លោកនាយករដ្ឋមន្រ្តី ហ៊ុន សែន បានបញ្ជាឱ្យយកអ្នកជំងឺកូវីដ-១៩ បំប្លែងថ្មីប្រភេទ «អូមីក្រុង» ព្យាបាលនៅមន្ទីរពេទ្យទូទាំងប្រទេស ដោយមិនអនុញ្ញាតឱ្យអ្នកជំងឺឆ្លងវីរុសប្រភេទថ្មីនេះព្យាបាលនៅផ្ទះខ្លួនឯងឡើយ ទោះបីជាអ្នកនោះមានឋានៈអ្វីក៏ដោយ។
ក្នុងពិធីប្រគល់ប្រាក់រង្វាន់ជូនកីឡាការិនី អ៊ុក ស្រីមុំ ដែលដណ្ដើមបានមេដាយមាសពិភពលោកពីកីឡាប៉េតង់ នាព្រឹកថ្ងៃពុធនេះ លោកនាយករដ្ឋមន្ត្រី ហ៊ុន សែន ថ្លែងថា អ្នកជំងឺកូវីដ-១៩ ប្រភេទអូមីក្រុង ត្រូវតែព្យាបាលក្នុងមន្ទីរពេទ្យដាច់ខាត ដោយមិនត្រូវអនុញ្ញាតឱ្យព្យាបាលនៅក្នុងផ្ទះឡើយ លើកលែងតែអ្នកជំងឺប្រភេទ«ដែលតា» និង «អាល់ហ្វា» ប៉ុណ្ណោះ។
លោកបន្តថា ការដាក់បទបញ្ជានៅថ្ងៃនេះ ដោយសារកន្លងមកខាងមន្ត្រីៗតែងតែសុំយោបល់របស់លោក ក្រោយពីមានអ្នកជំងឺកូវីដ-១៩ខ្លះមិនព្រមទៅព្យាបាលនៅមន្ទីរពេទ្យ និងស្នើសុំព្យាបាលនៅផ្ទះខ្លួនឯង។ ករណីនេះ លោកថា ទោះបីជាអ្នកនោះមានឋានៈអ្វីឬអ្នកជំនួញក៏ដោយ ត្រូវតែព្យាបាលនៅមន្ទីរពេទ្យ លើកលែងមន្ត្រីទូតប៉ុណ្ណោះ។
លោក ហ៊ុន សែន បន្តថា ទោះបីជាជំងឺកូវីដ-១៩ បំប្លែងថ្មី អូមីក្រុង មិនមានសភាពធ្ងន់ធ្ងរក៏ពិតមែន ប៉ុន្តែជំងឺនេះវាឆ្លងលឿនជាងជំងឺប្រភេទ ដែលតា និង អាល់ហ្វា។
លោកថា៖ «ឥលូវខ្ញុំសូមដាក់បទបញ្ជាជាសាធារណៈឱ្យឮទាំងអស់គ្នាទូទាំងប្រទេស ហើយកុំចាំបាច់សួរយោបល់ខ្ញុំ ទោះយកត្រាក់ទ័រទៅអូសក៏យកដែរ យកទៅដាក់ពេទ្យ។ កុំឱ្យពិបាក បន្តិចៗនាំគ្នាលើកទូរសព្ទ សុំយោបល់ថា កូនអ្នកនេះអ្នកនោះ ប្រពន្ធអ្នកនោះសុំព្យាបាលនៅផ្ទះ អត់ទេ! ឥលូវដាក់ចេញបទបញ្ជាអ៊ីចឹងតែម្ដងជាជំហរ ដើម្បីធានាថា ឱ្យតែអូមីក្រុងហើយត្រូវតែចូលពេទ្យ ព្យាបាលជាហើយចាំមកផ្ទះ។ អត់មានថាអ្នកនោះឋានៈអី មានឬក្រ អត់ទេ! មកពីប្រទេសណា អត់ទេ!»
លោកនាយករដ្ឋមន្ត្រីបន្ថែមថា បច្ចុប្បន្ន លោកបានសម្រេចឱ្យមានការរៀបចំមន្ទីរពេទ្យហ្លួងម៉ែមួយទៀត ដើម្បីដាក់អ្នកជំងឺកូវីដ-១៩បំប្លែងថ្មីប្រភេទអូមីក្រុង។ លោកបញ្ជាក់ថា មកដល់ពេលនេះ កម្ពុជាមានអ្នកជំងឺកូវីដ-១៩បំប្លែងថ្មីប្រភេទអូមីក្រុងចំនួន៩៤ករណីហើយ ប៉ុន្តែក្នុងចំណោមអ្នកជំងឺទាំងនោះក៏មានអ្នកជាសះស្បើយជាបន្តបន្ទាប់ផងដែរ៕
