មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គជប) បានឱ្យដឹងជាបឋមថា ពលរដ្ឋគ្រប់អាយុចុះឈ្មោះបោះឆ្នោតនៅឆ្នាំនេះ បានចុះឈ្មោះចំនួនជាង៤៣ម៉ឺននាក់ ធ្វើឱ្យពលរដ្ឋចាប់ពីអាយុ១៨ឆ្នាំឡើងទៅ ដែលចុះក្នុងបញ្ជីឈ្មោះបោះឆ្នោតកើនជាង៩លាននាក់។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បានប្រាប់ វីអូឌី នៅថ្ងៃចន្ទនេះថា គិតមកដល់ថ្ងៃទី២៨ ខែវិច្ឆិកា ម្សិលមិញ ចំនួនអ្នកចុះឈ្មោះបោះឆ្នោតនៅក្នុងឆ្នាំ២០២១ មានចំនួន៤៣៣ ៦៧៤នាក់។
លោកបន្តថា៖ «ប្រសិនបើគិតពីបញ្ជីបោះឆ្នោតបណ្ដោះអាសន្ននៅក្នុងបញ្ជីឈរឈ្មោះបោះឆ្នោតនៅឆ្នាំ២០២១នេះ គឺកើនដល់៩ ០៩២ ៩៩៨នាក់ហើយ។ បើគិតជាភាគរយនៃអ្នកដែលមានអាយុ១៨ឆ្នាំឡើង គឺយើងធ្វើការឈរឈ្មោះបោះឆ្នោត ៨៧,៨២% នៃប្រជាពលរដ្ឋដែលមានអាយុ១៨ឆ្នាំឡើង»។
លោកបញ្ជាក់ថា៖ «បើយើងប្រៀបធៀបនឹងបញ្ជីឈ្មោះបោះឆ្នោតឆ្នាំ២០២០ ឆ្នាំនេះមានការកើនឡើងចំនួន២,៧៦ភាគរយ។ យ៉ាងណាក៏យើងនៅសល់តួលេខ២ថ្ងៃទៀតដែរ»។
កាលពីថ្ងៃទី២៧ ខែវិច្ឆិកា ឆ្នាំ២០២១ គ.ជ.ប បានចេញសេចក្ដីប្រកាសព័ត៌មានស្ដីពីលទ្ធផលបណ្ដោះអាសន្នរយៈពេល៤៣ថ្ងៃ នៃការពិនិត្យបញ្ជីឈ្មោះនិងចុះឈ្មោះបោះឆ្នោតឆ្នាំ២០២១ បានឱ្យដឹងដែរថា សម្រាប់អ្នកដែលត្រូវលុបឈ្មោះចេញពីបញ្ជីឈ្មោះបោះឆ្នោតសរុបចំនួន២០១ ៧១៥នាក់ ហើយអ្នកដែលបានកែតម្រូវទិន្នន័យសរុបមានចំនួន១៧២ ៧៣៣នាក់ និងអ្នកដែលបានផ្ទេរលំនៅចូលក្នុងឃុំ-សង្កាត់ថ្មី សរុបចំនួន១៣២ ២៤១នាក់។
យោងតាមសេចក្ដីប្រកាសដដែលបានបន្តថា ការពិនិត្យបញ្ជីឈ្មោះនិងការចុះឈ្មោះបោះឆ្នោតឆ្នាំ២០២១ ប្រព្រឹត្តទៅចាប់ពីថ្ងៃទី១២ ខែតុលា ដល់ថ្ងៃទី៣០ ខែវិច្ឆិកា ឆ្នាំ២០២១។
ជាមួយគ្នានេះ លោក ហង្ស ពុទ្ធា អំពាវនាវជាថ្មីទៀតដល់អ្នកមានឈ្មោះក្នុងបញ្ជីដែលមានអាយុ១៨ឆ្នាំ ហើយមិនទាន់មានឈ្មោះក្នុងបញ្ជី ត្រូវរួសរាន់ចុះឈ្មោះបោះឆ្នោត ដោយពេលវេលានៅសល់តែពីរថ្ងៃទេ បើគ្មានឈ្មោះក្នុងបញ្ជី គឺមិនអាចបោះឆ្នោតនៅឆ្នាំ២០២២បានទេ៕
