តុលាការចេញដីកាបង្គាប់ឱ្យចាប់ខ្លួនមេដឹកនាំសហជីពចំនួន៣នាក់បន្ថែមទៀត ពាក់ព័ន្ធនឹងការញុះញង់ និងរៀបចំការតវ៉ានៅមុខក្រុមហ៊ុនណាហ្គាវើលដ៍ ខណៈមនុស្ស៦នាក់ត្រូវបានតុលាការចោទប្រកាន់និងបង្គាប់ឱ្យឃុំខ្លួននៅក្នុងពន្ធនាគារជាបណ្ដោះអាសន្ន។
ក្នុងសន្និសីទនៅស្នងការដ្ឋាននគរបាលរាជធានីភ្នំពេញ នាព្រឹកថ្ងៃអង្គារនេះ ព្រះរាជអាជ្ញារងអមសាលាដំបូងរាជធានីភ្នំពេញ លោក សេង ហៀង បានថ្លែងថា ក្រោយពីធ្វើការស្រាវជ្រាវលើក្រុមកម្មករដែលធ្វើកូដកម្មទាមទារលក្ខខណ្ឌការងារពីក្រុមហ៊ុនណាហ្គាវើលដ៍ អស់រយៈពេលជាង១០ថ្ងៃនេះ សមត្ថកិច្ចបានចុះចាប់ខ្លួនបុគ្គលិកណាហ្គាវើលដ៍ចំនួន១០នាក់កាលពីយប់ថ្ងៃឆ្លងឆ្នាំ ដោយមានដីកាត្រឹមត្រូវតាមច្បាប់ មិនដូចការលើកឡើងរបស់បុគ្គលមួយចំនួនដែលថាសមត្ថកិច្ចចុះចាប់មនុស្សដោយគ្មានដីកានោះទេ។
ព្រះរាជអាជ្ញារងរូបនោះបញ្ជាក់ថា ដើមចមដែលនាំឱ្យសមត្ថកិច្ចចាប់ខ្លួនកម្មករ ដោយសារពួកគេប្រមូលផ្ដុំគ្នាតវ៉ាដោយខុសច្បាប់ និងមានអង្គការចាត់តាំងនៅក្រៅប្រទេសមួយចំនួនជួយឧបត្ថម្ភជាប្រាក់រាប់ម៉ឺនដុល្លារដល់ក្រុមសហជីពក្នុងក្រុមហ៊ុនណាហ្គាវើលដ៍ ដើម្បីធ្វើបាតុកម្មប្រឆាំងនឹងក្រុមហ៊ុន។
ករណីនេះ លោក សេង ហៀង បញ្ជាក់ថា ក្រោយពីប្រមូលបានភស្តុតាងមួយចំនួន តុលាការបានចេញដីកាបង្គាប់ឱ្យចាប់ខ្លួនមេសហជីពចំនួន៣នាក់បន្ថែមទៀតដែលដឹកនាំបាតុករ រួមមាន កញ្ញា ឈឹម ស៊ីថរ, លោក សុខ ណារិទ្ធ និងលោក សុខ គង្គា ដើម្បីយកមកផ្ដន្ទាទោសតាមច្បាប់។
លោកមានប្រសាសន៍ថា៖ «បច្ចុប្បន្ននេះ ដីកានៅក្នុងដៃស្ថាប័នអយ្យការហើយ អ៊ីចឹងស្ថាប័នអយ្យការជាកិច្ចបន្ត គឺសហការជាមួយស្ថាប័នមានសមត្ថកិច្ច ទាំងកងរាជអាវុធហត្ថ ទាំងមន្ត្រីប៉ូលិស គឺយើងត្រូវអនុវត្តជាមួយគ្នា ដើម្បីស្វែងរកចាប់ខ្លួនមេក្រុម គេហៅថា មេខ្លោង គឺ ឈឹម ស៊ីថរ និង២នាក់ទៀត ដើម្បីយកមកផ្ដន្ទាទោសតាមច្បាប់»។
លោកមានប្រសាសន៍បន្ថែមថា៖ «ហើយបច្ចុប្បន្ននេះ សមត្ថកិច្ចយើងកំពុងតែដុតដៃដុតជើង កំពុងតែស្វែងរកហើយ ហើយនីតិវិធីបន្តការចាប់ខ្លួនបាន យើងនឹងបញ្ជូនមកសាលាដំបូងរាជធានីភ្នំពេញដើម្បីបន្តនីតិវិធី»។
