ធនាគារជាតិនៃកម្ពុជា សម្រេចឈប់ផ្ដល់អាជ្ញាបណ្ណថ្មីសម្រាប់ប្រកបអាជីវកម្មគ្រឹះស្ថានមីក្រូហិរញ្ញវត្ថុទទួលប្រាក់បញ្ញើបន្តទៀត ដើម្បីពង្រឹងនូវសមត្ថភាពរបស់គ្រឹះស្ថានធនាគារនិងហិរញ្ញវត្ថុក្នុងការរួមចំណែកដល់ការអភិវឌ្ឍសេដ្ឋកិច្ចជាតិ។
ក្នុងសេចក្ដីជូនដំណឹងរបស់ធនាគារជាតិនៃកម្ពុជា បានឱ្យដឹងកាលពីថ្ងៃទី៦ ខែធ្នូ ឆ្នាំ២០២១នេះថា បច្ចុប្បន្ន គ្រឹះស្ថានធនាគារនិងហិរញ្ញវត្ថុនៅកម្ពុជាមានការរីកចម្រើនទាំងគុណភាព ទំហំ និងវិសាលភាព ។
ករណីនេះ ធនាគារជាតិនៃកម្ពុជាសម្រេចឈប់ផ្ដល់អាជ្ញាបណ្ណថ្មីសម្រាប់ប្រកបអាជីវកម្មគ្រឹះស្ថានមីក្រូហិរញ្ញវត្ថុទទួលប្រាក់បញ្ញើបន្តទៀត ចាប់ពីថ្ងៃជូនដំណឹងនេះតទៅ ដើម្បីពង្រឹងនូវសមត្ថភាពរបស់គ្រឹះស្ថានធនាគារនិងហិរញ្ញវត្ថុ រក្សាស្ថិរភាពហិរញ្ញវត្ថុ ក្នុងការរួមចំណែកដល់ការអភិវឌ្ឍសេដ្ឋកិច្ចជាតិឱ្យកាន់តែរីកចម្រើន។
សេចក្ដីជូនដំណឹងដដែល ឱ្យដឹងទៀតថា ធនាគារជាតិនៃកម្ពុជាស្វាគមន៍វិនិយោគិនចំពោះការចូលរួមវិនិយោគជាមួយគ្រឹះស្ថានធនាគារនិងហិរញ្ញវត្ថុដែលកំពុងប្រកបអាជីវកម្ម និងលើកទឹកចិត្តចំពោះការច្របាច់បញ្ចូលគ្នារវាងគ្រឹះស្ថានធនាគារនិងហិរញ្ញវត្ថុដែលមានស្រាប់ ដើម្បីលើកកម្ពស់ការផ្ដល់សេវាហិរញ្ញវត្ថុប្រកបដោយគុណភាព ប្រសិទ្ធភាព និងមានតម្លៃសមរម្យសម្រាប់ក្រុមហ៊ុន សហគ្រាស និងសាធារណជនផងដែរ។
ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងី គាំទ្រវិធានការរបស់ធនាគារជាតិកម្ពុជា ដែលសម្រេចឈប់ផ្ដល់អាជ្ញាបណ្ណថ្មីសម្រាប់ប្រកបអាជីវកម្មគ្រឹះស្ថានមីក្រូហិរញ្ញវត្ថុទទួលប្រាក់បញ្ញើបន្តទៀត ដោយលោកថា បញ្ហានេះនឹងផ្ដល់ផលវិជ្ជមានច្រើនសម្រាប់គ្រឹះស្ថានមីក្រូហិរញ្ញវត្ថុដែលមានស្រាប់។
លោកជំរុញទៅម្ចាស់អាជីវកម្មមីក្រូហិរញ្ញវត្ថុដែលមានស្រាប់ទាំងនោះ ត្រូវពង្រឹងនិងពង្រីកបន្ថែមលើការផ្ដល់សេវាដល់អតិថិជនរបស់ខ្លួន និងប្រជាពលរដ្ឋផ្សេងទៀតឱ្យចេះសន្សំប្រាក់ ដើម្បីជាផ្នែកមួយជួយដល់សេដ្ឋកិច្ចគ្រួសារ និងរួមចំណែកដល់ការអភិវឌ្ឍសេដ្ឋកិច្ចជាតិផងដែរ។
