កម្ពុជាបានរកឃើញករណីវិជ្ជមានកូវីដ-១៩បំប្លែងថ្មីឈ្មោះ «អូមីក្រុង» ជាលើកដំបូង លើស្ត្រីខ្មែរម្នាក់ដែលធ្វើដំណើរពីប្រទេសហ្គាណា (អាហ្វ្រិកខាងលិច) មកកម្ពុជា។
សេចក្ដីជូនដំណឹងរបស់ក្រសួងសុខាភិបាល ដែលចេញផ្សាយកាលពីយប់ថ្ងៃទី១៤ ខែធ្នូ ឆ្នាំ២០២១ បានឱ្យដឹងថា ករណីវិជ្ជមានកូវីដ-១៩ អូមីក្រុង នេះ ត្រូវបានរកឃើញលើស្ត្រីជនជាតិខ្មែរ អាយុ២៣ឆ្នាំ មានអាសយដ្ឋានស្នាក់នៅឃុំតាបុក ស្រុកបាវិត ខេត្តស្វាយរៀង។
ក្រសួងបន្តថា ស្ត្រីរូបនេះមានផ្ទៃពោះ១៥សប្ដាហ៍ រួចបានធ្វើដំណើរតាមជើងហោះហើរចេញពីប្រទេសហ្គាណា ឆ្លងកាត់តាមឌូបៃ និងថៃ រួចបន្តដំណើរមកដល់ប្រទេសកម្ពុជា នៅថ្ងៃទី១២ ខែធ្នូ ឆ្នាំ២០២១ ហើយបច្ចុប្បន្ន អ្នកជំងឺរូបនេះកំពុងសម្រាកព្យាបាលនៅមជ្ឈមណ្ឌលជាតិកំចាត់រោគរបេង និងហង់សិន ក្នុងរាជធានីភ្នំពេញ។
ជុំវិញករណីនេះដែរ ក្រសួងសុខាភិបាលក៏បានអំពាវនាវដល់ប្រជាពលរដ្ឋទាំងអស់ត្រូវបន្តអនុវត្តវិធានការការពារខ្លួនឱ្យបានម៉ត់ចត់ ជាពិសេសវិធានការ «៣កុំ ៣ការពារ» និងចាក់វ៉ាក់សាំងកូវីដ-១៩ ដើម្បីរួមគ្នាទប់ស្កាត់ការចម្លងវីរុសកូវីដ-១៩ នៅតាមសហគមន៍។
បើតាមក្រសួងសុខាភិបាល គិតត្រឹមព្រឹកថ្ងៃអង្គារម្សិលមិញ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២០ ៣៨២នាក់ ក្នុងនោះ អ្នកជំងឺព្យាបាលជាសះស្បើយចំនួន១១៦ ៧៣៤នាក់ អ្នកស្លាប់កើនដល់ចំនួន២ ៩៩២នាក់ និងករណីនាំចូលពីក្រៅប្រទេសចំនួន១៩ ៨៥៣នាក់៕