យុវជនមួយក្រុមនៃអង្គការតម្លាភាពខេត្តកំពត បានកំណត់យកសង្កាត់ចំនួន២ ក្នុងក្រុងកំពត ដើម្បីដាក់ឱ្យអនុវត្តសាកល្បងសម្រាប់គម្រោង «គោលនយោបាយភូមិឃុំមានសុវត្ថិភាព» ខណៈបទល្មើស និងអសន្តិសុខក្នុងមូលដ្ឋាន បន្តកើតឡើងញឹកញាប់ ដែលធ្វើឱ្យឃុំសង្កាត់មានអំពើចោរកម្ម ក្មេងទំនើង និងហេតុការណ៍គ្រោះថ្នាក់ផ្សេងៗជាហូរហែ។
ប្រធានយុវជនរបស់អង្គការតម្លាភាព និងជាអ្នកបង្កើតគម្រោង «គោលនយោបាយភូមិឃុំមានសុវត្ថិភាព» កញ្ញា ស៊ុន សុវណ្ណដាណេ ឱ្យដឹងថា នៅចំពោះមុខនេះ សង្កាត់ចំនួន២ គឺសង្កាត់កំពង់បាយ និងសង្កាត់អណ្ដូងខ្មែរ នៃក្រុងកំពត ត្រូវបានរៀបចំសម្រាប់ការអនុវត្តគម្រោងនេះ ជាជំហានដំបូង។ កញ្ញាបន្តថា ការផ្ដួចផ្ដើមឱ្យមានគម្រោងនេះឡើង គឺដើម្បីបញ្ឈប់រាល់សកម្មភាព អសន្តិសុខក្នុងសង្កាត់ ដែលតែងតែកើតមាន និងនៅតែដោះស្រាយមិនចេញ។
ម្យ៉ាងវិញទៀត សុវណ្ណដាណេ អះអាងថា គោលនយោបាយភូមិឃុំមានសុវត្ថិភាពនេះ ក៏នឹងផ្សព្វផ្សាយឱ្យបានទូលំទូលាយដែរ ដូចជា លេខទូរសព្ទរបស់អាជ្ញាធរ ជាដើម ដើម្បីឱ្យពលរដ្ឋរាយការណ៍បានទាន់ពេលវេលា នៅពេលមានហេតុការណ៍កើតឡើង។
កញ្ញាបន្តថា៖ «ទាក់ទងទៅនឹងការរាយការណ៍ ពួកខ្ញុំក៏បានសួរទៅកាន់អាជ្ញាធរដែរ នៅពេលពួកយើងទទួលវគ្គបណ្ដុះបណ្ដាលហ្នឹង គឺពួកគាត់រក្សារាល់ការសម្ងាត់ជូន! ហើយទាក់ទងទៅនឹងការរាយការណ៍ហ្នឹងផងដែរ នៅក្នុងគោលនយោបាយភូមិឃុំមានសុវត្ថិភាព គឺមាននិយាយពីគោលនយោបាយប្រាំពីរប្រការ ហើយមានលេខទូរសព្ទសម្រាប់ទំនាក់ទំនង។ រាល់ការរាយការណ៍ គឺរក្សាសុវត្ថិភាពជូនជនដែលរាយការណ៍»។
មិនខុសគ្នាទេ កញ្ញា សើ វីរី ជាយុវតីម្នាក់ក្នុងក្រុមនៃអង្គការតម្លាភាពតំបន់កំពត ថ្លែងថា ការអនុវត្តគម្រោងនេះ ជាជំហានដំបូង គឺក្រុមការងាររៀបចំជាវគ្គបណ្ដុះបណ្ដាលជាមុនសិន មុននឹងចុះចែកបណ្ណព័ត៌មានទៅដល់ដៃពលរដ្ឋនៅមូលដ្ឋាន។
ប្រភពបន្តថា ក្នុងវគ្គបណ្ដុះបណ្ដាលនេះ គឺក្រុមការងារនឹងសហការជាមួយនគរបាលប៉ុស្តិ៍ អាជ្ញាធរសង្កាត់ និងភាគីពាក់ព័ន្ធផ្សេងទៀត ដើម្បីឱ្យពួកគេចែករំលែកបទពិសោធ និងផ្ទេរចំណេះដឹង អំពីការទប់ស្កាត់បទល្មើសនៅក្នុងសហគមន៍ ក្នុងទិសដៅជំរុញឱ្យការអនុវត្តគម្រោងដំណើរការទៅមានប្រសិទ្ធភាព។
