អាជ្ញាធរជាតិអប្សរា រៀបចំព្រឹត្តិការណ៍រំឭកគុណអង្គរជារៀងរាល់ឆ្នាំ ដើម្បីបណ្ដុះស្មារតីមោទកភាពជាតិដល់យុវជន និងជំរុញឱ្យមានការចូលរួមថែរក្សាប្រាសាទអង្គរវត្ត ដោយដឹងគុណចំពោះបុព្វបុរសដែលបានកសាងប្រាង្គប្រាសាទជាច្រើន។
អ្នកនាំពាក្យអាជ្ញាធរជាតិអប្សរា លោក ឡុង កុសល បានឱ្យដឹងថា ក្នុងឆ្នាំ២០២១នេះ គឺជាឆ្នាំដំបូងដែលកម្ពុជាបានរៀបចំព្រឹត្តិការណ៍រំឭកគុណអង្គរនេះឡើង ដោយមានរយៈពេល៥ថ្ងៃ ចាប់ផ្ដើមនៅថ្ងៃទី១២ ដល់ថ្ងៃទី១៦ ខែធ្នូ។
លោកថា គោលបំណងនៃព្រឹត្តិការណ៍នេះ ដើម្បីដឹងគុណចំពោះអតីតព្រះមហាក្សត្រគ្រប់អង្គ ដែលបានកសាងប្រាង្គបា្រសាទបន្សល់ទុកដល់មនុស្សជំនាន់ក្រោយ ជាពិសេសប្រាសាទអង្គរវត្ត និងដឹងគុណដល់អ្នកដែលបានចូលរួមថែរក្សាអភិរក្សជួសជុលដល់ប្រាង្គបា្រសាទនេះ។
មួយវិញទៀត លោកថា គឺចង់បំផុសឱ្យពលរដ្ឋ ជាពិសេសយុវជនមានមោទកភាពជាតិ និងជំរុញឱ្យយុវជនជំនាន់ក្រោយចូលរួមថែរក្សាកេរមរតកដែលដូនតាបានបន្សល់ទុកមក។
លោក ឡុង កុសល បញ្ជាក់ថា៖ «យើងធ្វើហ្នឹងដើម្បីបំផុសមោទកភាពជាតិ ក្នុងនាមយើងជាកូនខ្មែរដែលទទួលបាននូវកេរមរតកវប្បធម៌ដ៏អស្ចារ្យពីបុព្វការីជន។ យើងទាំងអស់គ្នា ក្នុងពេលបច្ចុប្បន្ន និងពេលអនាគត ត្រូវចូលរួមបណ្ដុះសា្មរតីយុវជនឱ្យចេះស្រឡាញ់ ចូលរួមថែរក្សា ការពារ បេតិកភណ្ឌ វប្បធម៌ ទំនៀមទម្លាប់ ប្រពៃណី ដ៏ផូរផង់របស់យើងហ្នឹង»។
អ្នកនាំពាក្យអាជ្ញាធរជាតិអប្សរារូបនេះបានឱ្យដឹងទៀតថា ក្នុងថ្ងៃនីមួយៗនៃព្រឹត្តិការណ៍នេះ ក៏មានរៀបចំពិធីបួងសួង រាប់បាត្រ ការធ្វើសមាធិ សម្ដែងសិល្បៈ និងបានបង្ហាញសមិទ្ធផលការងារដែលអាជ្ញាធរជាតិអប្សរាបានធ្វើនាពេលកន្លងមក ដោយថា ក្នុងរយៈពេល៥ថ្ងៃ មានពលរដ្ឋចូលប្រមាណជាង៤ម៉ឺននាក់ ។
លោកបន្តថា៖ «ឆ្នាំហ្នឹងជាឆ្នាំសាកល្បង ប៉ុន្តែសម្រាប់ឆ្នាំក្រោយទៅ យើងនឹងត្រៀមរៀបចំជាព្រឹត្តិការណ៍ប្រចាំឆ្នាំ អាចនឹងមានជារៀងរាល់ឆ្នាំបន្តទៅ»។
ថ្លែងក្នុងពិធីបើកព្រឹត្តិការណ៍រំឭកគុណអង្គរ នៅខេត្តសៀមរាប រដ្ឋមន្រ្តីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា មានប្រសាសន៍ថា ព្រឹត្តិការណ៍នេះក៏នឹងជំរុញឱ្យមានភ្ញៀវជាតិនិងអន្តរជាតិចូលរួមទស្សនាអង្គរ យ៉ាងហោចណាស់បាន១ដងក្នុងម្នាក់ជារៀងរាល់ឆ្នាំ។ លោកស្រីបន្តថា ពលរដ្ឋខ្មែរគ្រប់រូបមានកាតព្វកិច្ចក្នុងការចូលរួមអភិរក្សនិងការពារប្រាសាទអង្គរវត្ត។
