តុលាការកំពូល បានសម្រេចសេចក្ដីដោយកំបាំងមុខ ដោយឱ្យចាងហ្វាងកាសែតជាតិខែ្មរម្នាក់ជាប់ពន្ធនាគារ ១ឆ្នាំ៨ខែ ដូចតុលាការថ្នាក់ក្រោមដែរ ទោះបីជនជាប់ចោទរូបនេះធ្លាប់ស្នើសុំតុលាការជាន់ខ្ពស់មួយនេះកាត់តម្រឹមទោសរបស់ខ្លួនត្រឹមថ្ងៃប្រកាសសាលដីកានាថ្ងៃសុក្រនេះក៏ដោយ។
កាលពីថ្ងៃទី១៧ ខែធ្នូ ឆ្នាំ២០២១ ចាងហ្វាងកាសែតជាតិខែ្មរ លោក រស់ សុឃិត បានស្នើទៅក្រុមប្រឹក្សាតុលាការកំពូលដោះលែងខ្លួនឱ្យមានសេរីភាពវិញនៅថ្ងៃតុលាការប្រកាសដីកា ដោយថា គិតត្រឹមថ្ងៃទី២៤ ខែធ្នូ ឆ្នាំ២០២១ ទោសដែលខ្លួនអនុវត្តក្នុងពន្ធនាគារនៅសល់តែ៤ថ្ងៃទៀតប៉ុណ្ណោះ នឹងគ្រប់តាមការកំណត់របស់តុលាការ។
ប៉ុន្តែការស្នើនេះត្រូវបានប្រធានក្រុមជំនុំជម្រះនៃតុលាការកំពូល លោក និល ណុល នៅថ្ងៃសុក្រនេះ បានប្រកាសសាលដីកាដោយច្រានចោល ដោយបញ្ជាក់ថា សេចក្ដីសម្រេចសាលាដំបូងរាជធានីភ្នំពេញ និងសាលាឧទ្ធរណ៍ ជារឿងត្រឹមត្រូវ។
យ៉ាងណាក៏ដោយ ការប្រកាសសាលដីកានៅថ្ងៃសុក្រនេះមិនមានវត្តមានលោក រស់ សុឃិត និងមេធាវីការពារក្ដីឱ្យលោកចូលរួមស្ដាប់នោះទេ។
វីអូឌី មិនអាចសុំការឆ្លើយតបពីលោក សំ សុគង់ មេធាវីការពារក្ដីឱ្យលោក រស់ សុឃិត បានទេ នៅថ្ងៃសុក្រនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ការសម្រេចសេចក្ដីយ៉ាងណានោះជាឆន្ទានុសិទ្ធិរបស់ចៅក្រម។ ប៉ុន្តែយ៉ាងណា លោកថា ចៅក្រមគួរគប្បីពិនិត្យមើលនិងពិចារណាលើហេតុផលនៃការស្នើសុំដែលជនជាប់ចោទបានដាក់ទៅតុលាការ។
លោក ករុណា កត់សម្គាល់ឃើញថា ចំពោះករណីសកម្មជន រួមទាំងអ្នកសារព័ត៌មាន ដែលបានស្នើសុំឱ្យដោះលែងនោះ តុលាការហាក់មិនសូវទទួលយកមកពិចារណានោះទេ។
លោកថា៖ «អ៊ីចឹងហើយបានជាយើងយល់ថា ក្នុងរឿងទាំងអស់នេះមិនទាន់មានការផ្ដល់នូវភាពយុត្តិធម៌ឬការទាមទាររបស់គាត់ឱ្យបានត្រឹមត្រូវនិងអាចទទួលយកបាននៅឡើយទេ»។
លោកបន្តថា បើសិនជាអ្នកសារព័ត៌មានធ្វើខុសហើយបានកែតម្រូវរួចនោះ មិនគួរមានការចោទប្រកាន់លើពួកគាត់ ហើយថា ការចោទប្រកាន់និងចាប់ខ្លួនអ្នកសារព័ត៌មាននេះជាការគំរាមកំហែងដល់សិទ្ធិសេរីភាពបញ្ចេញមតិនិងអ្នកសារព័ត៌មានផ្សេងទៀតផងដែរ។
លោក ស៊ឹង សែនករុណា បញ្ជាក់ថា៖ «បើសិនជាមានការចាត់វិធានការលើអ្នកកាសែតទាំងឡាយដែលមានការបញ្ចេញមតិផ្សេងៗតាមសំណេររបស់ខ្លួន ហើយមានការចាត់វិធានការបែបហ្នឹង យើងយល់ថា ចៀសមិនផុតទេអំពីការធ្វើឱ្យជះឥទ្ធិពលដល់អ្នកសារព័ត៌មានផ្សេងៗមានការភ័យខ្លាចនិងប្រុងប្រយ័ត្ន ក្នុងសំណេរឬសរសេរអត្ថបទទៅតាមមធ្យោបាយដែលខ្លួនអាចធ្វើទៅបាន ធ្វើឱ្យមានការរឹតត្បិតទៅលើការបញ្ចេញទស្សនៈឬព័ត៌មានដែលខ្លួនកំពុងធ្វើហ្នឹង និងធ្វើឱ្យមានការភ័យខ្លាចប្រយ័ត្នប្រយែងបន្ថែមទៀត»។
សាលាដំបូងរាជធានីភ្នំពេញ បានផ្ដន្ទាទោសលោក រស់ សុឃិត ដាក់ពន្ធនាគារ១ឆ្នាំ៨ខែ និងពិន័យជាប្រាក់ចំនួន២លានរៀល ពាក់ព័ន្ធនឹងការបង្ហោះសាររិះគន់ប្រមុខរាជរដ្ឋាភិបាលនៅក្នុងបណ្ដាញសង្គម។
លោក រស់ សុឃិត ត្រូវបានចាប់ខ្លួនកាលពីខែមិថុនា ឆ្នាំ២០២០ ដែលការចាប់ខ្លួននេះបានធ្វើឡើងមួយថ្ងៃក្រោយពីអ្នកសារព័ត៌មានរូបនេះបានបង្ហោះសារចំនួន២តាមទំព័រហ្វេសប៊ុករបស់លោក ដែលក្នុងនោះមានសារមួយសរសេរថា «លោក ហ៊ុន សែន នឹងបាត់បង់អ្វីៗទាំងអស់ បើនៅតែចចេសចង់លើកបន្តុបកូនខ្លួនធ្វើជានាយករដ្ឋមន្ត្រីនោះ! យួនមិនគាំទ្រ ហ៊ុន ម៉ាណែត ឡើយ»។
ទោះជាយ៉ាងនេះក្ដី មន្ត្រីការិយាល័យឧក្រិដ្ឋកម្មតាមអ៊ីនធឺណិតរបស់ស្នងការដ្ឋាននគរបាលរាជធានីភ្នំពេញ បានផ្ដល់សក្ខីកម្មថា ពួកគេបានឃ្លាំមើលការបង្ហោះរបស់លោក រស់ សុឃិត តាំងពីខែឧសភា ហើយបានចាត់ទុកការផុសសារទាំងនោះថាជាការញុះញង់ឱ្យមានភាពវឹកវរនៅក្នុងសង្គម៕