ក្រសួងសុខាភិបាលបានរកឃើញវីរុសកូវីដ-១៩ បំប្លែងថ្មី «អូមីក្រុង» លើបុរសជនជាតិអៀរ៉ង់មួយករណីទៀត ដែលគិតមកដល់ថ្ងៃនេះ អ្នកឆ្លងជំងឺកូវីដ-១៩ អូមីក្រុងមានចំនួន ២ ករណីហើយនៅកម្ពុជា។
សេចក្ដីជូនព័ត៌មានរបស់ក្រសួងសុខាភិបាលចុះថ្ងៃទី១៧ ខែធ្នូ ឆ្នាំ២០២១ បានឱ្យដឹងថា បុរសជនជាតិអៀរ៉ង់ ដែលមានវិជ្ជមានកូវីដ-១៩ បំប្លែងថ្មីអូមីក្រុងនេះ បានធ្វើដំណើរតាមជើងហោះហើរ ពីប្រទេសកេនយ៉ា ឆ្ពោះទៅកាន់ទីក្រុងឌូបៃ និងបន្តដំណើរពីទីក្រុងឌូបៃ មកប្រទេសថៃ ទើបហោះហើរពីប្រទេសថៃមកដល់កម្ពុជា នៅថ្ងៃទី១៦ ខែធ្នូ ឆ្នាំ២០២១។
ក្រសួងដដែលថា បុរសអាយុ ២៥ ឆ្នាំរូបនេះ បានស្នាក់នៅសណ្ឋាគារមួយកន្លែង ក្នុងខណ្ឌដូនពេញ រាជធានីភ្នំពេញ។ ក្រសួងបញ្ជាក់ថា បច្ចុប្បន្នបុរសជនជាតិអៀរ៉ង់រូបនេះ ត្រូវបានក្រសួងដាក់ឱ្យសម្រាកព្យាបាលនៅមជ្ឈមណ្ឌលជាតិកម្ចាត់រោគរបេង និងហង់សិន ក្នុងរាជធានីភ្នំពេញ។
នេះជាករណីទី២ហើយ ដែលកម្ពុជាបានរកឃើញអ្នកឆ្លងវីរុសកូវីដ-១៩ បំប្លែងថ្មី អូមីក្រុង ដោយកាលពីថ្ងៃទី១៤ ខែធ្នូ ឆ្នាំ២០២១ កម្ពុជាបានរកឃើញជាលើកដំបូងលើស្ត្រីខ្មែរម្នាក់ ដែលត្រឡប់មកពីប្រទេសហ្គាណា ហើយបច្ចុប្បន្នអ្នកជំងឺរូបនេះ កំពុងសម្រាកព្យាបាលនៅមជ្ឈមណ្ឌលជាតិកម្ចាត់រោគរបេង និងហង់សិន៕