លោកស្រីថ្លែងថា៖ «អត្ថន័យសំខាន់ផ្សេងទៀតនៃព្រឹត្តិការណ៍នេះ ក្រៅពីក្នុងគោលដៅលើកស្ទួយពាក្យស្លោកកម្ពុជាព្រះរាជាណាចក្រអច្ឆរិយៈ ក៏ដើម្បីបង្ហាញនូវមោទកភាពជាតិដែលជាប្រទេសមហាវប្បធម៌ និងមានប្រវត្តិសាស្រ្តយូរលង់ណាស់មកហើយ»។
លោកស្រី សាក់ កន្និការ មន្រ្តីតស៊ូមតិផ្នែកសិល្បៈ នៃអង្គការកម្មវិធីអភិវឌ្ឍន៍ធនធានយុវជន ( YRDP) បានលើកឡើងថា យុវជនមានតួនាទីយ៉ាងសំខាន់ក្នុងការបន្តវេនថែរក្សាមរតកដូនតាបានបន្សល់ទុកមក។ លោកស្រីបង្ហាញការសាទរចំពោះអាជ្ញាធរជាតិអប្សរាដែលបានរៀបចំព្រឹត្តិការណ៍នេះឡើង ដោយថា ជាផ្នែកមួយដើម្បីលើកទឹកចិត្តដល់ពលរដ្ឋកម្ពុជា ជាពិសេសយុវជនមានស្មារតីជាតិនិយម និងបង្កើននូវមោទកភាពជាតិ ដែលមានប្រាសាទអង្គរជាសម្បត្តិបេតិកភណ្ឌពិភពលោក។
លោកស្រី សាក់ កន្និការ បន្តថា៖ «វាជាប្រយោជន៍របស់មហាជនទូទៅ ជាពិសសគឺកូនខ្មែរ អាចឱ្យកូនខ្មែរមើលឃើញពីតម្លៃនិងសារៈសំខាន់ [ប្រាសាទអង្គរវត្ត] ទាំងអស់ហ្នឹង។ ហើយក៏ដូចជាការចូលរួមចំណែកក្នុងការកសាង ការពារនូវបា្រង្គប្រាសាទអង្គរវត្ត ដែលមានតម្លៃសម្រាប់ខ្លួន»។
របាយការណ៍របស់គ្រឹះស្ថានអង្គរ ដែលចេញផ្សាយនៅថ្ងៃទី១ ខែធ្នូ ឆ្នាំ២០២១នេះ បានឱ្យដឹងថា រយៈពេល១១ខែ ក្នុងឆ្នាំ២០២១ ចំនួនភ្ញៀវទេសចរបរទេសដែលបានទិញបណ្ណចូលទស្សនារមណីយដ្ឋានអង្គរ មានចំនួន៩ ៤៨៨នាក់ មានការធ្លាក់ចុះចំនួន៩៧,៦៣ភាគរយ បើប្រៀបធៀបក្នុងឆ្នាំ២០២០ ហើយទទួលបានចំណូលសរុបត្រឹមតែជិត៤០ម៉ឺនដុល្លារប៉ុណ្ណោះ (៣៨៥ ៦៩៦ដុល្លារ) ដោយក្នុងឆ្នាំ២០២០កន្លងទៅ កម្ពុជារកចំណូលបានពីរមណីយដ្ឋានអង្គរ ចំនួនជិត២០លានដុល្លារ (១៨ ៦៥៤ ៨២៨ដុល្លារ)។
បើតាមគេហទំព័ររបស់គ្រឹះស្ថានអង្គរ បានបញ្ជាក់ថា ភ្ញៀវទេសចរបរទេសម្នាក់ត្រូវចំណាយថវិកា ៣៧ដុល្លារ អាចចូលទស្សនារមណីយដ្ឋានអង្គរបានរយៈពេល១ថ្ងៃ និងត្រូវចំណាយ ៦២ដុល្លារ រយៈពេល៣ថ្ងៃ ហើយក្នុងការចូលទស្សនារយៈពេល៧ថ្ងៃ ត្រូវចំណាយ ៧២ដុល្លារ។
កាលពីថ្ងៃទី១៤ ខែធ្នូ ឆ្នាំ១៩៩២ រមណីយដ្ឋានអង្គរ ត្រូវបានដាក់បញ្ជូលជាសម្បត្តិបេតិភណ្ឌពិភពលោក របស់អង្គការយូណេស្កូ (UNESCO) នាទីក្រុងសាន់ហ្វេ សហរដ្ឋអាមេរិក ហើយគិតត្រឹមខែធ្នូ ឆ្នាំ២០២១នេះ គឺជាខួបលើកទី២៩ឆ្នាំហើយ៕