ពលរដ្ឋដែលរងផលប៉ះពាល់ពីគម្រោងអភិវឌ្ឍន៍ផ្លូវដែក ប្រមាណជិត១០នាក់នាំគ្នាប្រមូលផ្ដុំ និងយកញត្តិដាក់នៅរដ្ឋបាលរាជធានីភ្នំពេញជាថ្មី ដើម្បីទាមទារឱ្យលោកអភិបាលជួយពន្លឿនការដោះស្រាយបញ្ហាដីធ្លីជូនពួកគេឱ្យបានឆាប់ ខណៈពួកគេបារម្ភពីការបណ្ដេចេញដោយបង្ខំ។
អ្នកស្រី មាស ស្រីភាព រស់នៅភូមិ១៦ សង្កាត់ទឹកល្អក់១ ខណ្ឌទួលគោក ដែលរងផលប៉ះពាល់ពីគម្រោងអភិវឌ្ឍន៍ផ្លូវដែក បានឱ្យដឹងថា ដើមចមដែលនាំឱ្យពួកគេយកញត្តិទៅដាក់សារជាថ្មីទៀត នៅថ្ងៃអង្គារនេះ ដើម្បីទាមទារឱ្យអភិបាលរាជធានីភ្នំពេញ លោក ឃួង ស្រេង ពន្លឿនការដោះស្រាយបញ្ហាដីធ្លីជូនពួកគេឱ្យបានឆាប់ ដោយសារតែកន្លងមក អាជ្ញាធរខណ្ឌមិនព្រមដោះស្រាយជូនពួកគេនោះទេ។ ករណីនេះ អ្នកស្រីបារម្ភពីការបណ្ដេញចេញដោយបង្ខំ និងមិនទទួលបានសំណងសមរម្យ ជាដើម។
អ្នកស្រីមានប្រសាសន៍ថា៖ «ទៅខណ្ឌ ពួកខ្ញុំលែងទៅហើយ ព្រោះពួកខ្ញុំទៅប្រហែលជាជិត១០ដងហើយ ប៉ុន្តែពួកគាត់នៅតែជំរុញឱ្យពួកខ្ញុំទៅយកដីនៅតំបន់គោកខ្សាច់របស់ក្រុមហ៊ុន 7NG ស្ថិតនៅខេត្តកណ្ដាល។ អ៊ីចឹងពួកខ្ញុំមិនព្រមយក អ៊ីចឹងបើសាលាក្រុងឱ្យទៅជួបខណ្ឌវិញ ក៏ពួកខ្ញុំឈប់ទៅខណ្ឌហើយ ព្រោះអត់មានដំណោះស្រាយសម្រាប់ពួកខ្ញុំ វានៅតែដដែល»។
អ្នកស្រីបន្ថែមថា៖ «ខ្ញុំចង់ជួបអភិបាលក្រុង លោកពូ ឃួង ស្រេង តែម្តង ដើម្បីឱ្យគាត់ជួយដោះស្រាយជូនពួកខ្ញុំឱ្យបានលឿនបន្តិច ព្រោះអីពួកខ្ញុំដេកមិនលក់ទេ ផ្ទះខ្ញុំមិនដឹងគេរុះរើពេលណា ព្រោះអីផ្ទះខ្ញុំបាក់បែកជិតអស់ហើយ ចង់សាងសង់វិញក៏មិនបាន ចង់ជួសជុលឡើងវិញក៏មិនបាន ដូចថាវាពិបាកតែម្ដង»។
លោក អ៊ុង គឹមអូន រស់នៅភូមិ២ សង្កាត់ស្រះចក ខណ្ឌដូនពេញ បានឱ្យដឹងថា ក្នុងខ្លឹមសារញត្តិដែលពួកគាត់ដាក់នោះ គឺស្នើសុំជួបលោក ឃួង ស្រេង នៅថ្ងៃទី៨ ខែធ្នូ ឆ្នាំ២០២១ ដើម្បីជជែកពិភាក្សារកដំណោះស្រាយសម្រាប់គ្រួសារដែលរងផលប៉ះពាល់ទាំងស្រុង និងមួយផ្នែកដោយសារការអភិវឌ្ឍផ្លូវដែក។ ប៉ុន្តែលោកថា មន្ត្រីរដ្ឋបាលដែលទទួលយកញត្តិ មិនបានប្រាប់ពួកគេថាត្រូវអនុញ្ញាតឱ្យជួបអភិបាលរាជធានី ឬមិនឱ្យជួបនោះទេ។
ទោះជាបែបនេះក្ដី លោកអះអាងថា មុនថ្ងៃកំណត់ បើមិនឃើញមន្ត្រីរដ្ឋបាលរាជធានីភ្នំពេញជូនដំណឹងដល់ពួកគេទេ នោះពួកគាត់នឹងនាំគ្នាប្រមូលផ្ដុំនៅមុខរដ្ឋបាលរាជធានីភ្នំពេញជាថ្មី នៅថ្ងៃទី៨ ខែធ្នូ ដើម្បីទាមទាររកដំណោះស្រាយ។
