សាលាដំបូងរាជធានីភ្នំពេញ បានបង្ហាញភស្តុតាងជាវីដេអូឃ្លីបចំនួន ៧ នៅក្នុងសវនាការកាត់ទោសមេដឹកនាំនិងសមាជិកគណបក្សសង្គ្រោះជាតិដែលត្រូវបានតុលាការកំពូលរំលាយកាលពីខែវិច្ឆិកា ឆ្នាំ២០១៧។
ចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ កាលពីថ្ងៃព្រហស្បត្តិ៍ បានបន្តសវនាការលើសំណុំរឿងមេដឹកនាំ និងអ្នកគាំទ្រគណបក្សសង្គ្រោះជាតិ ២១ នាក់ ពីបទ «ញុះញង់ឱ្យមានភាពវឹកវរធ្ងន់ធ្ងរសន្តិសង្គម» និង «ញុះញង់យោធិនមិនឱ្យស្ដាប់បទបញ្ជា និងរួមគំនិតក្បត់»។ ប៉ុន្តែសវនាការនេះ មិនមានវត្តមានអតីតថ្នាក់ដឹកនាំ និងសកម្មជនបក្សប្រឆាំងទាំង៨រូប ដើម្បីចូលរួមសវនាការឡើយ។
វីដេអូឃ្លីបចំនួន ៧ ដែលត្រូវបានបង្ហាញនៅថ្ងៃព្រហស្បតិ៍នេះ គឺជាវីដេអូក្នុងអំឡុងខែមករា ដល់កុម្ភៈ ឆ្នាំ២០១៨ ដែលបង្ហាញពីលោក សម រង្ស៊ី សហស្ថាបនិកគណបក្សសង្គ្រោះជាតិ និង លោក អេង ឆៃអ៊ាង អនុប្រធានគណបក្ស និយាយអំពីការបង្កើតចលនាសង្គ្រោះជាតិនៅក្រៅប្រទេស។
វីដេអូឃ្លីបទី១ ដែលមានរយៈពេល ៤៦ នាទី ធ្វើឡើងក្នុងកម្មវិធីពិភាក្សាជាមួយវិទ្យុអាស៊ីសេរីលោក អេង ឆៃអ៊ាង បាននិយាយពីគោលការណ៍ ៥ ចំណុចនៃចលនានេះ រួមមាន យុទ្ធនាការការទូត, ការស្វែងរកការដាក់ទណ្ឌកម្មសេដ្ឋកិច្ចលើកម្ពុជា, ការលើកទឹកចិត្តឱ្យមានការតវ៉ា ដោយសន្តិវិធី និងការអំពាវនាវឱ្យកងកម្លាំងប្រដាប់អាវុធរក្សាអព្យាក្រឹត្យភាព រួមទាំងជំរុញឱ្យកម្មករទាមទារសិទ្ធិការងាររបស់ពួកគេផងដែរ។
ក្នុងវីដេអូឃ្លើបមួយទៀតក្នុងបទសម្ភាសន៍ជាមួយវិទ្យុបារាំងជាខេមរភាសា លោក សម រង្ស៊ី អះអាងថា ចលនានេះ មានអ្នកគាំទ្រច្រើនទាំងក្នុង និងក្រៅប្រទេស។
លោក សម រង្ស៊ី មានប្រសាសន៍នៅក្នុងបទសម្ភាស៍ថា៖ «មានច្រើនប្រភព មានអ្នកខ្លះមកពីសង្គ្រោះជាតិ សង្គមស៊ីវិល អង្គការសិទ្ធិមនុស្ស អង្គការបរិស្ថាន និងអ្នកកាសែត ប៉ុន្តែមិនចាំបាច់ឱ្យគេចេញមុខទេ»។
