តាមបណ្ដោយច្រាំងទន្លេសាប នៅម្ដុំគីឡូម៉ែត្រលេខ៩ ខណ្ឌឬស្សីកែវ រាជធានីភ្នំពេញ នាវេលាម៉ោង៩ព្រឹក សំឡេងអ៊ូអរបានបន្ទឺឡើង ស្របពេលក្លិនឆ្អាបត្រី ក៏ចាប់ផ្តើមសាយភាយក្លិនឡើងដែរ។ មនុស្សចាស់ក្មេង ស្រីប្រុស កំពុងមមាញឹកប្រមូលផលត្រីដែលបានមកពីអ្នកនេសាទក្នុងរដូវត្រីនាឆ្នាំនេះ ដោយទឹកមុខញញឹមញញែម ខណៈផលត្រីនៅឆ្នាំនេះ ត្រូវបានប្រជានេសាទបញ្ជាក់ថា សម្បូរជាងឆ្នាំមុន ហើយតម្លៃក៏ចុះថោកជាងឆ្នាំមុនដែរ។
រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១២ ខែធ្នូ ឆ្នាំ២០២១នេះ បានបញ្ជាក់ថា នៅរដូវនេសាទឆ្នាំ២០២១-២០២២ គន្លងដាយនៅតាមដងទន្លេសាបក្នុងភូមិសាស្ត្រខេត្តកណ្ដាល និងរាជធានីភ្នំពេញ អាចនេសាទត្រីបានច្រើនចាប់ពីខែមិគសិរនេះ ពោលគឺចាប់ពីថ្ងៃទី១២ ខែធ្នូ រហូតដល់ថ្ងៃទី១៦ ខែធ្នូ ឆ្នាំ២០២១ ប្រសិនបើមេឃស្រឡះល្អ គ្មានភ្លៀងកក់ខែ ឬទទួលរងឥទ្ធិពលព្យុះ។
ប្រជានសាទ និងអ្នកឈ្មួញកណ្ដាល ទទួលទិញត្រីពីអ្នកនេសាទគ្នាឯងផងនោះ លោក គង់ បុង បាននិយាយទាំងសំឡេងខ្សាវៗថា រដូវត្រីនាឆ្នាំនេះ អាចមានរយៈពេលដល់១០ថ្ងៃ បើទោះបីជាខាងរដ្ឋបាលជលផល ប្រាប់ថា ត្រីត្រូវមានរយៈពេលតែ៥ថ្ងៃក្តី។
លោកបន្តថា ទិន្នផលត្រីអាចកើនឡើងនាឆ្នាំនេះ ប៉ុន្តែតម្លៃចុះថោកជាងឆ្នាំមុនបន្តិច។
លោកថា កាលពីឆ្នាំមុន តម្លៃត្រីដែលកាត់ក្បាល និងធ្វើរួចសម្រាប់យកទៅធ្វើប្រហុកតែម្តង មានតម្លៃចន្លោះពី ៥ ០០០ទៅ ៧ ០០០រៀល ក្នុងមួយគីឡូ តែឆ្នាំនេះត្រីដែលកាត់ក្បាលនិងធ្វើរួច មានតម្លៃពីជាង ២ ០០០រៀល ទៅ ៤ ០០០រៀលប៉ុណ្ណោះក្នុងមួយគីឡូ។
លោកលើកឡើងថា៖ « ឆ្នាំទៅត្រីកាត់ហើយ ៤ ០០០ ទៅ ៥ ០០០រៀល ឆ្នាំទៅត្រីធ្វើហើយ ៦ ០០០រៀល ឆ្នាំនេះ៣ ០០០រៀល ជាងអីទេ ៤ ០០០អី។ វាខុសគ្នាឆ្ងាយហ្មងហាស»។
ឈរក្បែរទូកឈើដែលមានផ្ទុកត្រីស្រស់ក្នុងកញ្ឆេផងនោះ ឈ្មួញកណ្ដាលម្នាក់ លោក យេប សុបព្រី រស់នៅខណ្ឌឬស្សីកែវ និយាយថា តម្លៃត្រីឆ្នាំនេះធ្លាក់ចុះ ចំណែកឯផលត្រីដែលនេសាទបានភាគច្រើនតូចៗ។ លោកបន្ថែមទៀតថា ត្រីដែលលោកយកទៅលក់បន្តសម្រាប់ធ្វើត្រីប្រហុកមិនទាន់ធ្វើហើយ មានតម្លៃតែ ២ ៨០០រៀលក្នុងមួយគីឡូប៉ុណ្ណោះ។
លោកលើកឡើងថា៖ «ត្រីឆ្នាំនេះរកបានជាងឆ្នាំទៅ គ្រាន់តែវាអត់សូវធំ ត្រីច្រើនតែវាតូចៗ។ ឆ្នាំនេះតម្លៃទាបជាងឆ្នាំទៅ ត្រីខ្ញុំដឹកលក់នេះ ២ ៨០០រៀល តែបើឆ្នាំទៅត្រីវាតិច»។
រីឯឈ្មួញកណ្តាលម្នាក់ទៀត អ្នកស្រី ឡាស់ ណាត់ លើកឡើងថា ចំពោះទិដ្ឋផលត្រីនៅឆ្នាំនេះ មានការកើនឡើងជាងឆ្នាំមុនបន្តិច ដោយសារអ្នកនេសាទ នេសាទត្រីបានច្រើនគួរសម ហើយការប្រមូលទិញត្រីពីអ្នកនេសាទ ក៏បានច្រើនជាងឆ្នាំមុនដែរ ប៉ុន្តែនៅខ្វះអ្នកទិញបន្ត ដែលនាំឱ្យតម្លៃត្រីចុះថោក។
