តុលាការសម្រេចឃុំខ្លួន កញ្ញា ឈឹម ស៊ីថរ និង លោក សុខ ណារិទ្ធ ថ្នាក់ដឹកនាំសហជីពនៅក្រុមហ៊ុនណាហ្គាវើលដ៍ នៅពន្ធនាគារព្រៃស នៅថ្ងៃនេះ ពាក់ព័ន្ធនឹងការចោទប្រកាន់ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌកម្ពុជាខណៈមន្ត្រីសហជីពម្នាក់ទៀត លោក សុខ គង្គា ត្រូវបានដាក់ឱ្យស្ថិតនៅក្រោមការត្រួតពិនិត្យរបស់តុលាការ។
លោក សំ ចំរើន សហមេធាវីការពារក្តីឱ្យមេដឹកនាំសហជីពទាំង៣រូប បានប្រាប់វីអូឌីថា ក្រោយពីការសាកសួរពេញមួយថ្ងៃ ព្រះរាជអាជ្ញាអមសាលាដំបូងរាជធានីភ្នំពេញ បានសម្រេចចោទប្រកាន់ កញ្ញា ឈឹម ស៊ីថរ និងលោក សុខ ណារិទ្ធ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបញ្ជូនពួកគេទៅឃុំខ្លួននៅពន្ធនាគារព្រៃស ខណៈលោក សុខ គង្គា ត្រូវបានដាក់ឱ្យស្ថិតនៅក្រោមការត្រួតពិនិត្យរបស់តុលាការ និងបាន ដោះលែងឱ្យនៅក្រៅឃុំ។
លោកមេធាវី សំ ចំរើន ចាត់ទុកការសម្រេចចោទប្រកាន់មកលើកូនក្តីរបស់ខ្លួននេះថា ធ្វើឡើងលឿនពេក និងមិនមានយុត្តិធម៌នោះទេ។ ករណីនេះលោកថា នឹងរៀបចំពាក្យបណ្តឹងប្តឹងជំទាស់ទៅសភាស៊ើបសួរនៃសាលាឧទ្ធរណ៍ ដើម្បីទាមទារឱ្យកូនក្តីបាននៅក្រៅឃុំបណ្តោះអាសន្នវិញ។
លោកមានប្រសាសន៍ថា៖ «ខ្ញុំយល់ថា សេចក្តីសម្រេចឃុំខ្លួនពួកគេ ជាសេចក្តីសម្រេចភ្ជាប់មកជាមួយនឹងការធ្វើបុរេវិនិច្ឆ័យយ៉ាងធ្ងន់ធ្ងរ មានន័យថា ការសន្មត់រឿងអ្វីមួយដែលឆាប់ពេក លឿនពេក ងាយស្រួលពេក។ ប្រហែលជាខ្ញុំប្តឹងទៅឧទ្ធរណ៍នៃការសម្រេចឃុំខ្លួនហ្នឹង»។
វីអូឌី មិនអាចសុំការបញ្ជាក់ពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេនៅល្ងាចថ្ងៃពុធនេះ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា ការចាប់ខ្លួនសហជីពនិងតំណាងចំនួន៣នាក់នេះ មិនមែនជាដំណោះស្រាយល្អរវាងក្រុមហ៊ុននិងកម្មករនោះទេ។ លោកថា បើសមត្ថកិច្ចនៅតែបន្តចាប់ខ្លួនកម្មករជាបន្តបន្ទាប់ ជាការរំលោភលើសិទ្ធិការងារ រំលោភសិទ្ធិជាមូលដ្ឋាន និងជាការគំរាមកំហែងដល់អ្នកតស៊ូមតិបែបអហិង្សា។
មន្ត្រីសិទ្ធិមនុស្សរូបនោះ បញ្ជាក់ថា បញ្ហាដែលកើតឡើងដោយសាររឿងទាមទារសិទ្ធិការងារ ដែលករណីនេះ ស្ថាប័នពាក់ព័ន្ធត្រូវរកវិធីដោះស្រាយវិវាទការងារជាមួយក្រុមហ៊ុន ជាជាងចាប់សហជីពនិងតំណាង បញ្ជូនទៅឃុំខ្លួននៅពន្ធនាគារបែបនេះ។
