អង្គបុរេជំនុំជម្រះនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបោះពុម្ពផ្សាយឯកសារចំនួនជាង៧០០ទំព័រ (៧៥៣) ស្ដីពី «យុត្តិសាស្ត្ររបស់អង្គបុរេជំនុំជម្រះ នៃអង្គជំនុំជម្រះវិសាមញ្ញក្នុងតុលាការកម្ពុជា»។
ការបោះពុម្ពឯកសារជាលើកទី១នេះ មានពីរភាសា គឺភាសាអង់គ្លេស និងភាសាបារាំង និងអាចរកមើលបាននៅលើគេហទំព័ររបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។
សេចក្ដីប្រកាសព័ត៌មានរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) កាលពីម្សិលមិញបានឱ្យដឹងថា នៅក្នុងសកម្មភាពការងាររបស់ខ្លួនរយៈពេល១៤ឆ្នាំមកនេះ អង្គបុរេជំនុំជម្រះបានចេញសេចក្ដីសម្រេចជាង២៦០ ដោយដោះស្រាយគ្រប់ដំណាក់កាលទាំងអស់នៃការស៊ើបអង្កេតផ្នែកព្រហ្មទណ្ឌ ចាប់ពីការបើកកិច្ចស៊ើបសួរបឋម រហូតដល់ពេលបិទបញ្ចប់កិច្ចស៊ើបសួរ។
ប្រភពដដែលថា អង្គបុរេជំនុំជម្រះបានពិនិត្យទៅលើផ្នែកចម្រុះពាក់ព័ន្ធនឹងនីតិវិធីព្រហ្មទណ្ឌ និងបញ្ហាសំខាន់ៗ ដូចជា ការឃុំខ្លួនបណ្ដោះអាសន្ន ភាពអាចទទួលយកបាន ឬសុពលភាពនៃភស្តុតាង និងទ្រឹស្តីគតិយុត្តិនៃសហឧក្រិដ្ឋកម្មរួម។ អង្គបុរេជំនុំជម្រះ បានធ្វើការវិភាគអំពីយុត្តាធិការរបស់តុលាការ ក្នុងនាមជាតុលាការពិនិត្យចុងក្រោយនៅដំណាក់កាលស៊ើបអង្កេត ក្រោមក្របខណ្ឌគតិយុត្តិរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។
អង្គបុរេជំនុំជម្រះ បានចេញសេចក្ដីសម្រេចចុងក្រោយរបស់ខ្លួនកាលពីថ្ងៃទី២៩ ខែកញ្ញា ឆ្នាំ២០២១ ហើយថ្ងៃម្សិលមិញនេះ ជាការផ្សព្វផ្សាយអត្ថបទចងក្រងយុត្តិសាស្ត្រលើកទី១របស់ខ្លួន៕
