ប្រជាពលរដ្ឋប្រមាណជាង៣០នាក់ ប្រមូលផ្ដុំគ្នាបិទកំណាត់ផ្លូវលំមួយខ្សែនៅក្នុងភូមិគ្រោះ ឃុំរវៀង ស្រុកសំរោង ខេត្តតាកែវ ដើម្បីទាមទារឱ្យក្រុមហ៊ុនឯកជនដែលដឹកសំរាមយកទៅចាក់នៅទីនោះ ដោះស្រាយប៉ះពាល់ដល់បរិស្ថាននិងសុខភាពពួកគេនៅតំបន់នោះ។
អ្នកស្រី ធុល រ៉ា ដែលអះអាងថាជាតំណាងឱ្យពលរដ្ឋនៅភូមិគ្រោះជាង១០០គ្រួសារ បានឱ្យដឹងថា ប្រជាពលរដ្ឋជាង៣០នាក់ប្រមូលផ្ដុំបិទផ្លូវលំក្នុងភូមិរយៈពេល២ថ្ងៃមកហើយ គឺនៅថ្ងៃទី៤និងទី៥ ខែមករានេះ ដោយមិនឱ្យរថយន្តដឹកសំរាមរបស់ក្រុមហ៊ុនឯកជនមួយឈ្មោះ ជឹម សុវណ្ណរិទ្ធ បន្តដឹកសំរាមយកមកចាក់នៅចំណុចដីវាលមួយកន្លែងទំហំជិត១ហិកតា ស្ថិតនៅភូមិគ្រោះ ដែលមានចម្ងាយប្រមាណ៧០០ម៉ែត្រពីភូមិ។ អ្នកស្រីបន្តថា ដើមចមនៃការតវ៉ានេះ ដោយសារតែបុគ្គលិកក្រុមហ៊ុននេះដឹកសំរាមយកទៅចាក់ពាសវាលពាសកាលនៅតំបន់នោះប្រហែលជា១០ឡានក្នុងមួយថ្ងៃ និងដុតសំរាមក្រៅឡ បណ្ដាលឱ្យប៉ះពាល់ដល់ដំណាំប្រជាពលរដ្ឋនៅក្បែរនោះ រួមទាំងប៉ះពាល់ដល់បរិស្ថាននិងសុខភាពប្រជាពលរដ្ឋនៅតំបន់នោះផងដែរ ។
អ្នកស្រីនិយាយថា៖ «ទឹកសំរាមស្អុយ ហៀរចូលនៅមាត់អូ ប៉ះពាល់ទឹក គោផឹកអត់កើតទេ សំរាមហ្នឹងហុយហៀររលេរលាក់ ប្រជាជនលែងដាក់មង អត់ហ៊ានទៅជិតទេ មកស្រែហ្នឹងរុយរោម រុយក្បាលខៀវខ្មៅងងឹត ស្អុយ អត់មាននរណាទៅមកកន្លែងសំរាមហ្នឹងទេ គេលែងចង់ចេញចូលហើយវាស្អុយដល់គេ វាចាក់អារាត់អារាយអ៊ីចឹងទៅ ប្រជាជនគេលែងមកជិតហើយ»។
អ្នកស្រី ម៉ន សារឿន បន្តថា កន្លងមក ប្រជាពលរដ្ឋជាង១០០គ្រួសារនាំគ្នាធ្វើលិខិតផ្ដិតមេដៃនិងប្ដឹងទៅអាជ្ញាធរភូមិ ឃុំ និងស្រុក ចំនួន៥ទៅ៦ដងដែរ ប៉ុន្តែអាជ្ញាធរពាក់ព័ន្ធមិនទាន់មានដំណោះស្រាយជូនប្រជាពលរដ្ឋនៅឡើយ។ ករណីនេះ អ្នកស្រីក៏បានស្នើទៅក្រុមហ៊ុនធ្វើកន្លែងចាក់សំរាមនោះឱ្យមានស្ដង់ដារនិងដុតក្នុងឡ ដើម្បីកុំឱ្យប៉ះពាល់ដល់បរិស្ថាន សុខភាព និងដំណាំពលរដ្ឋនៅតំបន់នោះ។
អ្នកស្រីបន្ថែមថា៖ «ខ្ញុំស្នើសុំកុំឱ្យធ្វើអីប៉ះពាល់ដល់ប្រជាពលរដ្ឋ ហើយខូចខាតស្រូវអ្នកជិតខាង។ ដុតទៅ វានៅក្លិនស្អុយមក ខ្ញុំចង់ឱ្យគេដុតសំរាមនោះនៅក្នុងឡ កុំឱ្យគេដុតនៅក្រៅឡ»។
តំណាងប្រជាពលរដ្ឋម្នាក់ទៀត លោក ហែន ស្រ៊ីវ ព្រមានថា បើអាជ្ញាធរពាក់ព័ន្ធនិងក្រុមហ៊ុនមិនធ្វើតាមការស្នើសុំរបស់ប្រជាពលរដ្ឋទេ នោះពួកគេនឹងបន្តបិទផ្លូវ មិនឱ្យរថយន្តដឹកសំរាមចូលទៅចាក់នៅទីតាំងនោះបន្តទៀតនោះទេ ដើម្បីកុំឱ្យប៉ះពាល់ដល់បរិស្ថាន ដំណាំ និងសុខភាពពលរដ្ឋ ជាដើម។