លោកមានប្រសាសន៍ថា៖ «យើងឃើញហើយមានការរិះគន់ច្រើនពីបញ្ហាសិទ្ធិមនុស្ស បញ្ហាសិទ្ធិការងារ ហើយការរំលោភទៅលើវិជ្ជាជីវៈសហជីពជាដើម ដែលវាមិនមែនជាដំណោះស្រាយល្អទេ ពីព្រោះការធ្វើកូដកម្មចេញពីវិវាទការងារ អីចឹងអ្វីដែលសំខាន់គួរតែដោះស្រាយឬសគល់នៃវិវាទការងារ ដើម្បីបញ្ចប់កូដកម្មហ្នឹង វាជាដំណោះស្រាយល្អបំផុត»។
ស្ថានទូតអូស្ត្រាលីប្រចាំនៅកម្ពុជា នៅថ្ងៃនេះ ក៏បានអំពាវនាវឱ្យភាគីទាំងអស់ដែលពាក់ព័ន្ធករណីកូដកម្មនៅក្រុមហ៊ុនណាហ្គាវើលដ៍ត្រឡប់ទៅរកតុចរចាវិញ។
ស្ថានទូតអូស្ត្រាលី បានសរសេរសេចក្តីថ្លែងការណ៍ខ្លីនៅលើទំព័រហ្វេសប៊ុកថា ស្ថានទូតបានដឹងឮអំពីកូដកម្មដែលកំពុងកើតមាន ទាក់ទងនឹងកាស៊ីណូណាហ្គាវើលដ៍ ក្នុងរាជធានីភ្នំពេញ។
ស្ថានទូតបានសរសេរថា៖ «ប្រជាជនមានសិទ្ធិក្នុងការជួបជុំដោយសន្តិវិធី និងមានសេរីភាពក្នុងការបញ្ចេញមតិ ហើយស្ថានទូតលើកទឹកចិត្តឱ្យភាគីទាំងអស់ ត្រឡប់ទៅរកការចរចាវិញ ដើម្បីស្វែងរកដំណោះស្រាយដោយសន្តិវិធី និងឆាប់រហ័ស»។
ចំណែក ស្ថានទូតសហរដ្ឋអាមេរិក បានបង្ហោះសារនៅលើទំព័រហ្វេសប៊ុកកាលពីថ្ងៃម្សិលមិញនេះដែរថា ស្ថានទូតប្រទេសមហាអំណាចមួយនេះ កំពុងឃ្លាំមើលយ៉ាងយកចិត្តទុកដាក់នូវការចាប់ខ្លួនសមាជិកសហជីពនៃបុគ្គលិកកម្មករក្រុមហ៊ុនកាស៊ីណូណាហ្គាវើលដ៍ ដោយសារតែការបញ្ចេញមតិដោយសន្តិវិធី និងបានអំពាវនាវឱ្យអាជ្ញាធរកម្ពុជាស្ដាប់សំឡេងរបស់ពលរដ្ឋ។
ស្ថានទូតអាមេរិក បានសរសេរថា៖ «យើងកំពុងធ្វើការតាមដានយ៉ាងយកចិត្តទុកដាក់នូវការចាប់ខ្លួនសមាជិកសហជីពនៃបុគ្គលិកកម្មករនៃកាស៊ីណូណាហ្គាវើលដ៍ ដោយសារតែការបញ្ចេញមតិដោយសន្តិវិធីរបស់ពួកគេ និងស្នើឱ្យអាជ្ញាធរស្ដាប់ពីពលរដ្ឋ មិនមែនបំបិទសំឡេងរបស់គេទេ។ សេរីភាពក្នុងការបញ្ចេញមតិ ក្នុងការប្រមូលផ្ដុំគ្នា និងក្នុងការចងក្រងគ្នាជាក្រុម សមាគម ត្រូវបានធានាដោយរដ្ឋធម្មនុញ្ញនៃប្រទេសកម្ពុជា»។
តាមរយៈសេចក្តីថ្លែងការណ៍កម្រាស់៥ទំព័រចេញផ្សាយនៅល្ងាចថ្ងៃទី៤ ខែមករា ក្រុមអង្គការសង្គមស៊ីវិលសរុប ១១៩ ស្ថាប័ន បានសម្តែងការខកចិត្តជាខ្លាំង ចំពោះវិធានការរបស់សមត្ថកិច្ចដែលដឹកនាំដោយស្នងការនគរបាលរាជធានីភ្នំពេញ ដែលបានឃាត់ខ្លួនថ្នាក់ដឹកនាំសហជីព ប្រតិភូចរចា និងសកម្មជនសហជីពទ្រទ្រង់សិទិ្ធការងារ បុគ្គលិក កម្មករខ្មែរនៃក្រុមហ៊ុនណាហ្គាវើលដ៏ (LRSU) ជិត២០នាក់ រួមទាំងការចាប់ខ្លួនកញ្ញា ឈឹម ស៊ីថរ នៅរសៀលថ្ងៃទី៤ ខែមករា ឆ្នាំ២០២២៕