ប្រមុខរដ្ឋាភិបាលកម្ពុជា បានទៅដល់ប្រទេសភូមាហើយគិតត្រឹមម៉ោង១១ព្រឹកថ្ងៃសុក្រនេះ បន្ទាប់ពីធ្វើដំណើរតាមជើងយន្តហោះពិសេសកម្ពុជា ខណៈដំណើរទស្សនកិច្ចនេះបានរងនូវការគំរាមពីក្រុមប្រឆាំងទៅនឹងរបបយោធាមីយ៉ាន់ម៉ា។
យោងការផ្សាយផ្ទាល់របស់ទូរទស្សន៍ជាតិកម្ពុជា គិតត្រឹមម៉ោងជិត១២ថ្ងៃត្រង់ ថ្ងៃទី៧ ខែមករា ឆ្នាំ២០២២នេះ គេសង្កេតឃើញលោកនាយករដ្ឋមន្ត្រី ហ៊ុន សែន បានទៅដល់ព្រលានយន្តហោះនៃប្រទេសមីយ៉ាន់ម៉ា ដែលអមដំណើរដោយលោក ប្រាក់ សុខុន រដ្ឋមន្រ្តីក្រសួងការបរទេសកម្ពុជា លោក ចម ប្រសិទ្ធ រដ្ឋមន្រ្តីឧស្សាហកម្ម និងកូនប្រុស២នាក់ទៀតរបស់លោកនាយករដ្ឋមន្រ្តី រួមមានលោក ហ៊ុន ម៉ាណែត និងលោក ហ៊ុន ម៉ានិត។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ឱ្យដឹងថា ដំណើរទស្សនកិច្ចរយៈពេល២ថ្ងៃដោយគិតចាប់ពីថ្ងៃទី៧ ដល់ថ្ងៃទី៨ ខែមករា នៅប្រទេសមីយ៉ាន់ម៉ានេះ គឺជាការឆ្លើយតបចំពោះការអញ្ជើញរបស់លោក មីន អ៊ុងឡាំង ដែលជាប្រធានក្រុមប្រឹក្សារដ្ឋនៃសាធារណរដ្ឋសហភាពមីយ៉ាន់ម៉ា។
តាមរយៈសេចក្ដីប្រកាសព័ត៌មានដដែល លោកនាយករដ្ឋមន្ត្រី ហ៊ុន សែន ក៏នឹងលើកឡើងពីកិច្ចសហប្រតិបត្តិការទ្វេភាគីនិងពហុភាគីជាមួយលោក មីន អ៊ុងឡាំង ហើយភាគីទាំងពីរក៏នឹងផ្ដោតទៅលើការវិវត្តថ្មីៗនៅក្នុងតំបន់អាស៊ានផងដែរ។
ចំណែកក្រុមប្រឆាំងចម្រុះរបបសឹកភូមា បានព្រមាននឹងធ្វើអ្វីម្យ៉ាងប្រឆាំងវត្តមានលោកនាយករដ្ឋមន្រ្តី ហ៊ុន សែន នៅលើទឹកដីភូមាក្នុងដំណើរទស្សនកិច្ចនេះ។ តាមរយៈកាសែតភូមា ឈ្មោះ Mynamar Now ដែលចេញផ្សាយកាលពីថ្ងៃទី៥ ខែមករា បញ្ជាក់ថា កិច្ចខិតខំប្រឹងប្រែងរបស់លោក ហ៊ុន សែន ជួយមេរដ្ឋប្រហារយោធាភូមានេះ អាចមានសិទ្ធិពេលលេញចូលទៅក្នុងកិច្ចប្រជុំកំពូលអាស៊ាន វាគឺជាការប្រមាថដល់ប្រជាជនភូមា។
ប្រភពសារព័ត៌មាននេះបន្តថា ម្យ៉ាងវិញទៀត វត្តមាននៃប្រតិភូពីកម្ពុជានេះមានន័យថា ជាការគាំទ្រទៅនឹងរបបសឹកយោធាភូមាដែលពិភពលោកកំពុងថ្កោលទោស។ បើទោះជាមានការព្រមានពីក្រុមប្រឆាំងចម្រុះទៅនឹងរបបសឹកភូមានេះក៏ដោយ ប៉ុន្តែគេសង្កេតឃើញថា ដំណើរទស្សនកិច្ចនេះបានដល់ភូមាដោយសុវត្ថិភាពហើយ។ ក្រៅពីនេះ កម្ពុជាក៏បានផ្ដល់នូវអំណោយជាបរិក្ខារពេទ្យនិងវ៉ាក់សាំងប្រឆាំងជំងឺកូវីដ-១៩ថែមទៀតផង៕