បុគ្គលិកក្រុមហ៊ុនកាស៊ីណូណាហ្គាវើលដ៍ (Naga World) ជាង១ ០០០នាក់ បន្តការតវ៉ារបស់ខ្លួននៅមុខក្រុមហ៊ុន ដើម្បីទាមទារឱ្យមានដំណោះស្រាយរឿងវិវាទការងារ បញ្ឈប់ការលាបពណ៌លើក្រុមកម្មករដែលតវ៉ា និងបញ្ឈប់ការរើសអើងសហជីព។
កូដកម្មនេះបានកើតឡើងរយៈពេល៧ថ្ងៃមកហើយ ក្រោយពីមានវិវាទការងារនៅក្នុងក្រុមហ៊ុនកាស៊ីណូមួយនេះអស់រយៈពេល៨ខែ តែនៅមិនទាន់មានដំណោះស្រាយ បន្ទាប់ពីក្រុមហ៊ុននេះបានប្រកាសបញ្ឈប់បុគ្គលិក១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ ក្រោមហេតុផលថា ក្រុមហ៊ុនជួបវិបត្តិហិរញ្ញវត្ថុដោយសារតែវិបត្តិជំងឺកូវីដ-១៩។ ក៏ប៉ុន្តែតំណាងសហជីពប្រចាំនៅក្នុងកាស៊ីណូយល់ថា ផែនការបញ្ឈប់បុគ្គលិកទ្រង់ទ្រាយធំនេះ គឺជាការគាស់រំលើងសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូណាហ្គាវើលដ៍ ចេញពីក្រុមហ៊ុននេះ ព្រោះបុគ្គលិកដែលបញ្ឈប់ភាគច្រើន គឺជាសមាជិកនិងថ្នាក់ដឹកនាំសហជីព។
ប្រធានសហជីពនៅក្រុមហ៊ុនកាស៊ីណូណាហ្គាវើសដ៍ កញ្ញា ឈឹម ស៊ីថរ បានថ្លែងក្នុងសន្និសីទសារព័ត៌មាននៅថ្ងៃសុក្រនេះថា ការទាមទាររបស់បុគ្គលិកក្រុមហ៊ុនទាំង៩ចំណុចនៅមិនទាន់មានដំណោះស្រាយនៅឡើយ ដែលធ្វើឱ្យពួកគាត់នៅបន្តការតវ៉ារហូតមកដល់ថ្ងៃនេះ។ កញ្ញាបន្តថា ក្នុងអំឡុងពេលតវ៉ានេះដែរ ក៏មានជនមិនស្គាល់មុខបានតាមដានតំណាងបុគ្គលិកនិងសហជីពនៅពេលដែលពួកគាត់ធ្វើដំណើរតាមផ្លូវ ដែលករណីនេះ កញ្ញាចាត់ទុកថាជាការគំរាមកំហែងមួយ។
ក្រៅពីនោះ កញ្ញា ឈឹម ស៊ីថរ បានអំពាវនាវដល់ក្រសួងស្ថាប័នពាក់ព័ន្ធជួយអន្តរាគមន៍រកដំណោះស្រាយវិវាទការងារនេះ និងបញ្ឈប់ការលាបពណ៌លើបុគ្គលិកដែលតវ៉ាថាជាការធ្វើបដិវត្ដពណ៌ និងទាមទារឱ្យក្រុមហ៊ុនបញ្ឈប់ការរើសអើងសហជីព ជាដើម។
កូដកម្មរបស់បុគ្គលិកក្រុមហ៊ុនណាហ្គាវើលដ៍ ធ្វើឡើងដោយទាមទារលក្ខខណ្ឌការងារចំនួន៩ចំណុចសំខាន់ៗ ក្នុងនោះរួមមាន ទាមទារឱ្យក្រុមហ៊ុនទទួលយកថ្នាក់ដឹកនាំសហជីព សមាជិកប្រតិភូបុគ្គលិក និងកម្មករនិយោជិតចំនួន៣៦៥នាក់ ដែលមិនព្រមទទួលយកសំណងបញ្ចប់កិច្ចសន្យាការងារ ចូលបម្រើការងារឡើងវិញ។ លើសពីនេះ ទាមទារឱ្យក្រុមហ៊ុនគិតប្រាក់ដំណាច់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវ សម្រាប់កម្មករនិយោជិតដែលត្រូវបានកាត់ចេញតាមគម្រោងកាត់បន្ថយបុគ្គលិក។
