មន្រ្តីនាំពាក្យរដ្ឋាភិបាលបានបដិសេធចំពោះការលើកឡើងរបស់លោក សម រង្ស៊ី ដែលចង់ឃើញនាយករដ្ឋមន្ត្រីចាកចេញពីឆាកជីវិតនយោបាយក្នុងវ័យប្រមាណ៧០ឆ្នាំ។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ឱ្យដឹងនៅថ្ងៃចន្ទនេះថា ក្នុងនាមរដ្ឋាភិបាល មិនអាចកំណត់ថានាយករដ្ឋមន្ត្រី ត្រូវចុះចេញឬបន្តត្រឹមឆ្នាំនេះឬឆ្នាំនោះបានទេ។ លោកបន្តថា ជាការពិត រដ្ឋាភិបាលគឺមានអាណត្តិរបស់ខ្លួន ហេតុនេះការអំពាវនាវណាមួយរបស់លោក សម រង្ស៊ី ដែលចង់ឱ្យលោកនាយករដ្ឋមន្រ្តីចាកចេញពីជីវិតនយោបាយនៅត្រឹមអាយុ៧០ឆ្នាំនេះ ពិតជាមិនអាចទៅរួចឡើយ។
ក្នុងនាមជាយោបល់ផ្ទាល់ខ្លួន លោក ផៃ ស៊ីផាន យល់ឃើញថា សារអំពាវនាវរបស់អតីតប្រធានបក្សប្រឆាំង ដែលចង់ឱ្យអ្នកនយោបាយដែលមានវ័យកាន់តែចាស់ណាស់ទៅហើយ មានពេលសម្រាក គឺជាគំនិតផ្ដួចផ្ដើមល្អមួយ។
លោកបន្តថា៖ «ខ្ញុំឱ្យតម្លៃដែលថាអាយុ៧០[ឆ្នាំ]ហើយ លោក សម រង្ស៊ី ចង់បញ្ចប់នយោបាយរុកកួនខ្មែរ និងប្រមែប្រមូលបរទេសឱ្យមកធ្វើបាបខ្មែរ អាហ្នឹងគឺខ្ញុំសូមស្វាគមន៍។ នេះជាកាយវិកាមួយដែលផ្ដល់ផលប្រយោជន៍ដល់ប្រជាពលរដ្ឋ ក៏ដូចជាជាតិ ដើម្បីឱ្យជាតិនិងប្រជាពលរដ្ឋមានអនាគតឆ្ពោះទៅមុខថែមទៀត តាមរយៈថ្នាក់ដឹកនាំថ្មីជំនាន់ក្រោយ។ នេះខ្ញុំសូមស្វាគមន៍ដែលគាត់និយាយអ៊ីចឹង»។
បើទោះជាបែបណា លោក ផៃ ស៊ីផាន លើកឡើងថា ការអំពាវនាវរបស់លោក សម រង្ស៊ី នេះ វាពិតជាពិបាកកើតឡើងណាស់ ហើយមិនគួរយកមកប្រៀបធៀបនោះទេ ព្រោះក្នុងស្ថានភាពចំពោះមុខនេះ អតីតមេបក្សប្រឆាំងរូបនេះត្រូវហ៊ុមព័ទ្ធទៅដោយបណ្ដឹងតាមផ្លូវតុលាការរាប់មិនអស់ ខណៈលោកនាយករដ្ឋមន្ត្រី ហ៊ុន សែន គឺជាប្រមុខរដ្ឋាភិបាល ហើយស្ថិតនៅក្នុងអំណាចថែមទៀតផង។
ទាក់ទងរឿងនេះ មន្រ្តីដែលស្និទ្ធនឹងលោក សម រង្ស៊ី គឺលោក ម៉ែន សុថាវរិន្ទ្រ បញ្ជាក់ថា ជាឆន្ទៈពិតប្រាកដរបស់លោក សម រង្ស៊ី គឺលោកពិតជាគាំទ្រគំនិតផ្ដួចផ្ដើមរបស់លោកនាយករដ្ឋមន្ត្រី ហ៊ុន សែន ដែលចង់ឱ្យមានឈាមថ្មី ជាអ្នកបន្តវេននយោបាយ។ លោកបន្តថា អតីតប្រធានគណបក្សប្រឆាំងសន្យាថា លោកនឹងចាកចេញពីជីវិតនយោបាយដែរ ឱ្យតែលោក ហ៊ុន សែន ព្រមបញ្ចប់នយោបាយរបស់លោកត្រឹមអាយុ៧០ឆ្នាំនេះ។
