សហជីពមួយចំនួនលើកឡើងថា ការធ្វើកូដកម្មដោយសន្តិវិធីរបស់បុគ្គលិកក្រុមហ៊ុនកាស៊ីណូណាហ្គាវើលដ៍ (Naga World)ជាង១ពាន់នាក់ បានប្រព្រឹត្តទៅជិត១០ថ្ងៃមកហើយ ខណៈពួកគេថាប្រសិនបើអាជ្ញាធរនៅតែមិនព្រមដោះស្រាយវិវាទការងារមួយនេះទៀត បង្ហាញពីភាពលម្អៀងទៅភាគីក្រុមហ៊ុន និងធ្វើឱ្យប៉ះពាល់ដល់មុខមាត់រដ្ឋាភិបាល។
ការលើកឡើងនេះ ធ្វើឡើងស្របពេលដែលបុគ្គលិកក្រុមហ៊ុនកាស៊ីណូណាហ្គាវើលដ៍ជាង១ ០០០នាក់ បន្តនាំគ្នាធ្វើកូដកម្មនៅមុខក្រុមហ៊ុនរយៈពេល៩ថ្ងៃជាប់ៗគ្នា គិតមកដល់ថ្ងៃទី២៦ ខែធ្នូនេះ ដើម្បីទាមទារលក្ខខណ្ឌការងារចំនួន៩ចំណុច។ លក្ខខណ្ឌទាំងនោះ រួមមានទាមទារឱ្យក្រុមហ៊ុនទទួលយកថ្នាក់ដឹកនាំសហជីព សមាជិកប្រតិភូបុគ្គលិក និងកម្មករនិយោជិតចំនួន៣៦៥នាក់ដែលមិនព្រមទទួលយកសំណងបញ្ចប់កិច្ចសន្យាការងារ ចូលបម្រើការងារឡើងវិញ។
លើសពីនេះ ទាមទារឱ្យក្រុមហ៊ុន គិតប្រាក់ដំណាច់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវ សម្រាប់កម្មករនិយោជិតដែលត្រូវបានកាត់ចេញតាមគម្រោងកាត់បន្ថយបុគ្គលិក និងទាមទារឱ្យក្រុមហ៊ុនអនុវត្តសេចក្ដីបង្គាប់របស់ក្រុមប្រឹក្សាអាជ្ញាកណ្ដាលកាលពីថ្ងៃទី១០ ខែកញ្ញា ឆ្នាំ២០២១ ត្រង់ចំណុចទី៣ ដោយគិតប្រាក់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវ។
ប្រធានសម្ព័ន្ធសហជីពកម្ពុជា លោកស្រី យ៉ាង សុភ័ណ្ឌ មានប្រសាសន៍នៅថ្ងៃអាទិត្យនេះថា ចាប់ពីថ្ងៃបុគ្គលិកក្រុមហ៊ុនកាស៊ីណូណាហ្គាវើលដ៍ ធ្វើកូដកម្មទាមទារឱ្យក្រុមហ៊ុនគោរពលក្ខខណ្ឌការងារ រហូតមកដល់ថ្ងៃនេះ មានរយៈពេលជិត១០ថ្ងៃមកហើយ ប៉ុន្តែក្រុមហ៊ុន ក្រសួងការងារ និងស្ថាប័នពាក់ព័ន្ធផ្សេងទៀត មិនទាន់ឃើញចេញមកដោះស្រាយជូនកម្មករនៅឡើយ ។
លោកស្រីបន្តថា៖ «នៅពេលកម្មករងើបឈមកទាមទារគាត់ចង់បានដំណោះស្រាយ ប៉ុន្តែទង្វើប្រតិកម្មត្រឡប់មកវិញ វាហាក់ដូចជាការធ្វើទុកបុកម្នេញទៅលើគាត់ ប្រើរូបភាពសព្វបែបយ៉ាងទៅលើកម្មករ ពាក់ព័ន្ធការមិនឱ្យប្រមូលផ្តុំ មិនផ្តល់បន្ទប់ទឹកឱ្យគាត់ បន្ទាប់មកអូសបន្លាយពេលហូរហែរ និយាយរួមមិនដោះស្រាយជូនពួកគាត់ទេ»។
