តុលាការខេត្តកំពត បានកោះហៅជាលើកទី២ ឱ្យអ្នកសារព័ត៌មានម្នាក់នៅខេត្តស្វាយរៀងចូលទៅឆ្លើយបំភ្លឺនៅខែក្រោយ ក្រោមបទចោទ «ញុះញង់ និងប្រមាថ»។
កាលពីថ្ងៃទី២៣ ខែវិច្ឆិកា ឆ្នាំ២០២១ ចៅក្រមស៊ើបសួរសាលាដំបូងខេត្តកំពត លោក អាំង សុភា បានបង្គាប់ឱ្យចាងហ្វាងកាសែត LSN លោក លួស សេង ឆ្លើយបំភ្លឺពីដំណើររឿង «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងប្រមាថ» នៅថ្ងៃទី២២ ខែធ្នូ ឆ្នាំ២០២១ ប៉ុន្តែត្រូវបានចាងហ្វាងកាសែតរូបនេះដាក់ពាក្យពន្យារពេលចូលបំភ្លឺ។
យ៉ាងណា លោក លួស សេង ប្រាប់ វីអូឌី នៅថ្ងៃទី៣០ ខែធ្នូនេះ ថាតុលាការបានកោះហៅឱ្យលោកចូលបំភ្លឺម្ដងទៀតនៅថ្ងៃទី២០ ខែមករា ឆ្នាំ២០២២ខាងមុខនេះ។ លោកបន្តថា លោកបានត្រៀមមេធាវីរួចហើយ ហើយលោកនឹងចូលទៅបំភ្លឺតាមការកោះហៅរបស់តុលាការ ដោយថា លោកមិនបានប្រព្រឹត្តកំហុសដូចការចោទប្រកាន់ឡើយ។
លោក លួស សេង បានចាត់ករណីនេះថាជាការគំរាមកំហែងបំបាក់ស្មារតីលើរូបលោក និងអ្នកសារព័ត៌មានមិនឱ្យហ៊ានផ្សាយពីបញ្ហានានារបស់សង្គមនៅក្នុងដែនសមត្ថកិច្ចខេត្តនេះ។
លោកបន្ថែមថា៖ «ការចោទប្រកាន់ខ្ញុំនេះ គឺជាការបំបាក់ស្មារតីខ្ញុំ អ្នកសារព័ត៌មានផ្សេងទៀតតែប៉ុណ្ណោះ ព្រោះគ្មានហេតុផលមួយណាដែលទៅញុះញង់និងប្រមាថផង»។
នាយកប្រតិបត្តិសមាគមអ្នកសារព័ត៌មានកម្ពុជា (ខេមបូចា) លោក ណុប វី មានប្រសាសន៍ថា ករណីតុលាការកោះហៅនិងចោទប្រកាន់ចាងហ្វាងកាសែត LSN នេះ បានបង្ហាញថា អ្នកសារព័ត៌មាននៅប្រទេសកម្ពុជានៅតែទទួលរងការប្ដឹងផ្ដល់តាមផ្លូវតុលាការ ដោយគ្រាន់តែពួកគេរាយការណ៍ព័ត៌មានពីបញ្ហាជម្លោះដីធ្លី និងបញ្ហាសង្គមផ្សេងៗ។
លោក ណុប វី បន្តថា អ្នកសារព័ត៌មានទាំងនោះគ្រាន់តែធ្វើសេចក្ដីរាយការណ៍ពីបញ្ហាឬកង្វល់របស់ប្រជាពលរដ្ឋ ដើម្បីឱ្យថ្នាក់ដឹកនាំបានដឹងនិងដោះស្រាយតែប៉ុណ្ណោះ។ លោកថា ការបន្តប្រើប្រាស់ក្រមព្រហ្មទណ្ឌ ដើម្បីប្ដឹងប្រឆាំងអ្នកសារព័ត៌មាននេះ ជាសកម្មភាពមួយគំរាមកំហែងដល់ការបំពេញការងាររបស់អ្នកសារព័ត៌មាន និងជាការបំបិទព័ត៌មានផ្សេងៗពីសហគមន៍ ដើម្បីកុំឱ្យថ្នាក់ដឹកនាំដឹងនិងដោះស្រាយ។
