លួន យកតាមខ្លួន ឬដឹកជញ្ជូននូវអាវុធ គ្រឿងផ្ទុះ ឬគ្រាប់រំសេវគ្រប់ប្រភេទ ដោយគ្មានការអនុញ្ញាតពីអាជ្ញាធរមានសមត្ថកិច្ច ត្រូវផ្ដន្ទាទោសដាក់ពន្ធនាគារពី៦ខែទៅ៣ឆ្នាំ និងពិន័យជាប្រាក់ពី១ ០០០ ០០០ (មួយលាន) រៀល ទៅ៦ ០០០ ០០០ (ប្រាំមួយលាន) រៀល៕
