រដ្ឋាភិបាលកម្ពុជាប្រកាសលុបចោលបម្រាម ដែលហាមមិនឱ្យអ្នកដំណើរឬអ្នកដែលឆ្លងកាត់ប្រទេសតំបន់អាហ្វ្រិកចំនួន១០ចូលកម្ពុជា ប៉ុន្តែអ្នកធ្វើដំណើរត្រូវបង្ហាញវិញ្ញាបនបត្របញ្ជាក់ថាគ្មានជំងឺកូវីដ-១៩ (តេស្ត PCR) ក្នុងរយៈពេល៧២ម៉ោង មុនពេលមកដល់កម្ពុជា និងទទួលស្គាល់ដោយអាជ្ញាធរសុខាភិបាលនៃប្រទេសសាម៉ី ឬប្រទេសសំណាក់ចុងក្រោយ។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចុះផ្សាយនៅថ្ងៃទី៥ ខែធ្នូ បានសម្រេចលុបចោលការហាមអ្នកដំណើរ ឬអ្នកដែលឆ្លងកាត់ប្រទេសតំបន់អាហ្វ្រិកចំនួន១០ ចូលកម្ពុជា រួមមាន ប្រទេស Botswana, Eswatini, Lesotho, Mozambique, Namibia, South Africa, Zimbabwe, Malawi, Angola, និង Zambia ដោយថា ដើម្បីទប់ស្កាត់ការឆ្លងវីរុសកូវីដ-១៩ បំប្លែងខ្លួនថ្មី «អូមីក្រុង»។
សេចក្ដីប្រកាសព័ត៌មានបន្តថា ការលុបចោលវិធានការនេះនឹងត្រូវដាក់ជំនួសមកវិញដោយការអនុវត្តនីតិវិធីបន្ថែមលើនីតិវិធីប្រតិបត្តិស្តង់ដារ (SOPs) ដើម្បីគ្រប់គ្រងអ្នកដំណើរមកដល់អាកាសយានដ្ឋានអន្តរជាតិនៅកម្ពុជា អនុលោមតាមការរស់នៅតាមគន្លងប្រក្រតីភាពថ្មី ក្នុងបរិបទនៃជំងឺកូវីដ-១៩ សម្រាប់អ្នកដំណើរ ឬអ្នកដែលបានឆ្លងកាត់ប្រទេស ឬមានប្រវត្តិធ្វើដំណើរទៅប្រទេសទាំង១០នោះ ឬបណ្តាប្រទេសផ្សេងទៀតដែលត្រូវបានចាត់ទុកថាជា «ប្រទេសដែលមានការព្រួយបារម្ភ» ចម្លងវីរុសបំប្លែងថ្មី «អូមីក្រុង» អំឡុងពេល២សប្ដាហ៍មុនធ្វើដំណើរចូលប្រទេសកម្ពុជា។
ករណីនេះ អ្នកដំណើរដែលបានចាក់វ៉ាក់សាំងកូវីដ-១៩ ពេញលេញ ត្រូវបង្ហាញវិញ្ញាបនបត្របញ្ជាក់ថា គ្មានជំងឺកូវីដ-១៩ (តេស្ត PCR) ក្នុងរយៈពេល៧២ម៉ោង មុនពេលមកដល់កម្ពុជា ហើយទទួលស្គាល់ដោយអាជ្ញាធរសុខាភិបាលនៃប្រទេសសាម៉ី ឬប្រទេសសំណាក់ចុងក្រោយ មុនចាកចេញមកកាន់កម្ពុជា។
ក្រសួងបន្ថែមថា អ្នកដំណើរត្រូវធ្វើតេស្តរហ័សរកអង់ទីហ្សែនកូវីដ-១៩ នៅពេលមកដល់កម្ពុជា ក្នុងករណីទទួលបានលទ្ធផលតេស្តរហ័សរកអង់ទីហ្សែនកូវីដ-១៩ «វិជ្ជមាន» ត្រូវយកសំណាកធ្វើតេស្ត PCR បញ្ជាក់ និងត្រូវធ្វើចត្តាឡីស័កដាច់ដោយឡែកនៅទីកន្លែងដែលកំណត់ដោយក្រសួងសុខាភិបាល ឬអាជ្ញាធរមានសមត្ថកិច្ច ហើយករណីទទួលបានលទ្ធផលតេស្ត PCR «វិជ្ជមាន» ត្រូវធ្វើការព្យាបាល ។
