បុគ្គលិកក្រុមហ៊ុនកាស៊ីណូណាហ្គាវើលដ៍ (Naga World) ប្រកាន់ជំហរបន្តធ្វើកូដកម្មនៅមុខក្រុមហ៊ុនរហូតមានដំណោះស្រាយវិវាទការងារ ក្រោយពីចរចាជាមួយភាគីពាក់ព័ន្ធមិនទទួលបានដំណោះស្រាយសមស្រប។
បុគ្គលិកក្រុមហ៊ុនកាស៊ីណូណាហ្គាវើលដ៍ជាង១ ០០០នាក់បាននាំគ្នាធ្វើកូដកម្មនៅមុខក្រុមហ៊ុនរយៈពេល៧ថ្ងៃជាប់ៗគ្នា គិតមកដល់ថ្ងៃទី២៤ ខែធ្នូនេះ ដើម្បីទាមទារលក្ខខណ្ឌការងារចំនួន៩ចំណុច ក្នុងនោះមាន ការទាមទារឱ្យក្រុមហ៊ុនទទួលយកថ្នាក់ដឹកនាំសហជីព សមាជិកប្រតិភូបុគ្គលិក និងកម្មករនិយោជិតចំនួន៣៦៥នាក់ដែលមិនព្រមទទួលយកសំណងបញ្ចប់កិច្ចសន្យាការងារ ចូលបម្រើការងារឡើងវិញ, ទាមទារឱ្យក្រុមហ៊ុនគិតប្រាក់ដំណាច់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវ សម្រាប់កម្មករនិយោជិតដែលត្រូវបានកាត់ចេញតាមគម្រោងកាត់បន្ថយបុគ្គលិក និងទាមទារឱ្យក្រុមហ៊ុនអនុវត្តសេចក្ដីបង្គាប់របស់ក្រុមប្រឹក្សាអាជ្ញាកណ្ដាលកាលពីថ្ងៃទី១០ ខែកញ្ញា ឆ្នាំ២០២១ ត្រង់ចំណុចទី៣ ដោយគិតប្រាក់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវ។
បុគ្គលិកក្រុមហ៊ុនកាស៊ីណូមួយនេះក៏បានទាមទារឱ្យក្រុមហ៊ុនផ្ដល់ប្រាក់ដំណាច់អតីតភាពការងារ និងប្រាក់រំឭកអតីតភាពការងារឱ្យបានត្រឹមត្រូវតាមច្បាប់សម្រាប់ឆ្នាំ២០២០ និង២០២១, ទាមទារឱ្យក្រុមហ៊ុនផ្ដល់ប្រាក់បន្ថែមស្មើនឹង ៧% លើប្រាក់ឈ្នួលគោលបច្ចុប្បន្នឱ្យកម្មករនិយោជិតទាំងអស់ ដើម្បីបំពេញអតិផរណាតម្លៃទំនិញលើទីផ្សារ និងទាមទារឱ្យក្រុមហ៊ុនបញ្ឈប់ការកេងប្រវ័ញ្ចតាមរយៈការប្រើប្រាស់កម្មករនិយោជិតក្រោមស្លាកកម្មសិក្សា រួមនឹងចំណុចសំខាន់ៗមួយចំនួនទៀត។
ក្នុងកូដកម្មនៅថ្ងៃនេះ ក្រុមកម្មករបានប្រកាស់ពីជំហរបន្តធ្វើកូដកម្មដោយមិនដាក់ពេលកំណត់ ប្រសិនបើក្រុមហ៊ុនល្បែងមួយនេះមិនព្រមទទួលយកបុគ្គលិកជិត៣០០នាក់ចូលធ្វើការងារវិញ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ថ្លែងថា បច្ចុប្បន្ននៅសល់កម្មករ២៧៦នាក់ប៉ុណ្ណោះដែលទាមទារចូលធ្វើការងារវិញ ខណៈកម្មករផ្សេងទៀតព្រមឈប់ពីការងារ ប្រសិនបើក្រុមហ៊ុនទូទាត់សំណងទៅតាមផ្លូវច្បាប់ស្ដីពីការងារ។