ព្រះរាជអាជ្ញារង សេង ហៀង បានឱ្យដឹងទៀតថា ចំពោះក្រុមបាតុករប្រមាណ១៧នាក់ផ្សេងទៀតដែលសមត្ថកិច្ចចុះចាប់ខ្លួនកាលពីថ្ងៃទី៣ ខែមករា ម្សិលមិញ គឺសមត្ថកិច្ចកំពុងបន្តការសាកសួរ ហើយបើសិនជារកឃើញថាពាក់ព័ន្ធនឹងការគប់គិតគ្នាជាមួយមេសហជីពធ្វើបាតុកម្ម នឹងបញ្ជូនទៅតុលាការចាត់វិធានការច្បាប់ដែរ។ ប៉ុន្តែបើរកឃើញថា ពួកគេចាញ់បោកមេសហជីពក្នុងការចូលរួមធ្វើបាតុកម្មនោះ សមត្ថកិច្ចនឹងធ្វើការអប់រំដោះលែងពួកគេវិញនាពេលឆាប់ៗនេះ។
បន្ថែមពីនេះ លោក សេង ហៀង ក៏បានអំពាវនាវទៅបុគ្គលិកក្រុមហ៊ុនណាហ្គាវើលដ៍ឈប់ធ្វើបាតុកម្ម និងនាំគ្នាទៅជួបចរចាគ្នាជាមួយក្រសួងការងារ ដើម្បីរកដំណោះស្រាយល្អរវាងកម្មករនិងភាគីក្រុមហ៊ុនណាហ្គាវើលដ៍ផងដែរ។
កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ បានផ្ញើសារប្រាប់អ្នកសារព័ត៌មាននៅព្រឹកថ្ងៃអង្គារនេះថា កញ្ញា និងសហការីម្នាក់ទៀត គឺលោក សុខ ណារិទ្ធ នឹងទៅចូលរួមធ្វើកូដកម្មដោយសន្តិវិធីនៅទីតាំងមុខក្រុមហ៊ុនកាស៊ីណូណាហ្គាវើលដ៍ ដែលជាទីកន្លែងក្រុមសហជីពនិងសមាជិកសហជីពកំពុងធ្វើកូដកម្មនៅក្នុងរង្វង់ម៉ោង២រសៀលថ្ងៃនេះ។
កញ្ញា ឈឹម ស៊ីថរ បានសរសេរថា៖ «នាងខ្ញុំមានគម្រោងបង្ហាញខ្លួននៅក្នុងកូដកម្មនៅរសៀលថ្ងៃនេះ ក្នុងរង្វង់ម៉ោង២! ហើយប្រហែលជាមានការចាប់ខ្លួននាងខ្ញុំនៅទីនោះ»។
កាលពីថ្ងៃទី១ ខែមករា ឆ្នាំ២០២២នេះ ក្រុមសហជីពមួយចំនួនបានចេញសេចក្ដីថ្លែងការណ៍ដាច់ដោយឡែកៗពីគ្នា ដោយគាំទ្រចំពោះការធ្វើកូដកម្មដោយសន្តិវិធីរបស់បុគ្គលិកក្រុមហ៊ុនណាហ្គាវើលដ៍ជាង១ ០០០នាក់ ដោយថា ការធ្វើកូដកម្មអហិង្សាជាការអនុវត្តសិទ្ធិជាមូលដ្ឋានដែលបានធានាដោយរដ្ឋធម្មនុញ្ញ និងច្បាប់ការងារ ច្បាប់ស្ដីពីសហជីព និងផ្អែកតាមលក្ខន្តិកៈរបស់សហជីពដែលចុះបញ្ជីនៅក្រសួងការងារផងដែរ។
ជាមួយគ្នានេះ ក្រុមសហជីពនិងមន្ត្រីអង្គការមួយចំនួនបង្ហាញការមិនពេញចិត្តនិងថ្កោលទោសចំពោះវិធានការរបស់សមត្ថកិច្ចចំពោះការចាប់ខ្លួនថ្នាក់ដឹកនាំនិងសកម្មជនសហជីពទាំងនោះ ថាមិនបានអនុវត្តតួនាទីនិងកាតព្វកិច្ចរបស់ខ្លួនឱ្យស្របតាមច្បាប់ ក្នុងការការពារសុវត្ថិភាពក្រុមកូដករដែលធ្វើកូដកម្មដោយសន្តិវិធីឡើយ៕
