មេធាវីការពារក្ដីឱ្យអតីតអភិបាលខេត្តតាកែវ និងបងប្រុស អះអាងនៅបន្ទប់សវនាការថា តុលាការថ្នាក់ក្រោមខកខានមិនបានពិចារណាភាពប្រែប្រួលនៃចម្លើយសាក្សី និងភស្តុតាងភាគច្រើន ដែលបង្ហាញថាកូនក្ដីរបស់ខ្លួនពុំបានប្រព្រឹត្តកំហុសដូចការចោទប្រកាន់។
តុលាការកំពូល នៅថ្ងៃសុក្រនេះ បានបើកសវនាការលើបណ្ដឹងសារទុក្ខអតីតអភិបាលខេត្តតាកែវ លោក ឡាយ វណ្ណៈ និងបងប្រុស លោក ឡាយ ណារិទ្ធ ក្នុងសំណុំរឿង «ឃាតកម្ម» លើអ្នកនាង ចេវ សុវឌ្ឍនា ក្រោយពីសាលាឧទ្ធរណ៍សម្រេចតម្កល់សាលក្រមសាលាដំបូងរាជធានីភ្នំពេញទុកជាបានការដដែល។
សហមេធាវីការពារក្ដីឱ្យលោក ឡាយ វណ្ណៈ និងលោក ឡាយ ណារិទ្ធ គឺលោក នី ចាន់ឌី បានលើកឡើងក្នុងសវនាការនោះថា បើតាមរបាយការណ៍និងភស្តុតាងរបស់នគរបាលបង្ហាញថា អ្នកនាង ចេវ សុវឌ្ឍនា ស្លាប់ដោយធ្វើអត្តឃាតខ្លួនឯង ដោយសារសាកសពមិនមានស្លាកស្នាមដែលបញ្ជាក់ថាមានប្រើអំពើហិង្សានិងមានរបួសស្នាមឡើយ ប៉ុន្តែចំណុចក្រោយនៃសេចក្ដីសន្និដ្ឋានបែរជាថាករណីនេះអាចជារឿងឃាតកម្មទៅវិញ។
លើសពីនេះ លោកថា បើតាមការបញ្ជាក់ពីក្រុមហ៊ុនទូរសព្ទ កូនក្ដីរបស់លោកបានជួបជនរងគ្រោះនៅម៉ោង៦ល្ងាច រួចចេញទៅវិញ ខណៈហេតុការណ៍បានកើតឡើងនៅម៉ោង៧យប់ ហើយមន្ត្រីជំនាញផ្នែកកោសលវិច័យក៏បង្ហាញដែរថា ការស្លាប់នេះមិនមែនជាអំពើឃាតកម្មទេ។ លោកបន្តថា ទោះបីជាមានរបាយការណ៍និងភស្តុតាងជាច្រើនដែលបញ្ជាក់ពីការដោះបន្ទុកក៏ពិតមែន ប៉ុន្តែសាលាឧទ្ធរណ៍មិនបានពិចារណានិងពិនិត្យមើលឡើយ។
លោក នី ចាន់ឌី ថា៖ «ចម្លើយសាក្សីមានការប្រែប្រួលច្រើនដង ហើយឧទ្ធរណ៍បានពិចារណាផ្នែកខ្លះនៃចម្លើយសាក្សី ប៉ុន្តែមិនបានពិចារណាទៅលើភស្តុតាងជាច្រើនដែលជាការដោះបន្ទុកកូនក្ដី។ អ៊ីចឹងខ្ញុំស្នើឱ្យតុលាការទម្លាក់ចោលរាល់បទចោទប្រកាន់លើកូនក្ដីខ្ញុំ»។
ចំណែក មេធាវី សេក សុវណ្ណា ការពារក្ដីឱ្យជនជាប់ចោទឈ្មោះ ម៉ែន សាម៉ៃ, ជឹម វុធ និង ចាន់ រី ក៏បានលើកឡើងថា សាលាឧទ្ធរណ៍មិនបានពិនិត្យមើលចម្លើយសាក្សីដែលឆ្លើយចំនួន៤ដង ប៉ុន្តែចម្លើយនោះបានខុសគ្នា ដោយចម្លើយទី១ និង២ សាក្សីបានរៀបរាប់ហេតុការណ៍កើតឡើងថា អ្នកនាង ចេវ សុវឌ្ឍនា បានធ្វើអត្តឃាតខ្លួនឯង បន្ទាប់ពីមានជម្លោះពាក្យសម្ដីជាមួយលោក ឡាយ វណ្ណៈ។