បើតាមកញ្ញា ឈឹម ស៊ីថរ ការធ្វើកូដកម្មរយៈពេល៧ថ្ងៃមកនេះ គឺពុំមានដំណោះស្រាយសមស្របឡើយ និងមានការរំលោភសិទ្ធិមនុស្សធ្ងន់ធ្ងរ ដោយសារសកម្មជននិងសមាជិកសហជីពមួយចំនួន បានរងការគំរាមកំហែងនិងការលាបពណ៌ផ្សេងៗជាដើម។
ប្រធានសហជីពរូបនេះបានទាមទារឱ្យមានដំណោះស្រាយរឿងវិវាទការងារ បញ្ឈប់ការលាបពណ៌លើក្រុមកម្មករដែលតវ៉ា និងបញ្ឈប់ការរើសអើងសហជីព។
កញ្ញាបន្ថែមថា៖ «ការទាមទារនេះជាការទាមទារដែលក្រុមហ៊ុនណាហ្គាវើលដ៍បានបង្កភាពឈឺចាប់ និងភាពអយុត្តិធម៌ ការរំលោភសិទ្ធិការងារ និងសិទ្ធិមនុស្សរាប់ឆ្នាំមកហើយ។ ហើយប្រសិនបើមិនដោះស្រាយនៅពេលនេះទេ បញ្ហានេះនឹងត្រូវកម្មករយោជិតយកមកទាមទារទៀតរហូតមានដំណោះស្រាយ»។
កញ្ញា ឈឹម ស៊ីថរ បន្ថែមថា បញ្ហាវិវាទការងារនៅក្រុមហ៊ុនណាហ្គាវើលដ៍ មិនត្រូវបានដោះស្រាយបញ្ចប់ ដោយសារក្រុមហ៊ុនកាស៊ីណូមួយនេះមានចេតនាចង់លុបបំបាត់សហជីពទ្រទ្រង់សិទ្ធិការងារបុគ្គលិកកម្មករខ្មែរក្នុងក្រុមហ៊ុននេះ ព្រោះបុគ្គលិកដែលក្រុមហ៊ុនបញ្ឈប់ភាគច្រើនគឺជាសមាជិកនិងថ្នាក់ដឹកនាំសហជីព ដែលកញ្ញាចាត់ទុកករណីនេះថាជារើសអើងសហជីព។
បុគ្គលិកផ្នែកចែកបៀរ និងជាស្ត្រីមានផ្ទៃពោះ៧ខែផងនោះ អ្នកស្រី កន ស្រីល័ក្ខ អាយុ៣២ឆ្នាំ និយាយថា អ្នកស្រីមិនមានឈ្មោះត្រូវបញ្ឈប់ ប៉ុន្តែដោយមើលឃើញតំណាងសហជីពនិងកម្មករក្នុងចំនួនច្រើនត្រូវបានបញ្ឈប់ដោយអយុត្តិធម៌នោះ អ្នកស្រីបានសម្រេចចេញមកចូលរួមការតវ៉ាដែរ។
អ្នកស្រីបញ្ជាក់ថា ភាពអយុត្តិធម៌នោះ គឺក្រុមហ៊ុនបានបញ្ឈប់តំណាងសហជីព ដោយមិនមានហេតុផលច្បាស់លាស់ និងការទូទាត់សំណងមិនត្រឹមត្រូវទៅតាមផ្លូវច្បាប់។
