អង្គសន្និបាតគណបក្សប្រជាជនកម្ពុជា បានសម្រេចបន្តគាំទ្រលោក ហ៊ុន សែន ជាបេក្ខភាពនាយករដ្ឋមន្ត្រី និងជ្រើសតាំងលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគត។
សេចក្ដីប្រកាសរបស់គណបក្សប្រជាជនកម្ពុជាអំពីលទ្ធផលនៃសន្និបាតគណៈកម្មាធិការកណ្ដាលលើកទី៤៣ នៅថ្ងៃទី២៤ ខែធ្នូ ឆ្នាំ២០២១នេះ ដោយបានសម្រេចបោះឆ្នោតបន្តគាំទ្រលោក ហ៊ុន សែន ជាបេក្ខភាពនាយករដ្ឋមន្ត្រី និងបានសម្រេចជាឯកច្ឆន្ទជ្រើសតាំងលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់ពេលអនាគត។
សេចក្ដីប្រកាសព័ត៌មានដដែលក៏បានប្រកាសពីការសម្រេចបោះឆ្នោតជ្រើសតាំងបន្ថែមលោក ទៀ បាញ់ និងលោកស្រី ម៉ែន សំអន ជាអនុប្រធានគណបក្ស និងពិភាក្សាអំពីកិច្ចការមួយចំនួនស្ដីពីការអនុវត្តផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២។ ក្រៅពីនោះ អង្គសន្និបាតក៏បានយល់ជ្រួតជ្រាបស៊ីជម្រៅអំពីខ្លឹមសារនៃទស្សនៈសភាពការណ៍ឆ្នាំ២០២១ និងទិសដៅភារកិច្ចសំខាន់ៗរបស់គណបក្សក្នុងឆ្នាំ២០២២។
អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា មានប្រសាសន៍នៅក្នុងសន្និសីទសារព័ត៌មាននៅថ្ងៃសុក្រនេះថា ការបោះឆ្នោតជ្រើសតាំងលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគតនេះ ដោយសារតែសមាជិកសមាជិកាបក្សមើលឃើញពីគុណសម្បត្តិ និងការសម្រេចបាននូវភារកិច្ចធំៗជាច្រើនរបស់លោក ហ៊ុន ម៉ាណែត ក្នុងផ្នែកការពារជាតិ ជាពិសេសការចូលរួមស្ដារសង្គម និងការទប់ស្កាត់វិបត្តិកូវីដ-១៩ ជាដើម។
លោកបន្តថា លោក ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគតតែម្នាក់ប៉ុណ្ណោះ ខណៈមិនមានសមាជិកបក្សផ្សេងទៀតឈរឈ្មោះជាបេក្ខភាពនាយករដ្ឋមន្ត្រីនាពេលអនាគត នៅក្នុងការបោះឆ្នោតរបស់អង្គសន្និបាតគណបក្សនោះទេ។
ចំពោះការសម្រេចជ្រើសតាំងអនុប្រធានគណបក្សបន្ថែមចំនួន២រូបទៀតនោះ លោក សួស យ៉ារ៉ា បញ្ជាក់ថា ដោយសារគណបក្សនេះមានសាមគ្គីភាពល្អ និងត្រូវការព្រឹទ្ធបុរសបន្ថែមទៀតក្នុងការដឹកនាំគណបក្សឱ្យកាន់តែរឹងមាំបន្ថែមទៀត។
ជាមួយគ្នានេះដែរ លោកថា ក្នុងអង្គសន្និបាតនោះ លោកនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជនកម្ពុជា ក៏បានថ្លែងនូវសារនយោបាយសំខាន់ៗមួយចំនួនផងដែរ ក្នុងនោះ លោកនាយករដ្ឋមន្ត្រីបានបង្ហាញពីឆន្ទៈក្នុងការបន្តរក្សាឱ្យបាននូវសន្តិភាព ស្ថិរភាពនយោបាយជូនប្រទេសជាតិនិងប្រជាជន និងការការពារអាយុជីវិតប្រជាជនក្នុងអំឡុងវិបត្តិជំងឺកូវីដ-១៩នេះ។
អ្នកនាំពាក្យគណបក្សរូបនេះបន្តថា ក្រៅពីនោះ លោកនាយករដ្ឋមន្ត្រី ហ៊ុន សែន ក៏បានបង្ហាញការប្ដេជ្ញាចិត្តក្នុងការរក្សាលំនឹងសេដ្ឋកិច្ច ស្ដារសេដ្ឋកិច្ចនិងជីវភាពប្រជាពលរដ្ឋឡើងវិញពីវិបត្តិកូវីដ-១៩ ព្រមទាំងពង្រឹងលទ្ធិប្រជាធិបតេយ្យ តាមរយៈការអនុវត្តជាទៀងទាត់នូវការបោះឆ្នោតឃុំ-សង្កាត់ និងការបោះឆ្នោតជាតិនៅពេលខាងមុខជាដើម។
បើតាមលោក សួស យ៉ារ៉ា ក្នុងអង្គសន្និបាតនោះមានការចូលរួមពីសមាជិកសមាជិកានៃគណៈកម្មាធិការកណ្ដាលចំនួន៧៧៥រូប លើបរិមាណរួម៨៦៥រូប។
គណៈកម្មាធិការកណ្ដាលគណបក្សប្រជាជនកម្ពុជា ក៏បានអំពាវនាវតាមរយៈសេចក្ដីប្រកាសព័ត៌មានរបស់ខ្លួនដល់គណៈកម្មាធិការនៃគណបក្សគ្រប់ថ្នាក់គ្រប់ផ្នែក គ្រប់ក្រុមការងារគណបក្សចុះមូលដ្ឋាន និងមន្ត្រីសមាជិកសមាជិកានៃគណបក្សប្រជាជនកម្ពុជា ឱ្យពង្រឹងសាមគ្គីភាព ឯកភាពផ្ទៃក្នុងរឹងមាំ ត្រូវខិតខំបន្តអនុវត្តកម្មវិធីនយោបាយ និងសេចក្ដីសម្រេចនានារបស់គណបក្សឱ្យបានសម្រេចជោគជ័យ ដើម្បីបម្រើផលប្រយោជន៍ដ៏ឧត្ដុង្គឧត្តមរបស់ជាតិនិងប្រជាជន។
គណបក្សប្រជាជនកម្ពុជា បានអំពាវនាវដល់ជនរួមជាតិទាំងមូល ទាំងនៅក្នុងប្រទេសនិងក្រៅប្រទេស បន្តរួមសាមគ្គីគ្នាជាធ្លុងមួយក្រោមដំបូលរដ្ឋធម្មនុញ្ញ និងម្លប់ដ៏ត្រជាក់នៃព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ដើម្បីថែរក្សាការពារសន្តិភាព ឯករាជ្យ អធិបតេយ្យ និងបូរណភាពទឹកដីកម្ពុជា ឱ្យបានរឹងមាំនិងគង់វង្ស។
ជាមួយគ្នានេះ គណបក្សប្រជាជនកម្ពុជាអំពាវនាវដល់ជនរួមជាតិបន្តអនុវត្តយ៉ាងខ្ជាប់ខ្ជួននូវវិធានសុវត្ថិភាពសុខាភិបាល សំដៅការពារមិនឱ្យជំងឺកូវីដ-១៩អាចឆ្លងរាលដាលជាថ្មីទៀតបាន និងរួមគ្នាស្ដារនិងអភិវឌ្ឍសេដ្ឋកិច្ចសង្គមកម្ពុជាឡើងវិញក្រោយវិបត្តិជំងឺកូវីដ-១៩៕