លោកមានប្រសាសន៍ដូច្នេះថា៖ «ការលើកទឹកចិត្តដល់ប្រជាពលរដ្ឋខ្មែរឱ្យចេះសន្សំប្រាក់ គឺនៅតែជាអាទិភាពនៃសមាគមមីក្រូហិរញ្ញវត្ថុកម្ពុជា ហើយជាអាទិភាពរបស់ធនាគារជាតិនៃកម្ពុជាដែរ ដោយសារតែគាត់បានដាក់កិច្ចការហ្នឹងចូលទៅក្នុងយុទ្ធសាស្ត្រថ្នាក់ជាតិស្តីពីបរិយាប័ន្ននៃកម្ពុជា»។
លោកបន្ថែមថា៖ «ដោយសារអី? ដោយសារយើងមើលឃើញថា ទម្លាប់នៃការសន្សំប្រាក់របស់ប្រជាជនខ្មែរយើង កាលណាគាត់មានទម្លាប់ល្អ វានឹងជួយកាត់បន្ថយបញ្ហាសង្គមបានច្រើន ក៏ដូចជាហានិភ័យផ្សេងៗ។ ហើយទន្ទឹមនឹងហ្នឹង វាក៏បានបង្កើតឱកាសដល់ប្រជាពលរដ្ឋយើង មានឱកាសរីកចម្រើនសេដ្ឋកិច្ចផងដែរ នៅពេលដែលគាត់មានទម្លាប់សន្សំ»។
យោងតាមបញ្ជីឈ្មោះគ្រឹះស្ថានមីក្រូហិរញ្ញវត្ថុទទួលប្រាក់បញ្ញើដែលបានចុះបញ្ជីនៅធនាគារជាតិនៃកម្ពុជា គិតត្រឹមថ្ងៃទី៣០ ខែកញ្ញា ឆ្នាំ២០២១ មានចំនួន៦ស្ថាប័ន រួមមាន គ្រឹះស្ថានមីក្រូហិរញ្ញវត្ថុអម្រិត, អេអឹមខេ, ដាប់ប៊ែលយូប៊ី ហ្វាយនែន, ប្រាសាក់, អិលអូអិលស៊ី (ខេមបូឌា) ភីអិលស៊ី, និងគ្រឹះស្ថានមីក្រូហិរញ្ញវត្ថុមហានគរ ជាដើម។
កាលពីចុងខែមិថុនា ឆ្នាំ២០២១ អង្គការឃ្លាំមើលសិទ្ធិមនុស្សលីកាដូ និងអង្គការសមធម៌កម្ពុជា បានចេញសេចក្ដីថ្លែងការណ៍មួយថា គិតត្រឹមខែធ្នូ ឆ្នាំ២០២០ សមាគមមីក្រូហិរញ្ញវត្ថុនៅកម្ពុជាបានកត់ត្រាឥណទានប្រមាណជិត៣លានកម្ចី មានទំហំទឹកប្រាក់សរុបជាង១១លានដុល្លារ (១១,៨លានដុល្លារ) ក្នុងនោះ ទំហំកម្ចីគិតជាមធ្យមម្នាក់៤ ២៨០ដុល្លារ តែថា ប្រជាពលរដ្ឋ៩៥ភាគរយមានប្រាក់ចំណូលប្រចាំឆ្នាំតិចជាងចំនួនកម្ចីគិតជាមធ្យមនេះ។
សេចក្ដីថ្លែងការណ៍នេះបញ្ជាក់ថា ប្រជាពលរដ្ឋកម្ពុជាជាច្រើនកំពុងលង់ក្នុងបំណុលឥណទានខ្នាតតូច ដែលកំពុងនាំឱ្យមានការរំលោភសិទ្ធិមនុស្សធ្ងន់ធ្ងរ និងផលប៉ះពាល់ខ្លាំងនៅទូទាំងប្រទេស ហើយមនុស្សជាច្រើនកំពុងរងគ្រោះយ៉ាងស្ងប់ស្ងាត់ផងដែរ។
យ៉ាងនេះក្ដី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងី មានប្រសាសន៍បន្ថែមថា គិតត្រឹមត្រីមាសទី៣ ឆ្នាំ២០២១នេះ សមាគមមីក្រូហិរញ្ញវត្ថុកម្ពុជា មានគ្រឹះស្ថានមីក្រូហិរញ្ញវត្ថុចំនួន៦ដែលមានអាជ្ញាបណ្ណទទួលប្រាក់បញ្ញើ។ ហើយគ្រឹះស្ថានទាំងនេះទទួលប្រាក់បញ្ញើពីអតិថិជនជាង៤ ០០០លានដុល្លារសហរដ្ឋអាមេរិក ពីអតិថិជនជាង២លាន៨សែននាក់ ទូទាំងប្រទេសកម្ពុជា៕