ក្រសួងសុខាភិបាល រកឃើញថា អ្នកឆ្លងជំងឺកូវីដ-១៩ បំប្លែងថ្មីប្រភេទអូមីក្រុង ភាគច្រើនជាអ្នកដំណើរមកពីបរទេសតាមផ្លូវអាកាស និងមានលទ្ធភាពឆ្លងលឿន ដែលករណីនេះ ក្រសួងមិនអនុញ្ញាតឱ្យអ្នកជំងឺសម្រាកព្យាបាលនៅផ្ទះឡើយ។
យោងតាមលិខិតរបស់រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ផ្ញើជូនប្រធានគណៈកម្មការប្រយុទ្ធនឹងជំងឺកូវីដ-១៩ថ្នាក់រាជធានី-ខេត្ត ចុះថ្ងៃទី០៥ ខែមករា ឆ្នាំ២០២២នេះ បានលើកឡើងថា ករណីជំងឺកូវីដ-១៩ បំប្លែងថ្មីប្រភេទអូមីក្រុង ត្រូវបានរកឃើញថា ជាករណីនាំចូលមកពីបរទេស និងភាគច្រើនជាអ្នកដំណើរមកពីបរទេសតាមផ្លូវអាកាស។
លោកបន្តថា ទោះជាពុំទាន់មានទិន្នន័យបញ្ជាក់ថា វីរុសនេះបណ្តាលឱ្យភាពធ្ងន់ធ្ងរនៅឡើយនោះ ប៉ុន្តែវាមានលទ្ធភាពឆ្លងលឿន។
ដើម្បីបង្ការ និងទប់ស្កាត់ជាអតិបរមានូវការឆ្លងរាលដាលនៃវីរុសនេះចូលក្នុងសហគមន៍ លោក ម៉ម ប៊ុនហេង បានណែនាំដល់ប្រធានគណៈកម្មការប្រយុទ្ធនឹងជំងឺកូវីដ-១៩ ថ្នាក់រាជធានី-ខេត្ត មិនត្រូវអនុញ្ញាតឱ្យអ្នកជំងឺព្យាបាលនៅតាមផ្ទះឡើយ ទោះបីក្នុងលក្ខខណ្ឌណាក៏ដោយ។
លោកបានគូសបញ្ជាក់ក្នុងលិខិតថា៖ «អ្នកជំងឺកូវីដ-១៩ បំប្លែងថ្មី ប្រភេទអូមីក្រុងទាំងអស់ ត្រូវស្នាក់នៅ ថែទាំ និងព្យាបាលនៅក្នុងមន្ទីរពេទ្យ ឬមណ្ឌលព្យាបាលជំងឺកូវីដ-១៩ ដែលកំណត់ដោយក្រសួងសុខាភិបាល ឬដោយគណៈកម្មការប្រយុទ្ធនឹងជំងឺកូវីដ-១៩ថ្នាក់រាជធានី-ខេត្ត»។
លិខិតរបស់រដ្ឋមន្ត្រីក្រសួងសុខាភិបាល ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន នៅថ្ងៃនេះ បានបញ្ជាឱ្យយកអ្នកជំងឺកូវីដ-១៩ បំប្លែងថ្មីប្រភេទ«អូមីក្រុង» ព្យាបាលនៅមន្ទីរពេទ្យ ដោយមិនអនុញ្ញាតឱ្យអ្នកជំងឺព្យាបាលនៅផ្ទះខ្លួនឯងឡើយ ទោះបីជាអ្នកនោះ មានឋានៈអ្វីក៏ដោយ។
លោកបន្តថា ទោះបីជាជំងឺកូវីដ-១៩ បំប្លែងថ្មីអូមីក្រុងមិនមានសភាពធ្ងន់ធ្ងរក៏ពិតមែន ប៉ុន្តែជំងឺនេះ វាឆ្លងលឿនជាងជំងឺប្រភេទដែលតា និងអាល់ហ្វា។
បើតាមលោកនាយករដ្ឋមន្ត្រី ហ៊ុន សែន គិតមកដល់ថ្ងៃទី០៤ ខែមករាម្សិលមិញ កម្ពុជាមានអ្នកជំងឺកូវីដ-១៩ បំប្លែងថ្មីប្រភេទអូមីក្រុងចំនួន ៩៤ករណីហើយ ប៉ុន្តែក្នុងចំណោមអ្នកជំងឺទាំងនោះ ក៏មានអ្នកជាសះស្បើយជាបន្តបន្ទាប់ផងដែរ៕