កញ្ញាបន្តថា៖ «នៅពេលយើងចុះចែកខិតបណ្ណ យើងឃើញថាប្រជាពលរដ្ឋគាត់ជួបបញ្ហាច្រើន ហើយគាត់បានចែករំលែកបញ្ហារបស់គាត់មកប្រាប់ពួកយើង។ មួយវិញទៀត ប្រជាពលរដ្ឋខ្លះ គាត់មិនសូវសហការជាមួយយើងទេ» ។
អង្គការតម្លាភាពប្រចាំខេត្តកំពត មានចក្ខុវិស័យនៅក្នុងការអនុវត្តគម្រោងរបស់ខ្លួន ក្នុងពេលខាងមុខ ឱ្យបានគ្រប់ទាំង៥សង្កាត់ នៅក្នុងក្រុងកំពត ខេត្តកំពតនេះ។ ក៏ប៉ុន្តែ នៅចំពោះមុខនេះ ដោយសារអង្គការមានលទ្ធភាពថវិកាអនុវត្តគម្រោងបានត្រឹម២សង្កាត់នៅឡើយ ដូច្នេះនៅ៣សង្កាត់ទៀត ដូចជា សង្កាត់ត្រើយកោះ សង្កាត់កំពង់កណ្ដាល និងសង្កាត់ក្រាំងអំពិល នឹងបន្តនៅពេលក្រោយទៀត ប្រសិនបើមានថវិកាគ្រប់គ្រាន់ក្នុងការអនុវត្តគម្រោងនេះ។
ហាក់ផ្ទុយពីនេះ ចៅសង្កាត់រងទីមួយ នៃសង្កាត់កំពង់បាយ លោក ឃួន អ៊ត មិនឯកភាពទេថា អំពើអសន្តិសុខនៅក្នុងសង្កាត់មានការកើនឡើងនោះ។ លោកអះអាងថា បច្ចុប្បន្ននេះ និយាយដោយឡែក សម្រាប់សង្កាត់កំពង់បាយ អំពើបាតុភាពផ្សេងៗបានថយចុះប្រមាណ៤០ភាគរយហើយ ដូចជា អំពើហិង្សាក្នុងគ្រួសារ បញ្ហាគ្រឿងញៀន អំពើឆក់ប្លន់ ចោរកម្ម និងល្បែងស៊ីសង ជាដើម។
បើតាមចៅសង្កាត់រងរូបនេះ ចាត់ទុកថា អ្វីដែលក្រុមយុវជនធ្វើនេះ វាជារឿងត្រឹមត្រូវ ហើយយុវជនគួរស្វែងយល់ និងចូលរួមឱ្យបានសកម្មនៅក្នុងកិច្ចការសង្គមឱ្យបានច្រើនជាងនេះបន្ថែមទៀត។ លោកបន្តថា មែនទែនទៅ គោលនយោបាយភូមិឃុំមានសុវត្ថិភាពនេះ មិនមែនជារឿងថ្មីទេ ដោយសាររដ្ឋាភិបាលបានដាក់ចេញរួចហើយនូវគោលនយោបាយនេះ ដើម្បីឱ្យមានការអនុវត្តនៅតាមឃុំសង្កាត់។
លោកបន្តថា៖ «យុវជនគួរតែចូលរួមក្នុងសកម្មភាពសង្គមអស់ទាំងនេះ ដើម្បីឱ្យដឹងពីការងារសង្គមថាវាយ៉ាងម៉េច! ហើយយុវជនគឺជាអ្នកបន្តវេនពីចាស់ៗ អ៊ីចឹងពួកគាត់គួរតែឈ្វេងយល់ពីបញ្ហាហ្នឹង»។
បើទោះបែបណា ទាំងមន្ត្រីនគរបាល នៃរដ្ឋបាលក្រុងកំពត និងអាជ្ញាធរសង្កាត់ បានបដិសេធក្នុងការផ្ដល់ព័ត៌មានលម្អិតអំពីការថយចុះនៃបទល្មើសនៅក្នុងឃុំសង្កាត់។ ពួកគេលើកឡើងថា រាល់របាយការណ៍ដែលបង្ក្រាបបាននៃបទល្មើស គឺត្រូវបញ្ជូនចេញ ដើម្បីឱ្យថ្នាក់ដឹកនាំ ត្រួតពិនិត្យ និងសម្រេចរួចអស់ហើយ ហេតុនេះពួកគេមិនចាំពីតួលេខនៃបទល្មើសដែលបង្ក្រាបបានប្រចាំខែទេ។