លោកព្រមានដូច្នេះថា៖ «ខ្ញុំបិទផ្លូវលែងឱ្យចាក់សំរាមនៅទីនោះហើយ បើកាលណានៅចាក់ វាខូចខាតរបស់ប្រជាជនរហូត ព្រោះសន្យាខ្យល់រហូត អ៊ីចឹងប្រជាជននៅតែរងគ្រោះរហូតមួយជីវិត។ អ្នកធ្វើស្រែក្បែរហ្នឹងអត់បានធ្វើហូបទេ ផ្សែងចេញពីគំនរសំរាមជះមកដណ្ដប់លើខ្លួនប្រាណរូបរាងកាយ ធំក្លិនស្អុយឆ្អាប»។
វីអូឌី មិនអាចសុំការបំភ្លឺពីប្រធានក្រុមហ៊ុនឯកជនឈ្មោះ ជឹម សុវណ្ណរិទ្ធ បានទេ នៅរសៀលថ្ងៃពុធនេះ។
ប៉ុន្តែអភិបាលស្រុកសំរោង លោក កេត ម៉ៅ មានប្រសាសន៍ថា នៅព្រឹកថ្ងៃនេះ គាត់និងក្រុមការងារបរិស្ថានបានចុះទៅពិនិត្យទីតាំងចាក់សំរាមនោះផ្ទាល់ ដោយកំណត់ឱ្យក្រុមហ៊ុនដុតសំរាមក្នុងឡ ធ្វើរបងនិងបិទស័ង្កសីព័ទ្ធជុំវិញកម្ពស់ថែម២ម៉ែត្រ និងបានដោះស្រាយបញ្ហាជូនប្រជាពលរដ្ឋដែលប៉ះពាល់ស្រូវ ជុំវិញទីតាំងចាក់សំរាមនោះផងដែរ។
អភិបាលស្រុករូបនោះបញ្ជាក់ថា បើភាគីក្រុមហ៊ុនមិនគោរពតាមការណែនាំទេ មន្ត្រីជំនាញនឹងធ្វើរបាយការណ៍បញ្ជូនទៅក្រសួងបរិស្ថាន ដើម្បីចាត់វិធានការបន្តផងដែរ។
លោកមានប្រសាសន៍ថា៖ «បើមិនគោរពទេ ទី១ ខ្ញុំត្រូវធ្វើរបាយការណ៍ជូនទៅក្រសួងបរិស្ថាន ព្រោះទីតាំងដែលចាក់សំរាមនេះ គឺមានការឯកភាពពីក្រសួងបរិស្ថានមក។ ខ្ញុំក្នុងនាមអាជ្ញាធរ មិនមែនទៅដល់បិទគេតែម្ដងទេ អ៊ីចឹងខ្ញុំត្រូវធ្វើរបាយការណ៍៤ចំណុចហ្នឹង បើគាត់អត់ធ្វើតាមទេ យើងត្រូវបិទផ្លូវបណ្ដោះអាសន្នទៀត»។
អតីតស្ថាបនិកមួយរូបនៃចលនាមាតាធម្មជាតិ និងបច្ចុប្បន្នជាមន្ត្រីគម្រោងតស៊ូមតិនៃគម្រោងអ្នកការពារព្រៃឈើនៃសមាគមបណ្ដាញយុវជនកម្ពុជា លោក សាន់ ម៉ាឡា មានប្រសាសន៍ថា បញ្ហាសំរាម គឺជារឿងមួយស្មុគស្មាញ ដែលអាជ្ញាធររដ្ឋមិនទាន់ដោះស្រាយឱ្យបានល្អនោះទេ។ លោកបន្តថា ប្រសិនបើបញ្ហានេះមិនបានដោះស្រាយដោយយកចិត្តទុកដាក់និងទាន់ពេលវេលានោះទេ ប្រជាពលរដ្ឋគួរតែចងក្រងរួមមតិឱ្យមានសំឡេងភាគច្រើន ដើម្បីទាមទារឱ្យអាជ្ញាធរពន្លឿនការដោះស្រាយជូនពួកគាត់ដែលរងផលប៉ះពាល់នេះ។
លោកថា៖ «សម្រាប់ខ្ញុំ មានតែស្នើឱ្យប្រជាពលរដ្ឋគាត់ធ្វើការចងក្រងគ្នា ឬធ្វើម៉េចឱ្យមានសំឡេងច្រើន ដើម្បីធ្វើលិខិតឬជួបជជែកផ្ទាល់ជាមួយអាជ្ញាធររដ្ឋ ដើម្បីទាមទារឱ្យមានដំណោះស្រាយ ព្រោះអាជ្ញាធរអត់បានរកទីលានចាក់សំរាមត្រឹមត្រូវ ចង់មិនចង់ វាប្រាកដជាបង្កជាផលប៉ះពាល់ចំពោះសុខភាពរស់នៅរបស់ប្រជាពលរដ្ឋ»។
លោកបន្ថែមថា៖ «ហើយអាជ្ញាធរគួរតែធ្វើការដាក់ពិន័យ ឬក៏មានសេចក្ដីសម្រេចណាមួយស្នើឱ្យក្រុមហ៊ុនដែលទទួលសិទ្ធិក្នុងការប្រមូលសំរាមហ្នឹង ឱ្យមានយន្តការទៅយកសំរាមទៅបោះចោលឱ្យបានច្បាស់លាស់ មិនអាចយកទៅបោះនៅក្បែរប្រជាពលរដ្ឋដែលគាត់រស់នៅ ឬក៏ប្រមូលទៅដាក់កន្លែងណាមួយដែលមានលក្ខណៈអនាធិបតេយ្យនោះទេ»។