លោកបន្ថែមថា៖«អ៊ីចឹងខ្ញុំទទូចដល់មន្ត្រីតាំងពីមន្ត្រីថ្នាក់ក្រោមដល់មន្ត្រីថ្នាក់ជាតិហ្នឹង ធ្វើយ៉ាងម៉េចកុំបន្តនូវសកម្មភាពប្រើប្រាស់ច្បាប់ ជាពិសេសក្រមព្រហ្មទណ្ឌប្ដឹងផ្ដល់ប្រឆាំងសកម្មភាពអ្នកសារព័ត៌មានទៀត ដែលយើងក៏ជាផ្នែកមួយនៃការទទួលបានផលប្រយោជន៍ និងព័ត៌មានពីពួកគាត់ផងនោះ»។
កាលពីថ្ងៃទី៨ ខែវិច្ឆិកា ឆ្នាំ២០២១ អ្នករាយការណ៍ព័ត៌មាន LSN TV ចំនួន ២នាក់ គឺលោក សាយ សុភា និងលោក អ៊ីង ធឿង ត្រូវបានសមត្ថកិច្ចខេត្តកំពតចាប់ខ្លួន និងបញ្ជូនទៅតុលាការ ក្រោមការចោទប្រកាន់ថាបានផ្សាយព័ត៌មាន «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបរិហារកេរ្តិ៍ជាសាធារណៈ» បន្ទាប់ពីពួកគេការផ្សាយព័ត៌មានរឿងជម្លោះដីធ្លី និងការចាប់ខ្លួនពលរដ្ឋ៤នាក់នៅខេត្តកំពត ប៉ុន្តែត្រូវបានដោះលែងវិញ ក្រោយពីតុលាការសាកសួរនិងចាប់ឃុំខ្លួនចំនួន៣យប់រួចមក។
កាលពីថ្ងៃទី១៦ ខែវិច្ឆិកា ឆ្នាំ២០២១ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មានប្រសាសន៍ថា ករណីសមត្ថកិច្ចចាប់ខ្លួនអ្នកសារព័ត៌មាន២នាក់នៅខេត្តកំពតនេះ ជារឿងមិនត្រឹមត្រូវឡើយ។
លោកថា អ្នកសារព័ត៌មានមានសិទ្ធិពេញលេញក្នុងការចុះយកព័ត៌មានទូទាំងប្រទេស ដោយពុំចាំបាច់ជូនដំណឹងឬសុំការអនុញ្ញាតពីអាជ្ញាធរឡើយ។
លោកថា៖ «អភិបាលខេត្តមួយ [លោក ម៉ៅ ធនិន] អ្នកកាសែតទៅណា ត្រូវរាយការណ៍ ត្រូវជូនដំណឹងទៅអាជ្ញាធរ មិនមែនអ៊ីចឹងទេ។ មាត្រា៤០ បាននិយាយពីសិទ្ធិដើរហើរបស់ពលរដ្ឋ គេទៅណា គេមានសិទ្ធិរបស់គេ គេមិនបាច់ជូនដំណឹងយើងទេ»។
រដ្ឋធម្មនុញ្ញកម្ពុជា ចែងថា សេរីភាពក្នុងការដើរឆ្ងាយជិត និងតាំងទីលំនៅស្របច្បាប់របស់ពលរដ្ឋ ត្រូវបានគោរព។ ប្រជាពលរដ្ឋខ្មែរមានសេរីភាពខាងការបញ្ចេញមតិ សេរីភាពខាងសារព័ត៌មាន សេរីភាពខាងការបោះពុម្ពផ្សាយ និងសេរីភាពជួបប្រជុំ ជាដើម៕
