ស្ត្រីជាបុគ្គលិកកាស៊ីណូណាហ្គាវើលដ៍ដែលមានផ្ទៃពោះ ហើយត្រូវសមត្ថកិច្ចចាប់ឃាត់ខ្លួននៅពេលកំពុងតវ៉ានោះ ថ្លែងថា ក្រោយពេលដោះលែងមកវិញ គាត់កំពុងតែឈឺពេញខ្លួន ដោយសារតែកម្លាំងសមត្ថកិច្ចជាបុរសមានគ្នាច្រើន បានចាប់រុញច្រានរូបគាត់ទាំងបង្ខំ និងគំរាមវាយដោយដំបង បើទោះជាគាត់បានប្រាប់ថាមានផ្ទៃពោះក៏ដោយ។
អ្នកស្រី ជា ផលឡែន បុគ្គលិកនៅកាស៊ីណូក្រុមហ៊ុនណាហ្គាវើលដ៍ ដែលបានចូលរួមតវ៉ាជាមួយអ្នកផ្សេងទៀត បានឱ្យដឹងថា រូបគាត់ត្រូវសមត្ថកិច្ចជាបុរសច្រើននាក់ចាប់រុញចូលឡានកាលពីរសៀលថ្ងៃទី៣ ខែមករា នាំឱ្យឈឺនៅលើខ្លួនរហូតដល់ថ្ងៃនេះ។
អ្នកស្រីបន្តថា៖ «ឈឺខ្លួន សង្កៀរសាច់ បងឯងដឹងហើយ កម្លាំងដៃគេប្រុសៗ គេជិះឡានទ្រុងពណ៌ខៀវមក ហើយគ្នាគេរត់ហេមក! គ្នាគេច្រើនណាស់ មករុញច្រានប្រទាញប្រទង់ពួកខ្ញុំឱ្យឡើងឡាន។ ដំបូងខ្ញុំអត់ព្រមទេ ដល់ឃើញពួកគាត់យារដំបងរកវាយទៀត ពួកខ្ញុំក៏ព្រមទៅ»។
អ្នកស្រី ជា ផលឡែន ថ្លែងថា ពេលដែលសមត្ថកិច្ចរត់សំដៅទៅរកគាត់នោះ រូបគាត់ក៏បានប្រាប់ដែរថាគាត់មានផ្ទៃពោះ៣ខែ តែនៅក្នុងស្ថានភាពច្របូកច្របល់ សមត្ថកិច្ចហាក់មិនចាប់អារម្មណ៍លើសម្ដីរបស់គាត់នោះទេ។ ទោះយ៉ាងណា រហូតដល់ថ្ងៃនេះ អ្នកស្រីថាមិនមានសញ្ញាណាមួយបង្ហាញពីការប៉ះពាល់ដល់ទារកនៅក្នុងផ្ទៃនោះទេ។
បើតាមអ្នកស្រី ជា ផលឡែន សមត្ថកិច្ចចាប់ខ្លួនអ្នកស្រីនៅម៉ោង២រសៀល ថ្ងៃទី៣ ខែមករា ហើយដោះលែងវិញនៅម៉ោង៧យប់ថ្ងៃដដែលនោះ។
លោកវេជ្ជបណ្ឌិត នាម លាងឈឹម ពន្យល់ថា វាអាចមានហានិភ័យដល់ទារកនៅក្នុងផ្ទៃ ក្នុងករណីចាប់ខ្លួនដូចនៅណាហ្គាវើលដ៍នេះ។
លោកថា៖ «បើមានការប៉ះទង្គិច វាមានផលប៉ះពាល់ហើយដល់ទារក គ្រាន់ថាប៉ះពាល់ដល់កម្រិតណា យើងអត់ដឹង។ មួយទៀត ទាក់ទងការភ័យអីហ្នឹងក៏មានផលប៉ះពាល់ដែរ»។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព ចាត់ទុកថា សកម្មភាពចាប់ខ្លួនបុគ្គលិកនិងសហជីពកាស៊ីណូណាហ្គាវើលដ៍ដែលភាគច្រើនជាស្ត្រី ហើយរួមមានទាំងស្រ្តីមានផ្ទៃពោះទៀតនោះ គឺធ្វើឡើងទាំងកំរោល មិនផ្អែកលើគោលការណ៍ច្បាប់ទេ។
លោកស្រីថ្លែងថា៖ «ព្រឹត្តិការណ៍នៃការចាប់ខ្លួននេះ មានលក្ខណៈកំរោលមែនទែន ហើយប្រើហិង្សាដែលមានបុរសជាច្រើនចាប់សង្គ្រប់កៀកកគ្នាអីជាដើម»។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា ថ្លែងថា សមត្ថកិច្ចក៏បានបន្ធូរបន្ថយដល់ស្រី្តមានផ្ទៃពោះ ឈ្មោះ ជា ផលឡែន នោះដែរ ព្រោះពេលដែលចាប់ខ្លួនទៅដល់ស្នងការដ្ឋាននគរបាលរាជធានី ហើយដឹងថាស្ត្រីម្នាក់នេះមានផ្ទៃពោះក៏ដោះលែងវិញនៅយប់ថ្ងៃដដែលនោះ។
លោកបន្តថា រាល់ពេលចុះអនុវត្តការងារ ថ្នាក់ដឹកនាំក៏បានណែនាំដល់កម្លាំងក្រោមបង្គាប់ឱ្យមានការយោគយល់ដល់អ្នកងាយរងគ្រោះ ដូចជា ស្ត្រីមានផ្ទៃពោះ ចាស់ជរា ឬកុមារ ជាដើម។ ទន្ទឹមនឹងនេះ លោកក៏បានចាត់ទុកថា សកម្មភាពតវ៉ារបស់បុគ្គលិកក្រុមហ៊ុនណាហ្គាវើលដ៍ជាទង្វើដែលមិនអាចអត់ឱនឱ្យបាន។