លោកមានប្រសាសន៍ថា៖ «បើអត់មានដំណោះស្រាយ ពួកយើងនៅតែបន្តមកជួបជុំគ្នានៅមុខសាលារាជធានីភ្នំពេញ ដើម្បីឱ្យគាត់ជួយរកដំណោះស្រាយជូនប្រជាជន បងប្អូនដែលរងផលប៉ះពាល់ទាំងអស់ ឱ្យគាត់ [អភិបាលរាជធានីភ្នំពេញ លោក ឃួង ស្រេង] ឱ្យគាត់រកដំណោះស្រាយសមស្របណាមួយឱ្យពួកយើងទទួលយកបាន»។
បើតាមពលរដ្ឋដែលរងផលប៉ះពាល់ពីគម្រោងអភិវឌ្ឍន៍ផ្លូវដែក កន្លងមក អភិបាលខណ្ឌ និងរដ្ឋបាលរាជធានីភ្នំពេញ នៅតែចិញ្ចឹមចិត្តជំរុញឱ្យពួកគាត់ទទួលយកដីនៅតំបន់អភិវឌ្ឍន៍របស់ក្រុមហ៊ុន 7NG ស្ថិតនៅខេត្តកណ្ដាល និងតំបន់គោកខ្សាច់ ដែលមានចម្ងាយពីរាជធានីភ្នំពេញ ៥ទៅ៦គីឡូម៉ែត្រ និងជាតំបន់ដែលមិនទាន់មានទឹកប្រើប្រាស់នៅឡើយ។
ប៉ុន្តែពលរដ្ឋទាំងនោះបានច្រានចោលដំណោះស្រាយនេះ និងទាមទារឱ្យអាជ្ញាធរផ្ដល់ដីនៅក្បែរ «វត្តទួលអស់លោក» ឬដីក្នុងខណ្ឌទួលគោក ដែលស្ថិតនៅក្បែរទីប្រជុំជន ដើម្បីឱ្យពួកគាត់ងាយស្រួលរកប្រាក់ទ្រទ្រង់ជីវភាពគ្រួសារ និងងាយស្រួលកូនៗទៅសិក្សាជាដើម។
វីអូឌី មិនអាចសុំការបញ្ជាក់ពីអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានទេ នៅថ្ងៃនេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត ដែលតាមដានករណីនេះ អះអាងថា អាជ្ញាធរពាក់ព័ន្ធ ជាពិសេសអភិបាលរាជធានីភ្នំពេញ ត្រូវពន្លឿនដោះស្រាយបញ្ហាដីធ្លីជូនពលរដ្ឋទាំងនោះឱ្យបានឆាប់ និងទទួលបានសំណងសមរម្យ ដើម្បីបញ្ចៀសនូវអំពើហិង្សាកើតឡើងជាយថាហេតុ។
ប៉ុន្តែលោកថា បើរដ្ឋបាលរាជធានីភ្នំពេញមិនពន្លឿនដោះស្រាយបញ្ហាដីធ្លីជូនពលរដ្ឋឱ្យបានឆាប់ទេ ហើយធ្វើការអភិវឌ្ឍដោយបណ្ដេញពលរដ្ឋទាំងបង្ខំនោះ នឹងធ្វើឱ្យមានអំពើហិង្សារវាងពលរដ្ឋនិងសមត្ថកិច្ច ហើយអ្នកដែលរងគ្រោះកាន់តែធ្ងន់ធ្ងរជាប្រជាពលរដ្ឋ។
លោកមានប្រសាសន៍ថា៖ «បើសិនជាមានការជូនដំណឹងឱ្យពលរដ្ឋរុះរើចេញ និងមានការតវ៉ាពីប្រជាពលរដ្ឋស្នើសុំឱ្យមានដំណោះស្រាយ កុំឱ្យបណ្ដេញពួកគាត់ចេញដោយបង្ខំ បើសិនជាអាជ្ញាធរនៅតែអនុវត្តដោយបង្ខំទៀត យើងបារម្ភថា នឹងមានអំពើហិង្សាកើតឡើង។ កាលណាមានអំពើហិង្សាកើតឡើង នឹងមានការប៉ះទង្គិចគ្នា ហើយអ្នកដែលរងគ្រោះបន្ថែមជាន់លើការបាត់បង់ដីហ្នឹងទៀត គឺពលរដ្ឋ»។
បើតាមការអះអាងរបស់តំណាងពលរដ្ឋ ពលរដ្ឋដែលរងផលប៉ះពាល់ពីគម្រោងផ្លូវដែកនេះមានប្រមាណ៧០គ្រួសារ មកពីសហគមន៍ចំនួន៤ រួមមាន សហគមន៍អភិវឌ្ឍន៍ថ្មី សហគមន៍ភូមិ១៧ សហគមន៍ភូមិ២៣ ស្ថិតក្នុងខណ្ឌទួលគោក និងសហគមន៍ភូមិ២ ក្នុងខណ្ឌដូនពេញ៕