លោកបន្តថា៖ «គាត់ [លោក សម រង្ស៊ី] និយាយហើយ ច្បាស់ហើយ […] ថាគាត់ឱ្យក្មេងជំនាន់ក្រោយធ្វើវិញម្ដង។ ប៉ុន្តែគណបក្សសង្រ្គោះជាតិ គេក៏មានអ្នកដែលបន្តវេនក្រោមតាមហ្នឹងដែរ យើងមានដូចគ្នា ហើយយើងនឹងរៀបអ្នកបន្តវេនដូចគ្នា»។
គិតត្រឹមឆ្នាំ២០២១នេះ លោកនាយករដ្ឋមន្រ្តី ហ៊ុន សែន មានអាយុ៦៩ឆ្នាំ ខណៈលោក សម រង្ស៊ី មានអាយុ៧២ឆ្នាំ។
ជារឿយៗ លោកនាយករដ្ឋមន្ត្រី ហ៊ុន សែន តែងប្រកាសជំហរថា លោកនឹងនៅតែជាបេក្ខភាពនាយករដ្ឋមន្រ្តីរហូតដល់ពេលណាដែលលោកលែងចង់ធ្វើ។ ថ្វីត្បិតលោកបានប្រកាសបែបនេះក្ដី ប៉ុន្តែកាលពីដើមខែធ្នូនេះ លោក ហ៊ុន សែន បែរជាប្រកាសគាំទ្របេក្ខភាពកូនប្រុសច្បងរបស់លោក គឺលោក ហ៊ុន ម៉ាណែត ជាបេក្ខភាពនាយករដ្ឋមន្រ្តីក្នុងចំណោមបេក្ខភាពផ្សេងទៀតនៅក្នុងបក្សសម្រាប់ថ្ងៃអនាគត។
អ្នកវិភាគនយោបាយនិងសង្គម លោក គឹម សុខ យល់ឃើញថា ការសម្រេចចិត្តរបស់អតីតប្រធានមេបក្សប្រឆាំងនេះ ទំនងជាមិនអាចកើតឡើងបានទេ ព្រោះអ្នកសម្រេចចិត្តដ៏ធំក្នុងរឿងនេះ គឺលោក ហ៊ុន សែន ឯណោះទៅវិញទេ។ លោកបន្តថា ការប្រើប្រាស់យុទ្ធសាស្រ្តដូច្នេះរបស់លោក សម រង្ស៊ី ច្រើនតែហុចផ្លែផ្កាឱ្យលោកនាយករដ្ឋមន្រ្តីច្រើនជាង។
លោកបន្តថា៖ «ខ្ញុំមើលឃើញថា សេចក្ដីស្នើរបស់លោក សម រង្ស៊ី ទំនងជាមានមូលហេតុ២យ៉ាង ទី១ គាត់ហាក់ដូចជាលោតខុសពីយុទ្ធសាស្រ្តនយោបាយច្រើនពេក។ ហេតុដូច្នេះហើយ វាធ្វើឱ្យលោក ហ៊ុន សែន មានប្រៀបនៅក្នុងនយោបាយ បានន័យថា ការលោតខុសយុទ្ធសាស្រ្តច្រើនដងរបស់គាត់ កាន់តែហុចឱកាសឱ្យលោក ហ៊ុន សែន មានប្រៀបខ្លាំង។ ចំណុចទី២ នៅក្នុងដំណាក់កាលនេះ គាត់ដឹងអំពីការវិវត្តនយោបាយ។ ម៉្លោះហើយ ការកំណត់ពីអាយុចូលនិវត្តន៍របស់អ្នកនយោបាយ ទំនងជាលោក សម រង្ស៊ី មើលឃើញថា គាត់បាត់បង់លទ្ធភាពឱកាសធំក្នុងការប្រឡូកក្នុងឆាកនយោបាយកម្ពុជាឡើងវិញ »។
បើទោះជាបែបណា សម្រាប់លោក គឹម សុខ លើកឡើងថា ចំពោះច្បាប់កម្ពុជា មិនមានកំណត់អាយុសម្រាប់អ្នកនយោបាយចូលនិវត្តន៍នៅឡើយទេ ប៉ុន្តែបើមានការកំណត់អាយុចូលនិវត្តន៍នេះ អ្នកនយោបាយគួរជំរុញឱ្យមានការកំណត់អាណត្តិសម្រាប់នាយករដ្ឋមន្រ្តីវិញល្អជាង៕