ចាងហ្វាងកាសែតជាតិខែ្មរម្នាក់ ស្នើទៅតុលាការកំពូលដោះលែងខ្លួនឱ្យមានសេរីភាព ខណៈទោសដែលខ្លួនអនុវត្តក្នុងពន្ធនាគារនៅសល់តែ១១ថ្ងៃទៀតផុតតាមការកំណត់របស់តុលាការ។
ចាងហ្វាងកាសែតជាតិខែ្មរ លោក រស់ សុឃិត ត្រូវបានសាលាដំបូងរាជធានីភ្នំពេញ បានផ្ដន្ទាទោសចាងហ្វាងកាសែតជាតិខែ្មររូបនេះ ដាក់ពន្ធនាគារ១ឆ្នាំ៨ខែ និងពិន័យជាប្រាក់ចំនួន២លានរៀល ពាក់ព័ន្ធនឹងការបង្ហោះសាររិះគន់ប្រមុខរាជរដ្ឋាភិបាលនៅក្នុងបណ្ដាញសង្គមកាលពីឆ្នាំ២០២០។
តុលាការកំពូល នៅថ្ងៃសុក្រនេះ បានបើកសវនាការលើបណ្ដឹងសារទុក្ខមេធាវីការពារក្ដីឱ្យលោក រស់ សុឃិត ក្រោយពីសាលាឧទ្ធរណ៍បានតម្កល់សេចក្ដីសម្រេចរបស់សាលាដំបូងរាជធានីភ្នំពេញទុកជាបានការដដែល។
ឈរនៅរង្វង់ក្រចកសេះក្នុងសម្លៀកបំពាក់ពណ៌ស្លាទុំ លោក រស់ សុឃិត បានប្រាប់ក្រុមប្រឹក្សាជំនុំជម្រះនៃតុលាការកំពូលថា សារដែលគាត់សរសេរលើទំព័រហ្វេសប៊ុកមិនមានចេតនាញុះញង់បង្កភាពវឹកវរដល់សង្គមឡើយ ដោយថា ការសរសេរសារនេះគ្រាន់តែជាបញ្ចេញមតិ និងចង់ឱ្យអ្នកតាមដានលើហ្វេសប៊ុកចាប់អារម្មណ៍លើផេករបស់ខ្លួនតែប៉ុណ្ណោះ។
លោកបន្តថា ចំពោះមូលហេតុដែលលោកប្ដឹងសារទុក្ខ ដោយយល់ថា ការសម្រេចសេចក្ដីរបស់តុលាការថ្នាក់ក្រោម ដែលដាក់ទោសលោករហូតដល់១ឆ្នាំ៨ខែនេះ ជារឿងធ្ងន់ធ្ងរ ទាំងដែលលោកមិនមានចេតនានិងគោលបំណងធ្វើឱ្យសង្គមវឹកវរដូចការចោទប្រកាន់របស់តុលាការឡើយ។
ករណីនេះ លោកស្នើទៅតុលាការដោះលែងលោកឱ្យមានសេរីភាពវិញ ដោយថា គិតចាប់តាំងពីថ្ងៃចាប់ខ្លួនរហូតដល់ពេលនេះ នៅសល់តែ១១ថ្ងៃទៀតប៉ុណ្ណោះ លោកអនុវត្តទោសចប់តាមការកំណត់របស់តុលាការ។
ក្រោយពីស្ដាប់សេចក្ដីសន្និដ្ឋានរបស់តំណាងអយ្យការ និងមេធាវីការពារក្ដី រួមទាំងចម្លើយជនជាប់ចោទរួចមក ប្រធានក្រុមប្រឹក្សាជំនុំជម្រះនៃតុលាការកំពូល លោក និល ណុន បានសម្រេចប្រកាសសាលដីកា នៅថ្ងៃទី២៤ ខែធ្នូ ឆ្នាំ២០២១ ខាងមុខ។
បន្ទាប់ពីបញ្ចប់សវនាការ លោក រស់ សុឃិត បានប្រាប់អ្នកសារព័ត៌មានថា ការចោទប្រកាន់និងចាប់ខ្លួនលោកដាក់ពន្ធនាគាររហូតដល់១៨ខែនេះ ជារឿងអយុត្តិធម៌សម្រាប់រូបលោកនិងគ្រួសារ។
លោកថា៖ «ទោសក្នុងពន្ធនាគាររបស់ខ្ញុំនៅសល់តែ១១ថ្ងៃទៀតទេ នឹងត្រូវដោះលែងហើយ។ ខ្ញុំនឹងបន្តអាជីពជាអ្នកសារព័ត៌មានបន្តទៀត ព្រោះក្រសួងព័ត៌មានមិនទាន់លុបអាជ្ញាបណ្ណផ្ដល់ឱ្យខ្ញុំទេ។ ខ្ញុំបន្ត ព្រោះខ្ញុំចង់លើកស្ទួយវិស័យសារព័ត៌មាននៅកម្ពុជាឱ្យល្អប្រសើរជាងមុន»។
មេធាវីការពារក្ដីឱ្យលោក រស់ សុឃិត គឺលោក សំ សុគង់ ប្រាប់អ្នកសារព័ត៌មានបន្ទាប់ចេញពីសវនាការថា គោលបំណងនៃការប្ដឹងសារទុក្ខនេះ ចង់ស្នើឱ្យតុលាការកំពូលសម្រាលទោស ហើយលុបចោលប្រាក់ពិន័យ២លានរៀល និងសុំសម្ភារ ដូចជា កុំព្យូទ័រ ទូរសព្ទ ដែលសមត្ថកិច្ចរឹបអូសមកវិញផងដែរ។