ប៉ុន្តែចម្លើយទី៣ និង៤ ដែលឆ្លើយនៅក្រសួងមហាផ្ទៃបែរជាឆ្លើយថា ករណីនេះជាអំពើឃាតកម្មវិញ ហើយការឆ្លើយបែបនេះអំឡុងពេលកូនរបស់សាក្សីត្រូវគេយកមករាជធានីភ្នំពេញដោយមិនដឹងមូលហេតុ។
មេធាវី សេក សុវណ្ណា ថា៖ «សាក្សី ចាន់ រី និង ជឹម វុធ ត្រូវបានគេបង្ខាំងរហូតដល់២២ថ្ងៃ ចំណុចនេះ តុលាការគួរពិចារណា។ ហើយមួយទៀត សាក្សី ខេង វណ្ណឌីន ដែលជាមន្ត្រីនគរបាលយុត្តិធម៌ បានទទួលស្គាល់ថាបានយកកូនប្រុសសាក្សីទាំងពីរមកភ្នំពេញ ដែលធ្វើឱ្យឈ្មោះ ចាន់ រី និង ជឹម វុធ ប្ដូរចម្លើយរបស់ខ្លួន។ ខ្ញុំស្នើសុំឱ្យតុលាការពិចារណាការសេចក្ដីសម្រេចរបស់សាលាឧទ្ធរណ៍ ដោយសារការសម្រេចនេះ មិនទាន់មានភាពច្បាស់លាស់»។
យ៉ាងណាក៏ដោយ អតីតអភិបាលខេត្តតាកែវ លោក ឡាយ វណ្ណៈ បានបដិសេធការចោទប្រកាន់របស់តុលាការ ដោយថា លោកមិនបានប្រព្រឹត្តបទល្មើសឡើយ។ លោកបន្តថា មូលហេតុដែលលោកឱ្យអ្នកបើកឡានយកទូរសព្ទនៅផ្ទះអ្នកនាង វឌ្ឍនា បន្ទាប់ពីនាងបានស្លាប់ ដោយសារទូរសព្ទនោះមានរូបភាពរបស់លោកនិងអ្នកនាង វឌ្ឍនា ជាច្រើន ហើយបើសិនជារូបថតទាំងនេះត្រូវបានបែកធ្លាយនោះ វានឹងធ្វើឱ្យប៉ះពាល់កិត្តិយសលោក។
លោកថា៖ «ចំពោះទូរសព្ទ វាជាចំណុចរសើបដែលខ្ញុំជាអភិបាលខេត្ត ព្រោះនៅក្នុងទូរសព្ទមានរូបខ្ញុំនិង វឌ្ឍនា ជាច្រើន។ បើសិនជារូបភាពនៅក្នុងទូរសព្ទបែកធ្លាយលើហ្វេសប៊ុកនោះ។ បើខ្ញុំសម្លាប់ វឌ្ឍនា ហេតុអ្វីខ្ញុំមិនយកទូរសព្ទមកតែម្ដង អាវខ្ញុំក៏នៅនោះដែរ ខ្ញុំមិនចាំបាច់ឱ្យអ្នកបើកឡានទៅយកទេ។ បើខ្ញុំសម្លាប់ វឌ្ឍនា មែន ប្រាកដជាមានស្លាកស្នាមលើគាត់ហើយ។ វឌ្ឍនា ជាមនុស្សដែលមានសាច់សដូចសំឡី ប៉ះបន្តិចមានស្នាមហើយ សូម្បីតែខ្ញុំកាន់ដៃគាត់ខ្លាំងបន្តិចក៏មានស្នាមដែរ ប៉ុន្តែខ្លួនគាត់គ្មានស្នាមទេ។ គាត់មិនដេកឱ្យខ្ញុំសម្លាប់ស្រួលអ៊ីចឹងដែរ»។
លោក ឡាយ ណារិទ្ធ បានបដិសេធចំពោះការចោទប្រកាន់របស់តុលាការថ្នាក់ក្រោម និងស្នើសុំឱ្យទៅប្រធានក្រុមប្រឹក្សាឱ្យពិចារណាចំពោះរបាយការណ៍នគរបាលយុត្តិធម៌ ដោយថា មិនបានឆ្លុះបញ្ចាំងការពិត។
លោកថា៖ «បើសិនជាប៉ូលិសនៅក្រសួងមហាផ្ទៃមកចោទខ្ញុំអ៊ីចឹង ហេតុអ្វីបានជាមិនឆែក Location ទូរសព្ទដៃខ្ញុំ បើចង់ដឹងថាខ្ញុំនៅណានោះ។ ហេតុអ្វីបានបិទ Location ខ្ញុំ ហើយដាក់នៅក្នុងទូរសព្ទប្អូនខ្ញុំវិញ។ តើមន្ត្រីនគរបាលក្រសួងមហាផ្ទៃមានចេតនាយ៉ាងម៉េច យក Location តែរបស់ប្អូនខ្ញុំ? ហេតុអីមិនយក Location ខ្ញុំ? តើបាត់ទៅណា?»