អ្នកស្រីលើកឡើងថា៖ «ឆ្នាំនេះរៀងគ្រាន់ រៀងសម្បូរតិច ឆ្នាំទៅដូចតែឆ្នាំនេះអ៊ីចឹង ដូចតែគ្នាទេ[…] អ្នកទិញមិនសូវចុះមក អ្នកស្រែគេមិនសូវចុះមកទិញអ៊ីចឹង! ឆ្នាំទៅ ៦ ០០០រៀលទៅ៧ ០០០រៀល»។
ពលរដ្ឋមកពីខេត្តកំពង់ចាម លោកស្រី ខាត់ ភក្ដី ដែលកំពុងទិញត្រីនៅម្តុំគីឡូម៉ែត្រលេខ៩ យកទៅធ្វើប្រហុកទុកសម្រាប់ហូបជាលក្ខណៈគ្រួសារ ឱ្យដឹងដែរថា ត្រីឆ្នាំនេះមានច្រើន ហើយតម្លៃអាចខុសពីឆ្នាំមុនតិចតួចប៉ុណ្ណោះ។
ទោះបីជាត្រីឆ្នាំនេះសម្បូរ និងមានតម្លៃសមរម្យក្តី ប៉ុន្តែពលរដ្ឋរូបនេះអះអាងថា អ្នកស្រីមិនបានទិញសម្រាប់ធ្វើប្រហុក ផ្អក ច្រើនដូចឆ្នាំមុនៗនោះទេ។
អ្នកស្រីលើកឡើងថា៖ «មានអីឆ្នាំនេះគួរសម តម្លៃក៏មិនសូវខុសគ្នាពីឆ្នាំមុនប៉ុន្មានដែរ វាប្រហែលៗគ្នាហ្នឹង ខុសគ្នាតិចតួចអីហ្នឹង។ ឆ្នាំនេះមិនសូវទិញទេ ដោយសារបានធ្វើទុកខ្លះតាំងត្រីមិនទាន់ត្រូវម្ល៉េះ អ៊ីចឹងយើងចេះតែសន្សំទៅលុយមិនសូវមានច្រើន ទិញបានតិចតួចហ្នឹង រាល់ឆ្នាំយ៉ាងតិចក៏ ៥០ទៅ៦០គីឡូដែរ ឆ្នាំនេះ បានតា៣០គីឡូទេ លុយមិនដល់ ស្ដាយដែរហ្នឹង»។
នាយកខណ្ឌរដ្ឋបាលជលផលរាជធានីភ្នំពេញ លោក ងិន ឌី បានឱ្យដឹងថា រយៈពេលបីថ្ងៃនៃរដូវត្រីត្រូវឆ្នាំនេះ សម្រាប់ទីតាំងនៅខេត្តកណ្ដាល ដែលជាផ្នែកខាងក្រោមទទួលបានផលត្រីខ្សោយជាងផ្នែកខាងលើ បើប្រៀបធៀបតាមជួរដងទន្លេនៃរាជធានីភ្នំពេញ ដែលមានការកើនឡើងបន្តិចនោះ។
លោកលើកឡើងថា៖ «យើងមិនទាន់បានបូកសរុបអីទេ ព្រោះរយៈបីថ្ងៃនេះណា! បើយើងគិតមួយម៉ោង វាអាចបាន ៤០០គីឡូ មួយម៉ោង៤០០គីឡូ ក្នុងចំណោម១គន្លងដាយ តែបរិមាណហ្នឹងវាអាចប្រែប្រួល ប្រែប្រួលទៅតាមគន្លងដាយមួយៗ»។
លោកបន្តថា៖ «វាទាក់ទងចរន្តទឹកផង ខ្សែទឹកផង ហើយបើជួរលេខបួនដូចជាឃើញថា ត្រូវជាង វាអាច៥០០ទៅ៦០០ក្នុងមួយលើកចឹងទៅណា។ អ៊ីចឹងបរិមាណវាអាចខុសគ្នាទៅតាមចំណុចមួយៗដោយសារខ្សែទឹក»។
លោក ងិន ឌី ឱ្យដឹងបន្ថែមថា តាមការប៉ាន់ស្មាន់ត្រីប្រហុក អាចត្រូវរហូតដល់ថ្ងៃទី១៩ខែធ្នូ។
ប្រធានសមាគមវារីវប្បករកម្ពុជា លោក សុខ រ៉ាដែន មានប្រសាសន៍ថា ឆ្នាំនេះទិន្នផលត្រីមានការកើនឡើងជាងឆ្នាំមុន ដែលបានមកពីការរួមចំណែកទប់ស្កាត់ការនេសាទខុសច្បាប់របស់អាជ្ញាធរ។ លោកបន្ថែមថា ការកើនឡើងទិន្នផលត្រីប្រហុកនេះ នឹងធ្វើឱ្យប្រជាពលរដ្ឋអាចធ្វើប្រហុក ផ្អក បានច្រើនដើម្បីបម្រុងទុក ក្នុងតម្លៃធូរថ្លៃ។
លោកលើកឡើងថា៖ «ខ្ញុំក៏ត្រេកអរចំពោះសមិទ្ធផលដែលយើងត្រូវត្រីប្រហុកហ្នឹង ប្រជាពលរដ្ឋយើងមានមធ្យោបាយ ដើម្បីធ្វើត្រីប្រហុកដើម្បីបម្រុងទុក ហើយក៏ធូរថ្ងៃ ហើយក៏ល្អទៅដល់គាត់»។
កាលពីឆ្នាំមុន រដូវត្រីត្រូវ ឬការនេសាទត្រីបានច្រើន គឺមានរយៈពេល១សប្តាហ៍ ដោយគិតចាប់ពីថ្ងៃទី១៤ ដល់ទី២០ ខែធ្នូ៕