សហចៅក្រមស៊ើបអង្កេតជាតិនិងអន្តរជាតិនៃសាលាក្ដីខ្មែរក្រហម បានចេញដីកាបង្គាប់រួមគ្នាឱ្យបញ្ចូលសំណុំរឿង០០៤ របស់លោក យឹម ទិត្យ ទៅក្នុងបណ្ណសារដ្ឋាន បន្ទាប់ពីអង្គជំនុំជម្រះតុលាការកំពូលបានចេញសេចក្ដីសម្រេចបិទបញ្ចប់សំណុំរឿងនេះ ដោយសារតែគ្មានដីកាបញ្ជូនរឿងទៅជំនុំជម្រះដែលអាចអនុវត្តបាន។
យោងតាមដីកាសម្រេចចេញផ្សាយនៅល្ងាចថ្ងៃទី២៩ ខែធ្នូ ឆ្នាំ២០២១នេះ សហចៅក្រមស៊ើបអង្កេតបានលើកឡើងថា នៅថ្ងៃទី២៨ ខែធ្នូ អង្គជំនុំជម្រះតុលាការកំពូលបានប្រកាសថា សំណុំរឿងប្រឆាំងនឹងលោក យឹម ទិត្យ ត្រូវបានបញ្ចប់។ ក៏ប៉ុន្តែអង្គជំនុំជម្រះតុលាការកំពូលមិនទាន់បានបញ្ជាក់ជាផ្លូវការដោយខ្លួនឯងឱ្យបោះត្រា និងតម្កល់សំណុំរឿងនេះក្នុងបណ្ណសារដ្ឋាននៅឡើយទេ។ ដូច្នេះ សហចៅក្រមស៊ើបអង្កេតបានចេញដីកានៅថ្ងៃនេះ ដោយបង្គាប់ឱ្យយកសំណុំរឿង០០៤នេះទៅបោះត្រា និងដាក់បញ្ចូលក្នុងបណ្ណសារដ្ឋានតែម្តង។
កាលពីថ្ងៃទី២៨ ខែធ្នូ ម្សិលមិញនេះ អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា បានបដិសេធសំណើរបស់សហព្រះរាជអាជ្ញាអន្តរជាតិក្នុងការបញ្ជូនសំណុំរឿង០០៤ ដែលមានជនជាប់ចោទ លោក យឹម ទិត្យ ទៅជំនុំជម្រះ ក្រោមមូលហេតុគ្មានដីកាបញ្ជូនរឿងទៅជំនុំជម្រះដែលអាចអនុវត្តបាន។
លោក យឹម ទិត្យ កើតនៅថ្ងៃទី៣០ ខែធ្នូ ឆ្នាំ១៩៣៦ នៅស្រុកត្រាំកក់ ខេត្តតាកែវ (អតីតតំបន់១៣ នៃភូមិភាគនិរតី) ត្រូវបានគេស្គាល់ថា ជាសមាជិកស្រុកគិរីវង់ ជាលេខានិងអនុលេខាស្រុកគិរីវង់ និងជាសមាជិកគណៈកម្មាធិការតំបន់១៣ នៃរបបខ្មែរក្រហមផងដែរ៕