ចំណែកឪពុករបស់អ្នកនាង ចេវ សុវឌ្ឍនា គឺលោក ចេវ សារ៉េត បានបដិសេធចំពោះការលើកឡើងរបស់មេធាវីដែលថាកូនស្រីខ្លួនអត្ដចរិតឆេវឆាវនិងចង់ធ្វើអត្តឃាតខ្លួនច្រើន។ លោកស្នើទៅប្រធានក្រុមប្រឹក្សាតុលាការកំពូលឱ្យជួយរកយុត្តិធម៌ដល់គ្រួសារនិងកូនស្រីរបស់លោក។
លោកថា៖ «តុលាការរកឃើញយ៉ាងម៉េច អាស្រ័យលើតុលាការ ព្រោះខ្ញុំមិនបានស្ថិតនៅនិងឃើញហេតុការណ៍នោះទេ។ ខ្ញុំសូមឱ្យតុលាការសម្រេចដោយសុភវិនិច្ឆយ ផ្ដល់យុត្តិធម៌ឱ្យកូនស្រីខ្ញុំ»។
ក្រោយស្ដាប់សេចក្ដីសន្និដ្ឋានមេធាវីការពារក្ដីនិងជនជាប់ចោទនោះ ប្រធានក្រុមប្រឹក្សាជំនុំជម្រះ លោក និល ណុល បានសម្រេចលើកពេលប្រកាសសាលដីកាទៅថ្ងៃទី២៤ ខែធ្នូ ឆ្នាំ២០២១ខាងមុខនេះ។
អ្នកនាំពាក្យរបស់សមាគមការពារសិទ្ធិមនុស្សអាដហុក លោក ស៊ឹង សែនករុណា យល់ថា មេធាវី និងជនជាប់ចោទមានសិទ្ធិក្នុងការការពារខ្លួន ប៉ុន្តែការសម្រេចបែបណានោះ អាស្រ័យទៅលើចៅក្រម។
លោកថា៖ «ជាគោលការណ៍យុត្តិធម៌ ភាគីទាំងអស់មានសិទ្ធិក្នុងការការពារខ្លួន តាមរយៈការលើកឡើងទាំងសម្អាងហេតុ ភស្តុតាងផ្សេងៗ ដើម្បីបញ្ជាក់ភាពស្អាតស្អំ ថារឿងហ្នឹងវាកើតឡើងរបៀបម៉េច! ហើយពាក់ព័ន្ធបញ្ហាទាំងអស់ហ្នឹង វាមានភាពអយុត្តិធម៌អ្វីខ្លះ ពិតជាមានការលើកឡើងហើយ។ ធម្មតាការសម្រេចសេចក្ដីអាស្រ័យលើចៅក្រមជំនុំជម្រះហ្នឹង ជាអ្នកសម្រេច ជាអ្នកពិចារណាទេ ថាតើជឿជាក់ទៅលើការលើកឡើងទាំងអស់ហ្នឹងក្នុងកម្រិតណា»។
អតីតអភិបាលខេត្តតាកែវ លោក ឡាយ វណ្ណៈ និងលោក ឡាយ ណារិទ្ធ ត្រូវបានចាប់ខ្លួនពាក់ព័ន្ធសំណុំរឿងឃាតកម្មលើអ្នកស្រី ចេវ សុវឌ្ឍនា កាលឆ្នាំ២០១៨។ ក្រោយមក ចៅក្រមសាលាដំបូងរាជធានីភ្នំពេញ បានសម្រេចផ្ដន្ទាទោសលោក ឡាយ វណ្ណៈ ជាប់ពន្ធនាគារ១៣ឆ្នាំ និងលោក ឡាយ ណារិទ្ធ ជាប់ពន្ធនាគារ១០ឆ្នាំ ពីបទ«ឃាតកម្ម» ។
ចំណែកបុរសឈ្មោះ ម៉ែន សាម៉ៃ ដែលជាអ្នកបើកបររថយន្តឱ្យលោក ឡាយ វណ្ណៈ និងបុរសឈ្មោះ ជឹម វុធ ដែលជាប្ដីរបស់ស្ត្រីអ្នកបម្រើនៅផ្ទះរបស់អ្នកស្រី ចេវ សុវឌ្ឍនា ក៏ត្រូវបានតុលាការកាត់ទោសឱ្យជាប់ពន្ធនាគារម្នាក់ៗ២ឆ្នាំផងដែរ ក្រោមបទចោទថាបានលាក់កំបាំងតម្រុយ៕
