មេដឹកនាំបក្សកាន់អំណាច យកថ្ងៃខួបជ័យជម្នះថ្ងៃ៧មករា ផ្ញើសារបង្ហាញពីសារៈសំខាន់នៃការរួបរួមគ្នាក្រោមដំបូលរដ្ឋធម្មនុញ្ញ ដើម្បីពង្រឹងផ្ទៃក្នុងជាតិ ទប់ស្កាត់កម្ពុជាកុំឱ្យរអិលធ្លាក់ទៅក្នុងរបបប្រល័យពូជសាសន៍ជាថ្មីម្ដងទៀត។
សារលិខិតកម្រាស់២ទំព័រ ក្នុងឱកាសរម្លឹកខួបទី៤៣នៃទិវាជ័យជម្នះថ្ងៃ៧មករា នាថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានលើកឡើងថា ៤៣ឆ្នាំមកនេះ កម្ពុជាបានធ្វើដំណើរលើផ្លូវដ៏គ្រោះថ្នាក់បំផុត រហូតក្លាយជាប្រទេសមានប្រាក់ចំណូលមធ្យមកម្រិតទាប ធ្វើឱ្យជីវភាពពលរដ្ឋកាន់តែប្រសើរឡើង និងរក្សាបាននូវស្ថិរភាពនយោបាយ រួមទាំងការអភិវឌ្ឍសង្គម លើហេដ្ឋារចនាសម្ព័ន្ធនានាទូទាំងប្រទេស។
ឆ្លងតាមបទពិសោធន៍នេះ លោកអំពាវនាវទៅជនរួមជាតិឱ្យបន្តសាមគ្គីគ្នាជាធ្លុងមួយ ក្រោមដំបូលរដ្ឋធម្មនុញ្ញ ក្រោមអង្គព្រះមហាក្សត្រ ដើម្បីបញ្ចៀសសង្គ្រាមនិងការបែកបាក់ផ្ទៃក្នុងជាតិដូចកាលពីអតីតកាល។
លោកថា៖ «ក្នុងឱកាសនេះ ខ្ញុំសូមអំពាវនាវដល់បងប្អូនជនរួមជាតិគ្រប់ទិសទី សូមបន្តរួបរួមជាធ្លុងមួយ ក្រោមដំបូលរដ្ឋធម្មនុញ្ញ និងម្លប់ដ៏ត្រជាក់នៃអង្គព្រះមហាក្សត្រ ដើម្បីសម្រេចបានសមិទ្ធផលថ្មីៗទៀត ក្នុងការកសាងនិងការពារមាតុភូមិឆ្ពោះទៅរកអនាគតដ៏រុងរឿង ពុំឱ្យកើតមានជាថ្មីទៀតនូវអំពើប្រល័យពូជសាសន៍ សង្គ្រាម និងការបែកបាក់ជាតិដូចពីមុន»។
យ៉ាងណា ថ្ងៃខួបជ័យជម្នះថ្ងៃ៧មករា នៅឆ្នាំនេះ គណបក្សកាន់អំណាច មិនបានធ្វើពិធីជួបជុំគ្នាជាទ្រង់ទ្រាយធំនៅទីសាធារណៈដូចពេលកន្លងទៅនោះទេ ដោយសម្អាងថា មកពីមូលហេតុជំងឺកូវីដ-១៩។
ចំណែកស្ថាបនិកអតីតគណបក្សសង្គ្រោះជាតិ លោក សម រង្ស៊ី ដែលបច្ចុប្បន្នកំពុងនិរទេស ដើម្បីគេចចេញពីការចាប់ខ្លួនខាងនយោបាយនោះ បានបង្ហោះសារនៅលើទំព័រហ្វេសប៊ុករបស់លោកថា ភាពស្ងាត់ស្ងៀមមិនធ្វើពិធីរម្លឹកខួបថ្ងៃទី៧មករានេះ ដោយសារថ្នាក់ដឹកនាំគណបក្សប្រជាជនកម្ពុជាមិនចុះសម្រុងគ្នាលើសំណើលោក ហ៊ុន សែន ដែលចង់ឱ្យកូនប្រុសរបស់គាត់ គឺលោក ហ៊ុន ម៉ាណែត ចេញមុខក្នុងឱកាសពិធីរម្លឹកខួបនេះ មិនមែនមកពីបញ្ហាកូវីដ-១៩ទេ ដោយថា ពេលនេះ រដ្ឋាភិបាលបានប្រកាសបើកប្រទេសឡើងវិញហើយ។
លោក សម រង្ស៊ី បានលើកឡើងថា៖ «មន្ត្រីគណបក្សប្រជាជនកម្ពុជាដទៃទៀតមិនយល់ព្រមតាមសំណើលោក ហ៊ុន សែន ទេ ដោយសម្អាងថា ហ៊ុន ម៉ាណែត អត់មានស្នាដៃអ្វីក្នុងថ្ងៃ០៧ មករា ឆ្នាំ១៩៧៩ទេ ហើយក្នុងថ្ងៃជាបន្តបន្ទាប់ក្រោយមកក៏គ្មានដែរ»។
