តុលាការកំពូល បានតម្កល់សេចក្ដីសម្រេចរបស់តុលាការថ្នាក់ក្រោម ដោយឱ្យលោក ឡាយ វណ្ណៈ អតីតអភិបាលខេត្តតាកែវ និងបងប្រុសរបស់លោក ជាប់ពន្ធនាគារជាង១០ឆ្នាំពីបទ«មនុស្សឃាត»។
ការសម្រេចនេះ បន្ទាប់ពីតុលាការបានបើកសវនាការកាលពីថ្ងៃទី១០ ខែធ្នូ ឆ្នាំ២០២១ លើបណ្ដឹងសារទុក្ខអតីតអភិបាលខេត្តតាកែវ លោក ឡាយ វណ្ណៈ និងលោក ឡាយ ណារិទ្ធ ក្នុងសំណុំរឿង «ឃាតកម្ម» លើអ្នកនាង ចេវ សុវឌ្ឍនា ក្រោយពីសាលាឧទ្ធរណ៍សម្រេចតម្កល់សាលក្រមសាលាដំបូងរាជធានីភ្នំពេញទុកជាបានការដដែល។
ប្រធានក្រុមប្រឹក្សាជំនុំជម្រះនៃតុលាការកំពូល លោក និល ណុល បានប្រកាសសាលដីកាកំបាំងមុខ នៅថ្ងៃសុក្រនេះ ដោយតម្កល់សេចក្ដីសម្រេចរបស់សាលាដំបូងរាជធានីភ្នំពេញ និងសាលាឧទ្ធរណ៍រាជធានីភ្នំពេញ ទុកជាបានការដដែល។ លោកបន្តថា ការសម្រេចនេះ ដោយតុលាការយល់ថា ការសម្រេចរបស់តុលាការថ្នាក់ក្រោមធ្វើឡើងត្រឹមត្រូវ។
អតីតអភិបាលខេត្តតាកែវ លោក ឡាយ វណ្ណៈ និងលោក ឡាយ ណារិទ្ធ ត្រូវបានសមត្ថកិច្ចចាប់ខ្លួនពាក់ព័ន្ធសំណុំរឿងឃាតកម្មលើអ្នកស្រី ចេវ សុវឌ្ឍនា កាលពីឆ្នាំ២០១៨។ ក្រោយមក ចៅក្រមសាលាដំបូងរាជធានីភ្នំពេញ បានសម្រេចផ្ដន្ទាទោសលោក ឡាយ វណ្ណៈ ជាប់ពន្ធនាគារ១៣ឆ្នាំ និងលោក ឡាយ ណារិទ្ធ ជាប់ពន្ធនាគារ១០ឆ្នាំ ពីបទ«ឃាតកម្ម»។
ចំណែកបុរសឈ្មោះ ម៉ែន សាម៉ៃ ដែលជាអ្នកបើកបររថយន្តឱ្យលោក ឡាយ វណ្ណៈ និងបុរសឈ្មោះ ជឹម វុធ ដែលជាប្ដីរបស់ស្ត្រីអ្នកបម្រើនៅផ្ទះរបស់អ្នកស្រី ចេវ សុវឌ្ឍនា ក៏ត្រូវបានតុលាការកាត់ទោសឱ្យជាប់ពន្ធនាគារម្នាក់ៗ២ឆ្នាំផងដែរ ក្រោមបទចោទថាបានលាក់កំបាំងតម្រុយ៕