ក្រសួងធនធានទឹក និងឧតុនិយម អំពាវនាវដល់ប្រជាពលរដ្ឋបង្កើនការយកចិត្តទុកដាក់ចំពោះការប្រែប្រួលអាកាសធាតុ ខណៈខេត្តមួយចំនួននឹងចុះត្រជាក់នៅអំឡុងសប្ដាហ៍ក្រោយ ដោយសារព្យុះទី២២ នឹងអាចមានឥទ្ធិពលនៅតំបន់ខ្ពស់រាបភាគឦសានប្រទេសកម្ពុជា។
សេចក្ដីជូនដំណឹងរបស់ក្រសួងធនធានទឹក និងឧតុនិយម ចុះថ្ងៃទី១៤ ខែធ្នូ ឆ្នាំ២០២១នេះ បានលើកឡើងថា ក្នុងសប្ដាហ៍ខាងមុខ កម្ពុជានឹងទទួលនូវឥទ្ធិពលសម្ពាធទាបខ្សោយ ទ្រនុងសម្ពាពខ្ពស់ពីជើង(ចិន) និងខ្យល់មូសុងឦសាន ហើយព្យុះទី២២ ឈ្មោះ រ៉ាយ (RAI) ដែលមានដំណើរឆ្លងកាត់ប្រទេសហ្វីលីពីន និងចិន រួចបន្តទៅប្រទេសវៀតណាម អាចនឹងមានឥទ្ធិពលបន្តិចបន្តួចមកលើតំបន់ខ្ពង់រាបភាគឦសានប្រទេសកម្ពុជា។
ក្រសួងបន្តថា ស្ថានភាពអាកាសធាតុនេះនឹងធ្វើឱ្យបណ្ដាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមាពី២៣ដល់២៥អង្សា និងសីតុណ្ហភាពអតិបរមាពី៣៤ទៅ៣៦អង្សា ដោយឡែកនៅថ្ងៃទី២០ និង២១ ខែធ្នូនេះ អាកាសធាតុចាប់ចុះត្រជាក់ចន្លោះពី១៧ទៅ ២៧អង្សា។ សម្រាប់បណ្ដាខេត្តជាប់ជួរភ្នំដងរែក និងខ្ពស់រាបឦសាន នឹងមានសីតុណ្ហភាពអប្បបរមាពី២២ទៅ២៤អង្សា និងសីតុណ្ហភាពអតិបរមាពី៣៣ដល់៣៦អង្សា ដោយឡែក នៅថ្ងៃទី២០ និង២១ ខែធ្នូ អាកាសធាតុនឹងចុះត្រជាក់ចន្លោះពី១៦ទៅ២៧អង្សា។
សម្រាប់តំបន់មាត់សមុទ្រ ក្រសួងថា សីតុណ្ហភាពអប្បបរមាពី២៣ទៅ២៥អង្សារ និងសីតុណ្ហភាពអតិបរមាពី៣៣ទៅ៣៥អង្សា ហើយសម្រាប់ថ្ងៃទី២០ និង២១ ខែធ្នូ សីតុណ្ហភាពចាប់ចុះត្រជាក់ក្នុងចន្លោះ១៩ទៅ២៩អង្សា៕