ករណីនេះ លោកស្រីថា បើក្រសួងការងារនិងស្ថាប័នពាក់ព័ន្ធមិនពន្លឿនដោះស្រាយបញ្ហាជូនកម្មករទេ នឹងធ្វើឱ្យបញ្ហាប្រឈមនានាកើតមានឡើងជាបន្តបន្ទាប់ មិនត្រឹមតែប៉ុណ្ណោះមជ្ឈដ្ឋានជាតិនិងអន្តរជាតិរិះគន់ថា អាជ្ញាធរនិងក្រសួងការងារលម្អៀងទៅភាគីក្រុមហ៊ុនជាដើម ។
លោកស្រីមានប្រសាសន៍ថា៖ «បើសិនជាអាជ្ញាធរនៅតែមិនដោះស្រាយជូនកម្មករទេ មនុស្សជារួមគិតថា រដ្ឋ និងក្រសួងការងារមិនព្យាយាមដោះស្រាយបញ្ហាជូនកម្មករ ហើយគេមើលឃើញកាន់តែច្បាស់ថា អាជ្ញាធររបស់រដ្ឋមិនបានការពារសិទ្ធិទៅដល់អ្នកទន់ខ្សោយ ជួយតែអ្នកមានដូចជាថៅកែ អ្នកមានលុយ មានអំណាច»។
ប្រធានសហព័ន្ធសហជីពជាតិ លោក ហ្វា សាលី មានប្រសាសន៍ថា ក្រសួងការងារនិងស្ថាប័នពាក់ព័ន្ធត្រូវដោះស្រាយបញ្ហានេះជូនបុគ្គលិកក្រុមហ៊ុនណាហ្គាវើលដ៍ ដើម្បីកុំឱ្យពួកគេបន្តធ្វើកូដកម្មបែបនេះជារៀងរាល់ថ្ងៃ អាចធ្វើឱ្យប៉ះពាល់ដល់មុខមាត់រដ្ឋាភិបាល ។
លោកមានប្រសាសន៍ថា៖ «ខ្ញុំអំពាវនាវស្នើសុំឱ្យរដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ ធ្វើយ៉ាងណាឱ្យពួកគាត់បានចូលធ្វើការងារវិញ ឬក៏[ឱ្យក្រុមហ៊ុនលំដាប់សេដ្ឋីមួយនេះ]ផ្តល់សំណងណាមួយសមរម្យបំផុតដល់កម្មករ កុំឱ្យរឿងតិចតួចទៅដល់នាយករដ្ឋមន្ត្រី វាជារឿងដែលពួកយើងមិនអាចទទួលយកបានទេ។ អញ្ចឹងថ្ងៃក្រោយអាចប៉ះពាល់ដល់ថ្នាក់ដឹកនាំកំពូលៗក៏ថាបាន»។
តំណាងកម្មករនៅក្រុមហ៊ុនកាស៊ីណូណាហ្គាវើលដ៍ (Naga World) អ្នកនាង រី សុវណ្ឌី ប្រាប់វីអូឌីនៅថ្ងៃអាទិត្យនេះថា ពួកគាត់ជាបុគ្គលិកក្រុមហ៊ុនកាស៊ីណូណាហ្គាវើលដ៍ជាង១ ០០០នាក់ បន្តនាំគ្នាធ្វើកូដកម្មនៅមុខក្រុមហ៊ុនរយៈពេល៩ថ្ងៃជាប់ៗគ្នា គិតមកដល់ថ្ងៃទី២៦ ខែធ្នូនេះ ដើម្បីទាមទារលក្ខខណ្ឌការងារចំនួន៩ចំណុច ប៉ុន្តែភាគីក្រុមហ៊ុន និងក្រសួង ឬអាជ្ញាធរពាក់ព័ន្ធមិនចេញមករកដំណោះស្រាយជូនពួកគាត់នោះទេ ។