គោលនយោបាយភូមិឃុំមានសុវត្ថិភាព ដែលដាក់ចេញដោយរដ្ឋាភិបាលកាលពីឆ្នាំ២០២១ បង្ហាញថា ជាយន្តការមួយដើម្បីឆ្លើយតបឱ្យទាន់ពេលវេលា និងតម្រូវការចាំបាច់របស់ពលរដ្ឋ។ តាមរយៈគោលនយោបាយទាំង៧ចំណុចនេះ គឺលក្ខខណ្ឌទី២ បានកំណត់ក្នុងការធានាដោយគ្មានបទល្មើសលួច ឆក់ ប្លន់ ល្បែងស៊ីសងខុសច្បាប់ និងបទល្មើសគ្រប់ប្រភេទនៅក្នុងមូលដ្ឋាន។
យ៉ាងនេះក្ដី ប្រធានអង្គការការពារសិទ្ធិមនុស្ស លីកាដូ ប្រចាំខេត្តកំពត លោក ប៉ែន វុទ្ធា ឱ្យដឹងថា ការដែលក្រុមយុវជនរបស់អង្គការតម្លាភាព ផ្ដួចផ្ដើមគម្រោងក្នុងការជំរុញឱ្យមានការអនុវត្តប្រកបដោយប្រសិទ្ធភាពនៃគោលនយោបាយភូមិឃុំមានសុវត្ថិភាព គឺជារឿងល្អប្រសើរសម្រាប់សហគមន៍ គ្មានបទល្មើស។
លើសពីនេះទៀត សកម្មភាពនេះក៏វាស្របទៅនឹងគោលនយោបាយអភិវឌ្ឍន៍យុវជនរបស់រដ្ឋាភិបាល ដែលធានាក្នុងការលើកកម្ពស់យុវជនឱ្យចូលរួមក្នុងសកម្មភាពសង្គម និងសហការជិតស្និទ្ធជាមួយអាជ្ញាធរដែរ។
លោកបន្តថា៖ «សម្រាប់ភាគីពាក់ព័ន្ធ ក៏ដូចជាអាជ្ញាធរ ឬអង្គការដៃគូ ជាពិសេសអាជ្ញាធរមូលដ្ឋាន កាលណាមានអង្គការយុវជន ឬក្រុមយុវជនដែលគាត់បានចូលទៅអនុវត្តគម្រោងពាក់ព័ន្ធទៅនឹងគោលនយោបាយភូមិឃុំមានសុវត្ថិភាពក្នុងមូលដ្ឋាន វាជាចំណុចមួយដែលល្អ ដែលគាត់គួរតែបើកចិត្តទូលាយក្នុងការផ្ដល់កិច្ចសហការ ក៏ដូចជាបង្កលក្ខណៈងាយស្រួលដល់យុវជន និងជួយគាំទ្រទៅដល់យុវជន ដើម្បីជួយផ្សព្វផ្សាយគោលនយោបាយភូមិឃុំមានសុវត្ថិភាពឱ្យកាន់តែទូលំទូលាយ និងស៊ីជម្រៅ ដើម្បីជាប្រយោជន៍ដល់ប្រជាពលរដ្ឋក្នុងសហគមន៍ ឬក្នុងមូលដ្ឋានរបស់ពួកគាត់»។
បើទោះគោលនយោបាយដែលត្រូវបានដាក់ចេញដោយរដ្ឋាភិបាលល្អឥតខ្ចោះ និងការប្ដេជ្ញាចិត្តពីភាគីពាក់ព័ន្ធក្នុងការអនុវត្តឱ្យមានប្រសិទ្ធភាពក្ដី គេសង្កេតឃើញថា បញ្ហាគ្រឿងញៀន ល្បែងស៊ីសង និងអំពើឆក់ប្លន់ នៅក្នុងសហគមន៍ បានកើតឡើងស្ទើររាលថ្ងៃ។ មានពេលខ្លះ ជនប្រព្រឹត្តបទល្មើសនៅតែអាចរស់នៅក្រៅសំណាញ់ច្បាប់បានដូចអ្នកដទៃដែរ ក្រោយពួកគេចាប់ខ្លួន និងចោទប្រកាន់តាមផ្លូវតុលាការ៕
ដោយកញ្ញា ឆន វិរីយ៉ា