កូដកម្មនេះក៏ទាមទារឱ្យក្រុមហ៊ុនអនុវត្តសេចក្ដីបង្គាប់របស់ក្រុមប្រឹក្សាអាជ្ញាកណ្ដាល កាលពីថ្ងៃទី១០ ខែកញ្ញា ឆ្នាំ២០២១ ត្រង់ចំណុចទី៣ ដោយគិតប្រាក់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវ។ បន្ថែមពីនេះ ទាមទារឱ្យក្រុមហ៊ុនផ្ដល់ប្រាក់ដំណាច់អតីតភាពការងារ និងប្រាក់រំឭកអតីតភាពការងារឱ្យបានត្រឹមត្រូវតាមច្បាប់សម្រាប់ឆ្នាំ២០២០និង២០២១ រួមនឹងចំណុចសំខាន់ៗមួយចំនួនទៀត។
ប្រធានគ្រប់គ្រងផ្នែកទំនាក់ទំនងបុគ្គលិរបស់ក្រុមហ៊ុនកាស៊ីណូណាហ្គាវើលដ៍ (Naga World) អ្នកនាង ឌី សីហា មិនទាន់អាចសុំការបញ្ជាក់ជុំវិញករណីនេះបានទេ នៅថ្ងៃសុក្រនេះ។
ការធ្វើកូដកម្មរបស់បុគ្គលិកក្រុមហ៊ុនណាហ្គាវើលដ៍ នៅព្រឹកនេះ ក៏មានការឃ្លាំមើលពីសមត្ថកិច្ចចម្រុះប្រមាណជាង១០០នាក់ផងដែរ។
កាលពីថ្ងៃទី១៨ ខែធ្នូ ឆ្នាំ២០២១ ក្រសួងការងារ និងបណ្ដុះបណ្ដាលវិជ្ជាជីវៈ ក៏បានចេញសេចក្ដីជូនដំណឹងដល់កម្មករនិយោជិតនៃក្រុមហ៊ុនណាហ្គាវើលដ៍ ផ្អាកការធ្វើកូដកម្ម បាតុកម្ម ដើម្បីចូលរួមរក្សាការពារសន្តិសុខ សណ្ដាប់ធ្នាប់សាធារណៈ និងចូលរួមទប់ស្កាត់ការឆ្លងរីករាលដាលជំងឺកូវីដ-១៩។
សេចក្ដីជូនដំណឹងដដែលបញ្ជាក់ថា ក្រសួងនិងអាជ្ញាធរពាក់ព័ន្ធ ជាពិសេសរដ្ឋបាលរាជធានីភ្នំពេញនឹងបន្តធ្វើការដោះស្រាយតាមនីតិវិធីច្បាប់ជាធរមាន និងផ្អែកតាមសមភាព សមធម៌ ដើម្បីធានាថា បងប្អូនកម្មករនិយោជិតដែលកំពុងតវ៉ាទទួលបាននូវដំណោះស្រាយមួយសមស្រប និងអាចទទួលយកបានទាំងអស់គ្នាផងដែរ។
ក្រសួងការងារ និងបណ្ដុះបណ្ដាលវិជ្ជាជីវៈ ក៏បានស្នើដល់កម្មករនិយោជិតនៃក្រុមហ៊ុនណាហ្គាវើលដ៍ និងសាធារណជន រក្សាភាពនឹងនរក្នុងចិត្ត ចៀសវាងចាញ់បោកជនខិលខូចមួយចំនួនដែលមានបំណងញុះញង់ បង្កអស្ថិរភាពដល់ក្រុមហ៊ុន និងសណ្ដាប់ធ្នាប់សាធារណៈ ដែលអាចបង្កផលប៉ះពាល់ដល់ការងាររបស់បងប្អូនកម្មករនិយោជិតដទៃទៀតដែលកំពុងបំពេញការងារនិងទទួលបានប្រាក់ឈ្នួលពីក្រុមហ៊ុនណាហ្គាវើលដ៍៕