នៅពេលអ្នកសារព័ត៌មានសួរថា តើគាត់កំពុងស្វែងរកការគាំទ្របន្ថែមសម្រាប់គណបក្សសង្គ្រោះជាតិ ឬ យ៉ាងណានោះ លោក សម រង្ស៊ី បាននិយាយថា គាត់និងអ្នកគាំទ្រផ្សេងទៀត នឹងបន្តធ្វើការងារនេះ ដើម្បីធ្វើឱ្យគណបក្សសង្គ្រោះជាតិសកម្មម្តងទៀត និងដំណើរការដូចមុនវិញ។
លោក សម រង្ស៊ី៖ «ខ្ញុំមិនអាចនៅស្ងៀមបានទេ។ ខ្ញុំត្រូវផ្តើមគំនិត ឱ្យគណបក្សសង្គ្រោះជាតិរស់ឡើងវិញ។ ចលនានេះ នឹងក្លាយជាឧបករណ៍ជំរុញឱ្យ CNRM គណបក្សសង្គ្រោះជាតិមានសកម្មភាពឡើងវិញ ហើយចូលរួមក្នុងការបោះឆ្នោត»។
លោក សម រង្ស៊ី ក៏អំពាវនាវដល់កងកម្លាំងប្រដាប់អាវុធកុំស្តាប់បញ្ជារបស់ជនផ្ដាច់ការ និងកុំសម្លាប់ប្រជាពលរដ្ឋស្លូតត្រង់។ ក្នុងបទសម្ភាសន៍ជាវីដេអូមួយទៀតជាមួយវិទ្យុអាស៊ីសេរី លោក សម រង្ស៊ី បាននិយាយថា៖ «សូមបងប្អូនកុំភ្ជាប់ វាសនា ជាមួយលោក ហ៊ុន សែន គាត់ជាឧក្រិដ្ឋជន។ គាត់ប្រព្រឹត្តអំពើអាក្រក់ច្រើនណាស់»។
ជាងនេះទៅទៀត លោក សម រង្ស៊ី បានប្រៀបធៀបរដ្ឋាភិបាលបច្ចុប្បន្នទៅនឹងរបបខ្មែរក្រហម ដែលចាប់ខ្លួន និងចោទប្រកាន់ប្រជាពលរដ្ឋ បើសិនពួកគេមិនគាំទ្រខ្លួន។
ក្រោយពីបើកសវនាការប្រហែល ៣ ម៉ោង តុលាការបានសម្រេចផ្អាក ដោយគ្រោងនឹងបើកសវនាការបង្ហាញភស្តុតាងបន្ថែមទៀត នៅថ្ងៃទី១៣ ខែមករា ឆ្នាំ២០២២ ខាងមុខនេះ ។
ការចោទប្រកាន់ទាំងអស់នេះ ថាជាផ្នែកនៃចលនាបះបោរ បានបណ្ដាលឱ្យមានការគំរាមកំហែង និងចាប់ខ្លួនដ៏ច្រើន រួមទាំងសកម្មជន បរិស្ថាន និងអតីតមន្ត្រីក្រុមប្រឹក្សាឃុំ-សង្កាត់មកពីគណបក្សសង្គ្រោះជាតិជាដើម។ ថ្នាក់ដឹកនាំ និងសកម្មជនបក្សប្រឆាំងដែលជាប់ចោទពីបទ «ញុះញង់ឱ្យមានភាពវឹកវរធ្ងន់ធ្ងរសន្តិចសង្គម ញុះញង់យោធិនមិនឱ្យស្ដាប់បទបញ្ជា និងរួមគំនិតក្បត់» រួមមានចំនួន ២១នាក់ ក្នុងនោះរួមមាន លោក សម រង្ស៊ី, លោក អេង ឆៃអ៊ាង, លោក ហ៊ូ វ៉ាន់, លោក នុត រំដួល, លោកស្រី ជូឡុង សូមូរ៉ា, លោកស្រី មូរ សុខហួរ ព្រមទាំងមនុស្សមួយចំនួនទៀត៕