បុគ្គលិកក្រុមហ៊ុនកាស៊ីណូមួយនេះ ព្រមានថា បើក្រុមហ៊ុន និងស្ថាប័នរដ្ឋមិនព្រមជួយអន្តរាគមន៍ដោះស្រាយបញ្ហាជូនពួកគេទេ នោះពួកគាត់នឹងបន្តនាំគ្នាធ្វើកូដកម្មរហូតមានដំណោះស្រាយ ។
អ្នកនាងព្រមានដូចនេះថា៖ «ខាងក្រុមហ៊ុនគេធ្វើមិនដឹង ធ្វើមិនឮ គេមិនព្រមចេញមកដោះស្រាយអ្វីទាំងអស់ អញ្ចឹងយើងមានតែប្រើសិទ្ធិរកយុត្តិធម៌ដោយខ្លួនឯង ទោះបីជាប៉ុន្មានថ្ងៃក៏ដោយគោលបំណងរបស់កម្មករទាំងអស់ នៅតែធ្វើកូដរហូតមានដំណោះស្រាយ»។
វីអូឌី មិនអាចសុំការបំភ្លឺពីប្រធានគ្រប់គ្រងផ្នែកទំនាក់ទំនងបុគ្គលិរបស់ក្រុមហ៊ុន កាស៊ីណូ ណាហ្គា វើលដ៍ (Naga World) អ្នកនាង ឌី សីហា បានទេ ខណៈអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ក៏មិនអាចសុំការបំភ្លឺបានដែរជុំវិញបញ្ហានេះ នៅថ្ងៃទី២៦ខែធ្នូ។
ទាក់ទិននឹងបញ្ហានេះ កាលពីថ្ងៃទី១៩ ខែធ្នូ ឆ្នាំ២០២១ លោក ហេង សួរ ធ្លាប់ លើកឡើងលើទំព័រហ្វេសប៊ុករបស់លោកថា នៅក្នុងលោកនេះមិនមានច្បាប់ ឬអនុសញ្ញាណាមួយ ដែលចែងថា ធ្វើការនៅកន្លែងណាមួយ គឺត្រូវធ្វើមួយជីវិតនោះទេ ឬហាមក្រុមហ៊ុន សហគ្រាសមិនឲ្យកាត់បន្ថយបុគ្គលិកនោះដែរ។ លោកបន្តថា សិទ្ធិទទួលបានការងារក៏ត្រូវអនុវត្តស្របជាមួយនឹងស្ថានភាពអាជីវកម្មរបស់ក្រុមហ៊ុន។
គួររំឭកថា វិវាទការងារនៅក្នុងក្រុមហ៊ុនកាស៊ីណូណាហ្គាវើលដ៍មានរយៈពេល៨ខែមកហើយ នៅតែមិនទាន់មានដំណោះស្រាយចប់ ក្រោយពីក្រុមហ៊ុននេះបានប្រកាសបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ ក្រោមហេតុផលថា ក្រុមហ៊ុនជួបវិបត្តិហិរញ្ញវត្ថុដោយសារតែវិបត្តិជំងឺកូវីដ-១៩។
កាលពីដើមខែធ្នូនេះ អង្គការ សមាគម និងសហជីពចំនួន២៥ បានចេញសេចក្ដីថ្លែងការណ៍មួយសម្ដែងការខកចិត្តចំពោះការបញ្ឈប់បុគ្គលិកកាស៊ីណូណាហ្គាវើលដ៍នេះ។ សេចក្ដីថ្លែងការណ៍នោះ បានចាត់ទុកថា ក្រុមហ៊ុនមានចេតនារំលាយរចនាសម្ព័ន្ធថ្នាក់ដឹកនាំសហជីព ដោយថា ការធ្វើបែបនេះមិនសមហេតុផល និងមិនអាចទទួលយកបានឡើយ៕
