ធនាគារពិភពលោក (World Bank) បានព្យាករថា កំណើនសេដ្ឋកិច្ចកម្ពុជានៅឆ្នាំ២០២២ នឹងកើនឡើងជាង៤% នៅក្នុងករណីដែលកម្ពុជាមិនមានការរាតត្បាតជំងឺកូវីដ-១៩ជាថ្មី ខណៈកំណើនសេដ្ឋកិច្ចនៅឆ្នាំ២០២១នេះ សម្រេចបានត្រឹមតែ២,២%ប៉ុណ្ណោះ។
យោងតាមរបាយការណ៍ស្ដីពីបច្ចុប្បន្នភាពចុងក្រោយនៃស្ថានភាពសេដ្ឋកិច្ចរបស់កម្ពុជា ក្រោមចំណងជើងថា «រស់ជាមួយកូវីដ-១៩» (Living with COVID-19) ចេញផ្សាយនៅល្ងាចថ្ងៃម្សិលមិញ បានឱ្យដឹងថា ផលិតផលសរុបក្នុងស្រុក (ផ.ស.ស) របស់កម្ពុជា នៅឆ្នាំ២០២១នេះ ត្រូវបានព្យាករថា នឹងមានកំណើនត្រឹមតែ២,២ភាគរយប៉ុណ្ណោះ ហើយមូលហេតុដោយសារវិស័យសេវាកម្ម រួមមាន វិស័យទេសចរណ៍ វិស័យសំណង់ និងអចលនទ្រព្យ នៅមានកំណើនយឺតនៅឡើយ។ ចំណែកឯវិស័យជាប្រពៃណីក្នុងការជំរុញកំណើន ជាពិសេសឧស្សាហកម្មកាត់ដេរ ទំនិញធ្វើដំណើរ និងស្បែកជើង និងឧស្សាហកម្មផលិតកង់ រួមទាំងវិស័យកសិកម្មផង នៅតែបន្តដើរតួនាទីសំខាន់ក្នុងការទ្រទ្រង់ដល់ការស្ដារសេដ្ឋកិច្ចឱ្យងើបឡើងវិញពីវិបត្តិកូវីដ-១៩។
តាមការព្យាករទុកសម្រាប់ពេលខាងមុខ កំណើនសេដ្ឋកិច្ចរបស់កម្ពុជានឹងបន្តងើបឡើងវិញ បន្ទាប់ពីវិធានការរឹតត្បិតពាក់ព័ន្ធនឹងកូវីដ-១៩ត្រូវបានដកចេញ។ ធនាគារនេះបានព្យាករថា នៅក្នុងឆ្នាំ២០២២ សេដ្ឋកិច្ចកម្ពុជាត្រូវបានរំពឹងទុកថា នឹងសម្រេចបានកំណើន ៤,៥% ប៉ុន្តែដំណើររើបឡើងវិញនេះនឹងជួបហានិភ័យទៅវិញ ប្រសិនបើមានការសាយភាពនៃវីរុសនេះជាថ្មីម្ដងទៀត។
បើតាមការផ្ដល់អនុសាសន៍របស់ធនាគារពិភពលោក ដើម្បីធ្វើឱ្យសេដ្ឋកិច្ចកម្ពុជាមានកម្លាំងស្ទុះងើបឡើងវិញ កម្ពុជាចាំបាច់ត្រូវធ្វើកំណែទម្រង់នូវផ្នែកសំខាន់ៗមួយចំនួន ដូចជា ការដាក់ចេញនូវវិធាននិងបទប្បញ្ញត្តិច្បាស់លាស់ស្ដីពីការរៀនរស់ជាមួយកូវីដ-១៩ ស្របតាម “គន្លងប្រក្រតីភាពថ្មី” វិធានការផ្នែកបទប្បញ្ញត្តិនិងផ្នែកសារពើពន្ធដែលជួយដល់ការរស់រានឡើងវិញរបស់វិស័យទេសចរណ៍ និងការដាក់ចេញជាបន្ទាន់នូវបទប្បញ្ញត្តិនានាសម្រាប់អនុវត្តច្បាប់វិនិយោគថ្មី។
របាយការណ៍នេះបានបន្ថែមទៀតថា កាលណាការងើបឡើងវិញនៃសេដ្ឋកិច្ចលេចចេញជារូបរាងហើយ កម្ពុជាអាចចាប់ផ្ដើមរៀបចំកែសម្រួលលំហសារពើពន្ធរបស់ខ្លួនឡើងវិញ ហើយជាមួយគ្នានោះ បន្តតាមដានមើលលើគុណភាពរបស់ធនធាន និងបង្កើនភាពទុកចិត្តលើប្រព័ន្ធធនាគារឱ្យបានកាន់តែប្រសើរឡើងថែមទៀត។
លោកស្រី ម៉ារីយ៉ាម សាលីម (Maryam Salim) ប្រធានគ្រប់គ្រងនៃធនាគារពិភពលោកប្រចាំប្រទេសកម្ពុជា មានប្រសាសន៍ដូច្នេះថា៖ «យើងទាំងអស់គ្នាបានដឹងហើយថា ពេលនេះ កម្ពុជាកំពុងតែរស់នៅជាមួយជំងឺកូវីដ-១៩ ប្រជាជនចំនួនច្រើនលើសលុបបានចាក់វ៉ាក់សាំងការពាររួច ហើយរដ្ឋាភិបាលក៏បានចាប់ផ្ដើមបើកប្រទេសឱ្យដំណើរការឡើងវិញសឹងតែគ្រប់ផ្នែកហើយដែរ ដោយបន្តអនុវត្តវិធានការការពារសុខភាពដែលមានជាធរមានស្រាប់»។
លោកស្រីបន្តថា៖ «នៅធនាគារពិភពលោកពេលនេះ យើងកំពុងតែរៀបចំធ្វើការពិនិត្យឡើងវិញនូវការបំពេញកិច្ច និងបទពិសោធន៍ [Performance and Learning Review] ដែលនឹងអាចឱ្យយើងពង្រឹងនិងសម្របភាពជាដៃគូរបស់យើងជាមួយកម្ពុជាឱ្យបានកាន់តែប្រសើរថែមទៀត ខណៈដែលប្រទេសនេះកំពុងខិតខំស្ដារសេដ្ឋកិច្ចឱ្យកាន់តែមានភាពស្វិតស្វាញ បន្ទាប់ពីរងផលប៉ះពាល់ខ្លាំងពីការរាតត្បាតនៃជំងឺកូវីដ-១៩»។
របាយការណ៍នេះក៏មានជំពូកពិសេសមួយពិនិត្យទៅលើផលប៉ះពាល់នៃជំងឺកូវីដ-១៩ ទៅលើការរៀនសូត្រ និងការរកចំណូល។ ជំពូកពិសេសនេះបានឱ្យដឹងថា ការបិទសាលារៀនបាននាំមកនូវការខាតបង់ធំធេងនៅទូទាំងប្រទេស៕