លោក សាន សុខសីហា ថ្លែងថា៖ «អ្វីដែលបានធ្វើនេះ គឺវាល្មើសច្បាប់ទាំងស្រុង គឺសាលារាជធានីភ្នំពេញលោកបានចេញសេចក្ដីជូនដំណឹងជាច្រើនលើកច្រើនសារហើយ ឱ្យអនុវត្តតាមច្បាប់ តាមការណែនាំរបស់អាជ្ញាធរ ប៉ុន្តែការអនុវត្តនេះជាការអុកឡុក ញុះញង់ បង្កឱ្យមានផលប៉ះពាល់ដល់សន្តិសុខសង្គមជាតិ»។
បើទោះជាសមត្ថកិច្ចកម្ពុជាអះអាងថា នេះជាចំណាត់ការធ្វើឡើងត្រឹមត្រូវតាមផ្លូវច្បាប់ក៏ដោយ ក៏អ្នកជំនាញសិទ្ធិមនុស្សអន្តរជាតិមួយចំនួនចាត់ទុកថា សកម្មភាពបង្ក្រាបនេះជាការបំពានទៅលើច្បាប់។ ការលើកឡើងរបស់អ្នកជំនាញទាំងនេះធ្វើឡើងតាមរយៈសេចក្ដីថ្លែងការណ៍រួម ចុះថ្ងៃទី៥ ខែមករា ឆ្នាំ២០២២ រួមមាន លោក Vitit Muntarbhorn អ្នករាយការណ៍ពិសេសស្ដីពីស្ថានភាពសិទ្ធិមនុស្សនៅកម្ពុជា, លោកស្រី Irene Khan អ្នករាយការណ៍ពិសេសស្ដីពីការលើកកម្ពស់ និងការការពារសិទ្ធិសេរីភាពនៃការបញ្ចេញគំនិត និងមតិយោបល់, លោកស្រី Mary Lawlor អ្នករាយការណ៍ពិសេសស្ដីពីស្ថានភាពរបស់អ្នកការពារសិទ្ធិមនុស្ស និងលោក Clément Nyaletsossi Voule អ្នករាយការណ៍ពិសេសស្ដីពីសិទ្ធិខាងការប្រមូលផ្ដុំដោយសន្តិវិធី និងខាងសមាគម។
នៅថ្ងៃទី៤ ខែមករា អង្គការសង្គមស៊ីវិលនៅក្នុងស្រុកជាង១០០ស្ថាប័ន ក៏បានចេញសេចក្ដីថ្លែងការណ៍រួមគ្នាថ្កោលទោសការចាប់ខ្លួនបុគ្គលិកនិងសហជីពនៅណាហ្គាវើលដ៍នេះដែរ។ អង្គការទាំងនោះទាមទារឱ្យអាជ្ញាធរដោះលែងបុគ្គលិកនិងសហជីពទាំងនេះ ហើយបំពេញតួនាទីរបស់ខ្លួនជាអាជ្ញាធរសម្របសម្រួលជម្លោះការងាររវាងបុគ្គលិកនិងក្រុមហ៊ុនណាហ្គាវើលដ៍។
គិតត្រឹមថ្ងៃទី៥ ខែមករា យ៉ាងហោចណាស់ អ្នកតវ៉ាក្នុងជម្លោះការងារនៅក្រុមហ៊ុនណាហ្គាវើលដ៍ប្រមាណជិត៣០នាក់ត្រូវបានចាប់ខ្លួន ហើយភាគច្រើនត្រូវបានដោះលែងវិញ និងមួយចំនួនទៀត រួមទាំងមេដឹកនាំសហជីពនៅក្រុមហ៊ុននេះ គឺកញ្ញា ឈឹម ស៊ីថរ ត្រូវបានតុលាការក្រុងភ្នំពេញ សម្រេចឃុំខ្លួនដាក់ពន្ធនាគារបណ្ដោះអាសន្នពាក់ព័ន្ធនឹងបទ «ញុះញង់»។
ត្រលប់មកអ្នកស្រី ជា ផលឡែន បុគ្គលិកក្រុមហ៊ុនណាហ្គាវើលដ៍វិញ អ្នកស្រីបានបញ្ជាក់ថា រូបគាត់នៅតែចូលរួមតវ៉ាដដែល ដោយមិនបារម្ភពីការចាប់ខ្លួនជាថ្មីទៀតទេ។
អ្នកស្រី ជា ផលឡែន និយាយថា៖ «នៅបន្តតវ៉ាទៀតបង ពួកខ្ញុំធ្វើត្រូវច្បាប់ ពួកខ្ញុំអត់ខ្លាចទេ ពួកខ្ញុំធ្វើត្រូវច្បាប់អស់ហើយ។ ពួកគាត់អ្នកចាប់ខ្ញុំទេដែលខុសច្បាប់នោះ»។
បើទោះជាមានការចាប់ខ្លួនជាបន្តបន្ទាប់ក៏ដោយ ក៏អ្នកចូលរួមប្រមាណ១ ០០០នាក់នៅតែបន្តការតវ៉ាទាមទារឱ្យថៅកែកាស៊ីណូណាហ្គាវើលដ៍ទទួលយកបុគ្គលិក៣៦៥នាក់ឱ្យចូលធ្វើការងារវិញដែលភាគច្រើនជាសមាជិកនិងថ្នាក់ដឹកនាំសហជីព៕