ក្រសួងបន្តទៀតថា បើធ្វើតេស្ត PCR ចេញលទ្ធផល «អវិជ្ជមាន» ត្រូវបន្តធ្វើចត្តាឡីស័កដាច់ដោយឡែករយៈពេល៧ថ្ងៃ និងធ្វើតេស្ត PCR នៅថ្ងៃទី៦ នៃការធ្វើចត្តាឡីស័ក ហើយក្នុងករណីទទួលបានលទ្ធផលតេស្តរហ័សរកអង់ទីហ្សែនកូវីដ-១៩ «អវិជ្ជមាន» ត្រូវធ្វើចត្តាឡីស័ករយៈពេល៧ថ្ងៃ និងធ្វើតេស្ត PCR នៅថ្ងៃទី៦ នៃការធ្វើចត្តាឡីស័កផងដែរ។
ចំណែកអ្នកដំណើរជាជនបរទេស ក្រសួងថា ត្រូវកក់សណ្ឋាគារសម្រាប់ការធ្វើចត្តាឡីស័ករយៈពេល៧ថ្ងៃ ហើយក្នុងករណីអ្នកដំណើរមិនបានកក់សណ្ឋាគារ ត្រូវទៅកាន់បញ្ជរធនាគារ ដើម្បីតម្កល់ប្រាក់១ ០០០ដុល្លារ សម្រាប់ធានាចំណាយទាំងអស់ អំឡុងពេលធ្វើចត្តាឡីស័ករយៈពេល៧ថ្ងៃ នៅទីកន្លែងដែលកំណត់ដោយក្រសួងសុខាភិបាល ឬអាជ្ញាធរមូលដ្ឋាន។
ដោយឡែក អ្នកដំណើរដែលពុំទាន់បានចាក់វ៉ាក់សាំងកូវីដ-១៩ ពេញលេញ ត្រូវបង្ហាញវិញ្ញាបនបត្របញ្ជាក់ថា គ្មានជំងឺកូវីដ-១៩ (តេស្ត PCR) ក្នុងរយៈពេល៧២ម៉ោង មុនពេលមកដល់កម្ពុជា ទទួលស្គាល់ដោយអាជ្ញាធរសុខាភិបាលនៃប្រទេសសាម៉ី ឬប្រទេសសំណាក់ចុងក្រោយ មុនចាកចេញមកកាន់កម្ពុជា។
ក្រសួងសុខាភិបាលបានបន្ថែមទៀតថា អ្នកដំណើរដែលពុំទាន់បានចាក់វ៉ាក់សាំងកូវីដ-១៩ ពេញលេញ ត្រូវធ្វើចត្តាឡីស័ករយៈពេល១៤ថ្ងៃ ដោយអនុវត្តតាមនីតិវិធីប្រតិបត្តិស្តង់ដារ (SOPs) ដើម្បីគ្រប់គ្រងអ្នកដំណើរមកដល់អាកាសយានដ្ឋានអន្តរជាតិនៅកម្ពុជា អនុលោមតាមការរស់នៅតាមគន្លងប្រក្រតីភាពថ្មី ក្នុងបរិបទនៃជំងឺកូវីដ-១៩។
កាលពីថ្ងៃទី២៩ ខែវិច្ឆិកា ក្រសួងសុខាភិបាលបានចេញសេចក្ដីសម្រេចហាមឃាត់អ្នកដំណើរ ឬអ្នកដែលបានឆ្លងកាត់ប្រទេសចំនួន១០នៅទ្វីបអាហ្រ្វិក ឬអ្នកមានប្រវត្តិធ្វើដំណើរទៅប្រទេសទាំង១០ ក្នុងអំឡុងពេល៣សប្ដាហ៍ មុនពេលធ្វើដំណើរចូលប្រទេសកម្ពុជា។
វីរុសកូវីដ-១៩បំប្លែងខ្លួនថ្មី អូមីក្រុង (Omicron) ដែលមានសមត្ថភាពចម្លងខ្លាំងជាងវីរុសកូវីដ-១៩ ប្រភេទ Delta ត្រូវបានរកឃើញដំបូងគេនៅក្នុងប្រទេសអាហ្វ្រិកខាងត្បូង កាលពីថ្ងៃទី២៣ ខែវិច្ឆិកា ឆ្នាំ២០២១ ៕