លោកបន្តថា គិតមកដល់ថ្ងៃនេះ កូនក្ដីរបស់លោកបានអនុវត្តទោសជិតគ្រប់តាមការកំណត់របស់តុលាការ ពោលគឺនៅសល់១១ថ្ងៃទៀតនឹងត្រូវដោះលែង។
លោកថា៖ «មកដល់ពេលនេះ គាត់អនុវត្តទោស១ឆ្នាំជិត៦ខែហើយ ដោយនៅសល់១១ថ្ងៃទៀតទេ នឹងផុតទោស។ អ៊ីចឹងចំពោះមេធាវីការពារ គឺមានបំណង់ចង់ឱ្យតុលាការកំពូលពិចារណាសម្រាលទោសគាត់ដែលនៅសល់ត្រឹមថ្ងៃប្រកាសសាលដីកាតែម្ដង។ បើគិតថ្ងៃប្រកាសសាលដីកាដែលតុលាការកំពូលប្រកាសថ្ងៃទី២៤ ខែធ្នូ គាត់នៅសល់តែ៤ថ្ងៃទេ»។
លោក រស់ សុឃិត ត្រូវបានចាប់ខ្លួនកាលពីខែមិថុនា ឆ្នាំ២០២០ ដែលការចាប់ខ្លួននេះបានធ្វើឡើងមួយថ្ងៃក្រោយពីអ្នកកាសែតរូបនេះបានបង្ហោះសារចំនួនពីរតាមទំព័រហ្វេសប៊ុករបស់លោក ដែលក្នុងនោះមានសារមួយសរសេរថា «លោក ហ៊ុន សែន នឹងបាត់បង់អ្វីៗទាំងអស់ បើនៅតែចចេសចង់លើកបន្តុបកូនខ្លួនធ្វើជានាយករដ្ឋមន្ត្រីនោះ! យួនមិនគាំទ្រ ហ៊ុន ម៉ាណែត ឡើយ»។
នាយកប្រតិបត្តិសមាគមអ្នកសារព័ត៌មានកម្ពុជា (ខេមបូចា) លោក ណុប វី មានប្រសាសន៍ថា ការយកបទ «ញុះញង់» មកចោទប្រកាន់លើអ្នកសារព័ត៌មាននាពេលកន្លងមក វាជាការបំភ័យដល់អ្នកសារព័ត៌មានដែលកំពុងអនុវត្តការងាររបស់ពួកគាត់ និងធ្វើឱ្យប៉ះពាល់ដល់សិទ្ធិសេរីភាពបញ្ចេញមតិ ដោយថា បើតាមគោលការណ៍ច្បាប់ ប្រជាពលរដ្ឋមានសិទ្ធិសេរីភាពផ្នែកសារព័ត៌មានផងនិងបញ្ចេញមតិផង។
លោកសង្កេតឃើញថា កន្លងមក ការចោទប្រកាន់ពីបទ «ញុះញង់» ភាគច្រើនធ្វើឡើងចំពោះអ្នកដែលបានប្រើប្រាស់សិទ្ធិសេរីភាពបញ្ចេញមតិ បើទោះបីជាការបញ្ចេញមតិរបស់ពួកគាត់ទាំងនោះ មិនបានបង្កព្យសនកម្មអ្វីក៏ដោយ។
លោកថា៖ «ពាក់ព័ន្ធនឹងអ្នកសារព័ត៌មាន តុលាការលោកគួរតែប្រើប្រាស់ច្បាប់ដែលជាក់លាក់ ច្បាប់ស្ដីពីរបបសារព័ត៌មានដែលយើងមានជាធរមាននៅឡើយ។ ចំណុចទី២ ចំពោះករណីនៃការចោទប្រកាន់ប្រឆាំងអ្នកសារព័ត៌មាន ឬអ្នកដែលបានប្រើប្រាស់សេរីភាព ដើម្បីបញ្ចេញមតិ ខ្ញុំយល់ឃើញថា តុលាការលោកគួរតែពិនិត្យនូវគោលការណ៍ច្បាប់អន្តរជាតិពាក់ព័ន្ធផ្សេងៗទៀត ដូចជា សេចក្ដីថ្លែងការណ៍ជាសកលស្ដីពីសិទ្ធិមនុស្ស ឬកតិកាស្ដីពីសិទ្ធិពលរដ្ឋនិងនយោបាយជាដើម ដែលធានាសិទ្ធិសេរីភាពបញ្ចេញមតិ ហើយរដ្ឋធម្មនុញ្ញយើងក៏មានធានាត្រង់ចំណុចទាំងអស់ហ្នឹងដែរ។ អ៊ីចឹងហើយតុលាការលោកគួរតែផ្អែកទៅលើច្បាប់អន្តរជាតិ និងរដ្ឋធម្មនុញ្ញរបស់យើង ដើម្បីយកមកពិនិត្យ ចំពោះករណីដែលត្រូវបានចោទប្រកាន់ទាំងអស់ហ្នឹង»។
របាយការណ៍ឃ្លាំមើលប្រចាំត្រីមាសជាលើកដំបូងរបស់សម្ព័ន្ធអ្នកសារព័ត៌មានកម្ពុជា (ខេមបូចា) ស្ដីពី «ស្ថានភាពអ្នកសារព័ត៌មាននៅកម្ពុជា» បានរកឃើញថា មានអ្នកសារព័ត៌មានជិត១០នាក់បានរងនូវការយាយីនិងជាប់ពន្ធនាគារ ដោយសារតែរាយការណ៍ពាក់ព័ន្ធរឿងជម្លោះដីធ្លី ក្នុងរយៈពេល៣ខែចុងក្រោយនេះ៕