អ្នកស្រីបន្ថែមថា៖ «គោលបំណងសំខាន់នៃការតវ៉ារបស់ខ្ញុំ គឺយើងចង់ឱ្យតំណាងសហជីពហ្នឹងបានចូលធ្វើការងារវិញ បញ្ឈប់ការរើសអើងសហជីព និងបុគ្គលិកដទៃទៀតត្រូវអនុញ្ញាតឱ្យធ្វើការងារវិញ។ ពួកយើងយល់ថា ពេលដែលអត់សហជីពទៅ ពួកខ្ញុំនឹងទទួលបានហានិភ័យខ្លាំង គេចង់បញ្ឈប់ពេលណាក៏បាន ហើយពួកខ្ញុំជួបបញ្ហាអីទៅ គឺអត់មានដំណោះស្រាយទេ»។
ប្រធានគ្រប់គ្រងផ្នែកទំនាក់ទំនងបុគ្គលិករបស់ក្រុមហ៊ុនកាស៊ីណូណាហ្គាវើលដ៍ (Naga World) អ្នកនាង ឌី សីហា មិនទាន់អាចសុំការបញ្ជាក់ជុំវិញករណីនេះបានទេ នៅថ្ងៃសុក្រនេះ។
សេចក្ដីប្រកាសព័ត៌មានរបស់ក្រសួងការងារ កាលពីថ្ងៃទី២៣ ខែធ្នូនេះ ស្ដីពីលទ្ធផលនៃការដោះស្រាយវិវាទការងារនៅក្រុមហ៊ុនកាស៊ីណូណាហ្គាវើលដ៍ បញ្ជាក់ថា ក្រោយជួបប្រជុំរកដំណោះស្រាយ គឺភាគីទាំងពីរមិនទាន់ព្រមព្រៀងគ្នាក្នុងការបញ្ចប់វិវាទនៅឡើយទេ។
សេចក្ដីប្រកាសព័ត៌មានដដែលនេះបញ្ជាក់ថា តំណាងក្រុមហ៊ុននឹងពិចារណាលើរូបមន្តក្នុងការគណនាប្រាក់ដំណាច់បញ្ចប់កិច្ចសន្យាការងារជូនកម្មករ៨៥នាក់ដែលព្រមបញ្ចប់កិច្ចសន្យាការងារ ប៉ុន្តែមិនព្រមទទួលយកកម្មករផ្សេងទៀតដែលកំពុងតវ៉ាឡើយ។
ប៉ុន្តែតំណាងកម្មករទាមទារឱ្យភាគីក្រុមហ៊ុនទទួលយកកម្មករដែលកំពុងតវ៉ាចូលធ្វើការងារសិន ទើបកម្មករ៨៥នាក់យល់ព្រមទទួលការទូទាត់ប្រាក់ដំណាច់បញ្ចប់កិច្ចសន្យាការងារ។
គួររំឭកថា វិវាទការងារនៅក្នុងក្រុមហ៊ុនកាស៊ីណូណាហ្គាវើលដ៍មានរយៈពេល៨ខែមកហើយ នៅតែមិនទាន់មានដំណោះស្រាយចប់ ក្រោយពីក្រុមហ៊ុននេះបានប្រកាសបញ្ឈប់បុគ្គលិក១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ ក្រោមហេតុផលថា ក្រុមហ៊ុនជួបវិបត្តិហិរញ្ញវត្ថុដោយសារតែវិបត្តិជំងឺកូវីដ-១៩។
កាលពីដើមខែធ្នូនេះ អង្គការ សមាគម និងសហជីពចំនួន២៥ បានចេញសេចក្ដីថ្លែងការណ៍មួយសម្ដែងការខកចិត្តចំពោះការបញ្ឈប់បុគ្គលិកកាស៊ីណូណាហ្គាវើលដ៍នេះ។ សេចក្ដីថ្លែងការណ៍នោះ បានចាត់ទុកថា ក្រុមហ៊ុនមានចេតនារំលាយរចនាសម្ព័ន្ធថ្នាក់ដឹកនាំសហជីព ដោយថា ការធ្វើបែបនេះមិនសមហេតុផល និងមិនអាចទទួលយកបានឡើយ៕
