សមត្ថកិច្ចខេត្តកំពង់ឆ្នាំង អះអាងថា មន្ត្រីនគបាលជាន់ខ្ពស់២នាក់នៅខេត្តនេះ ត្រូវបានអង្គភាពប្រឆាំងអំពើពុករលួយ(ACU) ឃាត់ខ្លួននៅព្រឹកមិញនេះ ពាក់ព័ន្ធករណីរឈូសឆាយដីព្រៃលិចទឹកនៅតំបន់បឹងទន្លេសាបក្នុងភូមិសាស្ត្រខេត្តកំពង់ឆ្នាំង។
កាលពីថ្ងៃទី៣ ខែធ្នូនេះ រដ្ឋាភិបាលបានប្រគល់ភារកិច្ចឱ្យអង្គភាពប្រឆាំងអំពើពុករលួយ ធ្វើការស៊ើបអង្កេតស្រាវជ្រាវ និងចាត់វិធានការច្បាប់ ចំពោះអតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន និងដកហូតដីជាង២ ០០០ហិកតា ទុកជាសម្បត្តិរដ្ឋវិញ ខណៈមនុស្ស១៣នាក់ទៀត ក្នុងនោះ មានមន្ត្រីនគរបាលផងបានចេញសារភាព និងព្រមប្រគល់ដីជូនរដ្ឋវិញ។
អ្នកនាំពាក្យស្នងការដ្ឋាននគរបាលខេត្តកំពង់ឆ្នាំង លោក អៀ ប៊ុនធឿន ប្រាប់វីអូឌីនៅរសៀលថ្ងៃព្រហស្បតិ៍នេះថា អង្គភាពប្រឆាំងអំពើពុករលួយ បាននាំខ្លួនស្នងការរងនគរបាលខេត្តកំពង់ឆ្នាំង លោក ស៊ុំ សុជាតិ និងប្រធានការិយាល័យអន្តរាគមន៍នៃស្នងការនគរបាលខេត្ត លោក កែវ ណារុន នៅព្រឹកមិញនេះ ទៅសួរនាំពាក់ព័ន្ធការឈូសឆាយដីព្រៃលិចទឹក។
បើតាមកំណត់ហេតុកិច្ចប្រជុំក្រុមការងារអនុវត្តបទបញ្ជានាយករដ្ឋមន្ត្រីរបស់អាជ្ញាធរខេត្តកំពង់ឆ្នាំង កាលពីថ្ងៃទី២៩ ខែវិច្ឆិកា ឆ្នាំ២០២១ បានបញ្ជាក់ថា អ្នកកាន់កាប់អាស្រ័យផលដីព្រៃលិចទឹក ១៣នាក់ ដែលបានសារភាពនិងប្រគល់ដីជូនរដ្ឋវិញនោះ រួមមាន ស្នងការរងនគរបាលខេត្តកំពង់ឆ្នាំង លោក ស៊ុំ សុជាតិ មានដី៦៧៥ហិកតា, ប្រធានការិយាល័យអន្តរាគមន៍ នៃស្នងការនគរបាលខេត្តកំពង់ឆ្នាំង លោក កែវ ណារុន មានដី៣២ហិកតា, មេបញ្ជាការសឹករងស្រុកកំពង់លែង លោក យឹម សារ៉ាត់ មានដី៦០ហិកតា និងពលរដ្ឋផ្សេងទៀត ដែលមានផ្ទៃដីសរុប២ ០៥៨,៥ហិកតា។
វីអូឌី មិនទាន់អាចសុំការបញ្ជាក់បន្ថែមជុំវិញករណីនេះ ពីប្រធានអង្គភាពប្រឆាំងអំពើពុករលួយ លោក ឱម យិនទៀង បានទេ នៅថ្ងៃព្រសហ្បតិ៍នេះ។
មន្ត្រីជាន់ខ្ពស់ផ្នែកតស៊ូមតិ នៃសមាគមបណ្ដាញយុវជនកម្ពុជា លោក សាន់ ម៉ាឡា បានសាទរចំពោះអង្គភាពប្រឆាំងអំពើពុករលួយ ដែលបាននាំខ្លួនមន្ត្រីនគរបាលជាន់ខ្ពស់២នាក់នៅខេត្តកំពង់ឆ្នាំង ទៅសួរនាំពាក់ព័ន្ធការរំលោភដីព្រៃលិចទឹកដោយខុសច្បាប់នេះ។ ជាមួយគ្នានេះដែរ លោកក៏ជំរុញឱ្យអង្គភាពមួយនេះ នាំខ្លួនមន្ត្រី ឬអ្នកពាក់ព័ន្ធផ្សេងទៀត និងចាត់វិធានការច្បាប់ឱ្យបានតឹងរឹង ប្រសិនបើរកឃើញថាមានកំហុស។
លោកបន្ថែមថា៖ «ខ្ញុំសុំលើកទឹកចិត្តឱ្យACUពន្លឿននីតិវិធី ដើម្បីស្វែងរកអ្នកពាក់ព័ន្ធផ្សេងទៀតមកផ្តន្ទាទោសចំពោះមុខច្បាប់ ពីព្រោះខ្ញុំជឿថា មានជនខិលខូចដែលជាប់ពាក់ព័ន្ធច្រើនក្នុងរឿងនេះ ហើយ ACU ត្រូវតែត្រួតពិនិត្យទៅលើមន្ត្រីជំនាញ ឬមន្ទីរដែលមានដែនសមត្ថកិច្ចនៅក្នុងការគ្រប់គ្រងថែរក្សាព្រៃលិចទឹកហ្នឹង ពីព្រោះប្រសិនបើគ្មានការបើកដៃឬក៏គប់គិតគ្នារបស់ក្រុមមន្ត្រីពាក់ព័ន្ធទេ ក៏មិនអាចប្រព្រឹត្តអំពើរំលោភបំពាន ឬឈូសឆាយដីព្រៃលិចទឹកនេះបានដែរ»។
មាត្រា៩៨ នៃច្បាប់ស្ដីពីជលផល បានចែងថា ការកាប់ឆ្ការ គាស់រាន ឈូសឆាយព្រៃលិចទឹក និងព្រៃកោងកាង ឬហ៊ុមព័ទ្ធកាន់កាប់ព្រៃលិចទឹក និងព្រៃកោងកាង ត្រូវផ្ដន្ទាទោសពី៣ឆ្នាំទៅ៥ឆ្នាំ ហើយវត្ថុតាងទាំងអស់ត្រូវរឹបអូសជាសម្បត្តិរដ្ឋឬបំផ្លាញចោល។ ចំណែកមាត្រា១០២ នៃច្បាប់ដដែលនេះបានបញ្ជាក់ថា បើបទល្មើសនោះប្រព្រឹត្តឡើងដោយអាជ្ញាធរដែនដី មន្ត្រីនគរបាល មន្ត្រីយោធា និងមន្ត្រីពាក់ព័ន្ធផ្សេងទៀត ត្រូវផ្ដន្ទាទោសពី១ឆ្នាំទៅ៣ឆ្នាំ និងពិន័យជាប្រាក់ពី៥លានរៀល ទៅ៥០លានរៀល៕