ដោយឡែក តំណាងរាស្ត្រគណបក្សសង្គ្រោះជាតិដែលត្រូវបានតុលាការរំលាយ និងជាស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន ហៅសាររបស់រដ្ឋាភិបាលនេះថាជាមោទកភាពជាតិមួយសម្រាប់កម្ពុជា បើគ្រប់ភាគីពាក់ព័ន្ធធ្វើបានពិតមែននោះ។
ប៉ុន្តែលោកមើលឃើញថា ច្រើនឆ្នាំមកនេះ ពលរដ្ឋនិងអ្នកនយោបាយមិនកាន់អំណាចបានគោរពរដ្ឋធម្មនុញ្ញ តែដោយឡែកអ្នកមានអំណាចទៅវិញទេដែលមិនបានបំពេញកាតព្វកិច្ចតបតាមរដ្ឋធម្មនុញ្ញ ជំរុញឱ្យមានជម្លោះនយោបាយនិងការថ្កោលទោសពីសហគមន៍អន្តរជាតិ ទៅលើការរំលោភសិទ្ធិមនុស្ស និងបញ្ហាអយុត្តិធម៌សង្គមជាដើមនោះ។
លោកថា៖ «រឿងគោរពរដ្ឋធម្មនុញ្ញក្ដី រឿងគោរពសិទ្ធិមនុស្សក្ដី មិនមែនអ្នកអត់អំណាចទៅរំលោភបានទេ ការរំលោភបំពានសុទ្ធតែចេញពីអ្នកមានអំណាច ហើយអ្នកមានអំណាចគឺកាំភ្លើងហ្នឹងខ្លាំងជាងគេហើយ»។
នាយកវិទ្យាស្ថានប្រជាធិបតេយ្យកម្ពុជា លោកបណ្ឌិត ប៉ា ចន្ទរឿន ចាត់ទុកសារអំពាវនាវរបស់ប្រមុខរដ្ឋាភិបាលនេះគួរឱ្យសាទរ ដោយលោកថា រដ្ឋធម្មនុញ្ញនិងអង្គព្រះមហាក្សត្រជាសសរស្ដម្ភរបស់ជាតិ។ ប៉ុន្តែលោកចង់ឃើញសារនយោបាយនេះផ្សារភ្ជាប់ទៅនឹងការអនុវត្តជាក់ស្ដែង ដើម្បីពង្រឹងប្រព័ន្ធប្រជាធិបតេយ្យដូចមានចែងក្នុងរដ្ឋធម្មនុញ្ញ។
លោកថា៖ «ប្រសិនបើការចេញសារនយោបាយ ឬក៏ជាលក្ខណៈប្រជាភិថុត [ធ្វើឱ្យពលរដ្ឋយល់ច្រឡំ] ទេ បញ្ហាប្រវត្តិសាស្ត្រ ក៏ដូចជាបញ្ហាជម្លោះនយោបាយ ការបែកបាក់របស់សង្គមខ្មែរហ្នឹង វាមិនអាចដោះស្រាយបានទេ […] រឿងការបែកបាក់នេះ កាលណាវាកាន់តែអូសបន្លាយពេលវេលាទៅ វាក៏កាន់តែកើតកូនកើតចៅ ដែលអាចធ្វើឱ្យរឿងនោះកាន់តែធំបង្កហានិភ័យទៅដល់ជាតិ»។
មាត្រា១ នៃរដ្ឋធម្មនុញ្ញ បានចែងថា «ព្រះរាជាណាចក្រកម្ពុជា ជាព្រះរាជាណាចក្រដែលព្រះមហាក្សត្រទ្រង់ប្រតិបត្តិតាមរដ្ឋធម្មនុញ្ញ និងតាមលទ្ធិប្រជាធិបតេយ្យ សេរី ពហុបក្ស»។
ប៉ុន្តែចាប់ពីចុងឆ្នាំ២០១៧មក គណបក្សសង្គ្រោះជាតិដែលទទួលបានសន្លឹកឆ្នោតជាង៤៣ភាគរយ ប្រហាក់ប្រហែលគណបក្សកាន់អំណាចដែរនោះ ត្រូវបានតុលាការរំលាយផាត់ចេញពីឆាកនយោបាយរហូតបច្ចុប្បន្ន ហើយមេដឹកនាំមួយចំនួនរបស់គណបក្សនេះ រួមទាំងលោក កឹម សុខា ផងកំពុងជាប់បណ្ដឹងនៅតុលាការនិងហាមធ្វើនយោបាយ។
ចំណាត់ការនេះធ្វើឱ្យកម្ពុជាប្រឈមនឹងការដាក់សម្ពាធពីក្រុមប្រទេសលោកសេរី ដែលទាមទារឱ្យរដ្ឋាភិបាលវិលទៅស្ដារស្ថានភាពសិទ្ធិមនុស្សនិងប្រជាធិបតេយ្យឡើងវិញ តបតាមរដ្ឋធម្មនុញ្ញនិងច្បាប់អន្តរជាតិមួយចំនួនដែលកម្ពុជាផ្ដល់សច្ចាប័នជាមួយអង្គការសហប្រជាជាតិ ក្នុងការធានាដំណើរការប្រជាធិបតេយ្យនៅកម្ពុជានោះ៕